زملكاوية اصيلة ( بمناسبة المئوية )

متهيأ لى نفك شوية و نطلع عفريت السياسة اللى راكبنا ده

النهاردة هاجاوب على سؤال تقريبا باتسأله باستمرار و رغم انى جاوبت عنه كتيررررررررر الا انى بارجع اتسأله تانى فكان لازم اعرفكم السبب

هو انتى بجد زملكاوية !!!!!!!!!!!!! ؟؟؟؟؟؟؟؟؟؟؟؟؟؟؟؟؟؟؟

اه انا زملكاوية و فرحانة و فخورة كمان بالعند فيكم انى كده

و بحب اعلن قدام الناس كلها زملكاويتى

يعنى لو كنت ماشى فى الشارع و لقيت انسة محترمة بتوقفك و تقولك عمو عمو انا زملكاوية ثق انك واقف قدام دوشة

فريقى يا ناس و بحبه

صحيح انا ما دخلتش النادى قبل كده و لا معلقة علم الزمالك فى اوضتى

ده انا حتى عمرى ما حضرت ماتش فى الاستاد

ده غير انى ما بادعيش انى علاء صادق و ان معلوماتى الكروية قوية اوى ده انا حتى زمان ما كنتش اعرف يعنى ايه اوف سايد و لا بيتحسب على اساس ايه اصلا لحد ما اخويا فهمنى و الحمد لله بعد ما ابتديت العب معاه بلاي ستيشان غصب و اقتدار حصلت لى طفرة فى معلوماتى التحكيمية

الزمالك بقى ... فريقى و بحبه

و بفرح جدا لما بنكسب و زغروطتى بتجيب اخر الشارع بعد كل جول

و بابقى فى منتهى الحزن يوم ما نخسر

و علشان محدش يفكر انى واحده ساذجة و يجيى لى و النصاحة قاتلاه و يقولى برضه مش هاتاخدوا الدورى السنة دى كمان

هقوله يا عم الرخم احنا نحسنا خلاص

اه و ربنا

و انا فاهمة كويس ان لو جبنا ميسى و كاكا و كريستيانو رونالدو مع بعض برضة ممكن ما ناخدش الدورى

عااااااااااااااادى و لا يفرق معايا فى اى حاجة برضة هفضل اشجعه

يشيلوا حسام يحطوا المعلم

يمشوا شيكا يجيبوا احمد حسن

برضة هاشجع الزمالك

اصل الموضوع تاريخ يا جماعة

و علشان تفهموا اكتر ارجعوا معايا شوية بالذاكرة لورا اه كمان .. كمان .. كمان .. كمان

لا مش اوى كدة ده كدة ماما و بابا لسه بيلبسوا الدبل اطلعوا قدام هبابه

ايوة اركن هنا هو ده

ركلة البداية

اولا لازم تعرفوا ان اصعب حاجة على اى طفل انه يطلع فى بيت غير مستقر

صدقونى الموضوع ده عذاب

بيت فيه انشقاقات و اختلافات

مفيش فيه اى لغة حوار مشتركة او اى قدر بسيط من التفاهم

للاسف ده كان بيتنا

تخيلوا معايا كده

طفلة بتفتح عينيها على زعيق و خناق و تهديدات بالطلاق

عايزين ايه من بيت فيه اب زملكاوى و ام ربنا يعفى عنها اهلاوية

اعمل انا ايه فى الجو ده

ازاى احدد هابقى فى صف مين

مين الظالم و مين المظلوم

بحب الاتنين و مش عايزة اخسرهم

بس الموضوع ده بالذات مفيهوش حل تالت

يا ابيض يا احمر

اللون البهتان بتاع الفراولة ام لبن ده ما نعرفوش

كان لازم اقول كلمتى

و لانى عارفة ان صوتى امانه فقررت اعطيه لمن يستحق

مشيت على الفطرة و لقيت قلبى بيهفهف مع العلم الابيض

الكورة تروح يمين قلبى يجرى وراها يمين

تيجى شمال يفُط وراها شمال

تيجى فى العارضة احسها ضربت فى نافوخى

تدخل جول يبقى يا سعدى و يا هنايا

المهم

بما انى بنت ابويا فكان الطبيعى ان الصراع اللى جوايا يتحسم بدرى بدرى

و بقيت زملكاوية

و زى اى طفلة ابويا يقوم يهيص اهيص معاه

يقول جول

انا اجرى فى الشقة كلها

هيه هيه هيه جول جول

يزعق و يقول حكم مرتشى و قابض

اقوله هو مزعلك يا بابا يقولى اه

اخبط التليفزيون باى حاجة تيجى فى وشى

الله مش بينرفزوا ابويا و بعدين كنت خايفة عليه الراجل كان عنده السكر

المهم بقيت لازقة لبابتى دايما فى كل ماتش

و بالتالى حبيت الزمالك

و لما ابتديت اكبر اكتر ابتدى حبى يكبر معايا

و سمعنى سلام حبك اصيل و كفاية انه اتولد جوايا يا زمالك يا قلبى يا حتة من كبدى

المهم

الموضوع ده عمل مشاكل بينى و بين الماما

بقت تتعمد تذاكر لى ساعة ماتش الزمالك

و انا ابدا دماغى و الف فردة بنى شمال من غير رباط انى اشوف الماتش

و طبعا بابتى فى صفى و تتحرق المذاكرة هى يعنى هاتطلع هدى شعراوى و لا نبوية موسى ما تسيبيها فى حالها

و بما اننا فى بيت الحكم فيه دائما و ابدا ذكورى كانت بتتحرق المذاكرة

الكارثة كلها كانت بتبقى فى ماتشات الاهلى مع الزمالك و خصوصا بعد ما اخويا اتولد حيث انه اتولد اهلاوى

ماما الله يسامحها بقى عملت للواد غسيل مخ من و هى بترضعه

طلع زيها بيحب النادى الاهلى هى تقريبا خافت تبقى اقلية و نطردها من الشقة فاخدت اخويا فى صفها

بس على مين انا صفى كان فيه الراس الكبيرة الله يرحمه

انا مش قادرة انسى يوم اول ماتش اهلى و زمالك بعد ما اخويا كبر شوية و ابتدى يعرف يشجع و طلع له حس و بقى بيزعق لما الكورة تطلع اوت

ساعتها البيت كان هايتخرب بجد و حقيقى

ده كان حتة يوم كان هايقف على الطلاق او طرد اخويا من البيت

بس الحمد لله اولاد الحلال لقوا الحل و قدروا يقنعوا اخويا و بابا

اه زى اى بيت مصرى اصيل جبنا عدد 2 تليفزيون و ساعة الماتش كنا بنفصل القوات عن بعض انا و بابايا فى اوضة و الماما و اخويا فى اوضة

و كنا ساعة الماتشات ما نعرفش بعض يعنى لو حد فى المعسكر الابيض بيموت محدش يسأل عنه من المعسكر الاحمر

طبعا بعد موت بابا الله يرحمه الوضع اختلف و استولوا على التليفزيون الكبير يتفرجوا فيه على ماتشات الاهلى

بس الحمد لله محدش قدر يأثر عليا او يغير انتمائى الكروى

و انا من هذا المزنق احب اقول لبابتى حبيبى و لكل الزملكاوية ان كل المغريات الفظيعة و الضغوط الرهيبة اللى اتعرضت لها علشان اسيب الزمالك ما أثرتش فيا فسوة و انى لازلت باقية على العهد و الله على ما اقول شهيد

الله ... الوطن ... الزمالك ... السمك .. الجبنة النستو .. المشمش .. البرتقال

رومانسية ما بعد 25 يناير

منذ فترة ليست بالبعيدة قادنى حظى العاثر

لا اسمحوا لى مش قادرة اكتب بالفصحى بصراحة انا متعبية جامد و مش هاينفع ابعبع و ابعبر غير بالعامية

المهم من شهر كدة حظى المهبب و دعوات امى عليا بعد كل حلة رز معجنة او بعد كل صينية كيك محروقة اتجمعوا عليا و حطونى فى موقف الله لا يوريكم و لا يحكم بواحد زيه على حد منكم

اللى حصل بقى انهم قرروا يستغلونى و يعملونى حمامة سلام بين اتنين من شباب 25 يناير كانوا بيحبوا بعض و بعد الثورة افترقوا

و طبعا انتوا عارفينى قلب رهيف و ما اقدرش اصد حد اتعشم فيا و خصوصا ان البنت تبقى قريبتى و الولد انا عارفاه كويس و كمان بينى و بينكم كان نفسى اعيش الدور ده علشان انفى الفكرة الغلط اللى متاخدة عنى بعد ما طلعت اشاعة انى لو اتحشرت فى مباحثات نهر النيل هاخلى الشعب يستحمى بالبيبسى و الرز يتزرع بالتنقيط

المهم ما اطولش عليكم الواد قصدنى قلت بلاش اكسفة و خصوصا ان الدمعة كانت هاتفر من عينه و هو بيترجانى اصلح بينهم هو صحيح نفسة كانت قايمة عليه و مكسوف يكلمها و البنت غلبتنى على ما رضيت تيجى تقابلة مع انى عارفة انها هاتموت عليه بس الحمد لله اتقابلوا

و علشان مش كل شوية اقول الولد و البنت هانفرض لهم اسماء حركية

مشحوت و مسعدة مثلا

و محدش يتريق اصل لو عرفتوا اسماءهم الحقيقية هاتعرفوا ان الاسامى دى امله بالنسبة لهم

المهم حددت الزمان و المكان و اخدتهم على حديقة رومانسية جميلة

و قعدنا فى الكافيتريا و طلبوا حاجات و طفحوها

على فكرة انا ما شربتش طلبوا لى فراولة و انا عندى حساسية

انا بفكرهم بس ان ليا عدد 1 مشروب فى ذمتهم الهى يصرفوا ثمنه على الدكاترة لو ما ادونيش حقى ناشف

المهم قعدت بينهم الطف الجو بكلمة ليها على غمزة ليه علشان يقول لها كلمة حلوة

و ربنا فك عقدة لسانة و ابتدا يتكلم و ياريته ما نطق لا يا ريته ما نطق ايه ده يا ريتها كانت بركت عليه جابت اجلة يوم ما ولدته

الواد بدل ما يقولها بحبك وحشتينى زى حسين الجاسمى رايح يحكى لها عن الثورة المضادة و المؤامرات اللى اتعرضت لها الثورة و افعال القوات المسلحة اللى محدش يعرفها غيرة على اساس انه رئيس مراجيح مولد النبى مثلا

المهم انا حسيت انى اتدبست فى القعدة السودا دى و خصوصا انى لا نزلت التحرير و لا شاركت فى الثورة و لا عندى فكرة عن الاسامى اللى قاعدة باسمعها

و بما انى مليش صبر على العاشرة مساء اللى كانوا مشغلينها قلت اقلب المحطة قصدى اقلب الكرسى و اتفرج على تليفزيون الجيران

و شوفت و يا حلولى على اللى شوفته

ولد و بنت متخاصمين برضة و كانوا بيتصالحوا

بس ايش جاب لجاب

عيال و لا فى دماغها حسنى و لا الافراج عن زكريا عزمى دول يمكن حتى يكونوا ما يعرفوش ان كان فى ثورة فى البلد

المهم دول بقى قاعدين عيناه فى عينيكى و ايديكى متشبكة فى يديه و اخر رومانسية

الولد عمال افتكر لى كلمة حلوة كانت حلوة بيننا مش هاجرح تانى قلبك حبيبى خلاص سامحنى

و البنت عينيها بتضحك من وسط دموعها اللى مغرقة خدودها

ابص لكم على مشحوت و مسعدة الاقيه بيقولها طب فاكرة كانزات البيبسى اللى كنت بافرقعها علشان احميكى من القنابل المسيلة للدموع

تقوم هى ترد عليه و تقوله و نسيت قزايز الخل اللى كنت باغرق وشك بيها علشان افوقك

خل الله يقرفهم البعدا

روحت قالبة الكرسى تانى و قلت لهم اولعوا

لقيته بيقولها طب فاكرة اول يوم اتقابلنا فيه فاكرة اول عيد حب مر علينا

و البنت ابتدت تحن و تقوله طبعا و فاكرة اول بحبك و اول وردة

الاقى مشحوت بيقولها فاكرة اسعد لحظة فى حياتنا

راحت مسعدة قالت له طبعا يوم تنحى مبارك كانت اول مرة تدلعنى فيها و تقولى يا مسعودتى

و على قناة النيل الرومانسية كانوا بيفتكروا اول قصيدة كتبها لها

و مشحوت و مسعدة كانوا بيفتكروا البيان الاول للجيش بعد التنحى

كتمت غيظى و قلبت الكرسى تانى

لقيت الولد مسك ايد البنت و بيقرب ايدها من شفايفه علشان يبوسها

ساعتها بقى ما قدرتش اسكت

روحت بصيت لمشحوت و قلت له شوفت يا مدهول الرومانسية

شوفت البنات بتتصالح ازاى مش انت بقالك ساعة اتضربت و اتكهربت و اترش علينا ميه و نمنا على الاسفلت 18 يوم

طبعا غصب عنى صوتى على

و الولد و البنت اخدوا بالهم انى ببص عليهم راح الولد زغر لى و برق لى جامد

و طبعا انتوا عارفين ان الجبن سيد الاخلاق و سيد المائدة فى نفس ذات الوجبة :P :D 

المهم قلبت الكرسى تانى و قولت لمشحوت هو انت ممكن تنضرب علشانى لو الواد اللى عامل فيها تامر حسنى ده جه يقولى انتى بتبصى علينا ليه

قالى ورينى كده

و بدل ما يبص على الواد بص على البنت خصوصا و انها كانت بنت مرتاحة لا جتتها الاسفلت هراها و لا شعرها اتقطع و لا عصيان الامن المركزى مورماها

و كان هايفضل متنح لولا ان مسعدة راحت زغدتة زغدة كانت هاتعمل له تهتك فى الطحال راح فاق على طول و قالها بالراحة شوية عصيان الامن المركزى لسه مزرقة جتتى

و قالى طب اقعدى عدل الواد ده شكلة من بتوع مصطفى محمود يعنى ما اخدش عصايا واحدة فى الثورة و صحتة زى الفل

ابتديت الطف الجو بينهم تانى و اذا بى ارى مشهد رومانسى تانى على ترابيزة اخرى و كان الكافيتريا كلها بقت عمر و سلمى فجأة

و برضه انا تنحت للثنائى الجميل ده و سيبتنى من برنامج الحياة اليوم اللى كان شغال

بس البت السوسة غمزت للواد اللى معاها و قالت له فى حد بيبص علينا

راح الواطى زاغر لى هو كمان

و الله لو حد فيهم كان سامع الحوار اللى داير على ترابيزتنا كنت صعبت عليه و كان هايتطوع و يقوم ياخدنى و يقعدنى معاهم

المهم الواد الجديد ده كان بادى بيلدينج فقلت لمشحوت ممكن تنضرب من الواد ده

قالى هو فى ايه انتى معايا و لا معاهم حرام عليكى انا ايه اللى خلانى اجيبك معايا تحبى اقلع القميص و اوريكى جسمى اللى متبهدل من الرصاص المطاطى و العصيان يا شيخة اتقى الله فيا

و الاقى مسعدة الواطية تقوله انا حاسه انها من الثورة المضادة

طبعا انا اول ما سمعت الثورة المضادة خوفت ما هى دى خيانة عظمى يعنى لو الحديقة فيها 6 بس من شباب الثورة مش بعيد يجتمعوا و يقرروا ياخدونى على الميدان خصوصا و اننا كنا قريبين منه و ساعتها يعدمونى رميا بالجزم

فقلت لهم الطيب احسن يا شباب مش انتوا خلاص اتصالحتوا و الحمد لله

الاتنين فى نفس واحد اه الحمد لله و متشكرين اوى على مجهودك معانا

طب الحمد لله اطير انا بقى

كلمتين منها على كلمتين منى قطعنا شعور بعضينا

انا عارفة ان بقالى كتير مش باكتب حاجة جديدة

بس و الله الشغل من ناحية و البرد اللى حالف لا يسيبنى و لا يخلص عليا و يريحنى من ناحية تانية

و طبعا انتوا عارفينى لما بابقى عيانة الربع اللى ساترنى و ماشيه بيه بيضرب

و انا الربع ده بالذات مستموتة و ماسكه فيه بايديا و سنانى لانه لو راح منى هاتجيبونى من اشارات المرور فى عز الظهر ببنطلون البيجاما و فردة شبشب بصباع و واقفة بانظم المرور

المهم علشان ما اطولش ال يعنى اول مرة ارغى و اطول

قاعدة فى الشغل فى امانة الله و كالعادة طبعا بافك فى طلاسم التيلى سيلز ربنا ينتقم منهم و من العملاء فى ساعة واحدة

و طبعا البرد عامل عمايله معايا رشح بقى و عطس و كحة و حبة ارتفاع فى درجة الحرارة على خفيف كده الارتفاع اللى بيولع الدماغ بس ما بيسيحهاش ده اللى هو الطبيعى بتاع البشر

و فجأة وقع فى ايدى اوردار بتاع علاء اقول عليك ايه بس يا علاء روح يا شيخ الهى ربنا ........ و لا بلاش الطيب احسن بس هو لو يبطل يكتب بصوابع رجله و الله الدنيا هاتمشى و هاتبقى نايس جدا

المهم الاوردر فى ايدى و طبعا كالعادة مش فاهمه منه اى حاجة و الباشا نايم فى بيتهم و لا فى دماغه الغلبانة اللى بتتحرق علشان تقرا خطه و فوق كل ده و ده قاعدة لوحدى زمايلى كل واحد طلع له مشوار مهم و سابونى اوفيس الون لوحدى

و انا طبعا سخنة و الاوردر سخننى بزيادة و مش هاخبى عليكم انا من فترة كده ابتديت احس انى لو كتمت فى نفسى و ما بعبعتش باللى جوايا هابتدى ادخل فى مواويل انا مش قدها ضغط بقى و سكر و كده و انا لسه صغيرة برضه فلقيت ان الحل الوحيد ان لما حاجة تضايقنى اقول على طول و ما اكتمش

طب انا قاعدة لوحدى

يا سلام و ماله ده احسن على الاقل افضفض براحتى و مفيش مانع انى اشتم كمان بس من غير الفاظ طبعا

فماسكة الاوردر و منك لله يا علاء روح يا شيخ ربنا ينتقم منك يا بعيد امال لو ما كنتش تعبانة يا ناس و سخنة و مش لاقيه حد يقولى سلامتك يا دوشة

اسمعها بتقولى يوووووووووووه اقرفينا بقى

بسم الله الرحمن الرحيم انتى مين ؟

انا اللى مستحملاكى بقالى سنين لحد ما طهقت منك كل شوية عيانة عيانة هو انتى اول واحدة تتعب يعنى و لا هو الشتا جه عند سيادتك لوحدك

يادى الخيبة انا كنت عارفة ان اخرتى فى مستشفى المجانين بس ما كنتش عارفة ان النهاية هاتبتدى بدرى كده اه يانى يا مه يا نى يا مه

بتأوأى ليه دلوقتى

بأوأ علشان خايفة انتى مين ؟

تانى نفس السؤال ما قلت لك انا اللى مستحملاكى بقالى سنين

طب انتى فين انا سامعاكى بس مش شايفاكى

هانبتديها غباوة بقى مش كده يعنى هاتشوفينى ازاى انا محدش يقدر يشوفنى

ايوه كملى بقى محدش يقدر يشوفنى و لا يسمعنى غيرك زى الافلام كده

انا كنت عارفة ان الافلام دى هاتجيب لك تخلف عقلى لا يا ستى لا انتى و لا غيرك يقدر يشوفنى

ليه ؟

لانى مليش وجود اصلا

يا فرحة امى بيا امال انا سامعاكى ازاى

اه ما انا اوديو بس تسمعينى اه لكن تشوفينى لا

طب بالراحة عليا شوية ابوس ايدك انا صحيح مؤهل عالى بس انتى عارفة تعليم بلدنا لا يسمن و لا يغنى من جوع زيه زى الاكل اللى على ميه لا طعم و لا ريحة

ماشى يا ستى هاخدك على قد عقلك اللى مش موجود اصلا انا موجوده جوه مخك

يا لهوى ورم

ارحمنى يا رب يا حبيبتى افهمى انا موجودة جوه دماغك لكن مش ورم انا قاعدة باراقبك و اشوفك بتعملى ايه فى الناس و الدنيا بتعمل فيكى ايه و بصراحة حسيت انك تعبتى و تعبتى اللى حواليكى

انا فعلا تعبانة جداااااااا و مش عارفة اعمل ايه البرد بجد تعبنى اوى و مش لاقيه له حل

لا انا حاسه انك زهقتى من الدنيا كلها و علشان كده هاقول لك على حل حلو

ايه هاتجيبى لى دوا حلو للبرد

يا بنتى هاريحك من البرد و غير البرد

ازاى ؟

رحلة

رحلة لفين ؟

هاتدخلى جوه مكانى و تشوفى الدنيا من جواكى

اقطع دراعى و اعمل عليه فته و افرقها على المساكين لو فهمت حاجة

بصى يا ام دراع انتى بتقولى البرد مضايقك مش كدة


اه

خلاص هاتفق معاكى على حاجة جميلة و هاتريحك تيجى نبدل

نبدل ازاى يعنى

تدخلى انتى جوا و اطلع انا بره

ايه الجنان ده يعنى ايه ادخل انا جوه و تطلعى انتى بره

يعنى انتى هاتقعدى جوه مخك معززه مكرمة و اطلع انا بره البرد يمرمط فيا و الشغل و البيت و الزحمة يمكن ساعتها تصعبى عليا و اقدر اتحمل صداعك اللى مسبباه لى باستمرار و علشان ابقى حقانية انا مش هاعمل اكتر من اللى بتعمليه يعنى هقلدك بالظبط و ده برضه علشان انتى تتفرجى على تصرفاتك و تقيميها

طب و الله فكرة حلوة بس هو ده ينفع

اكيد ينفع امال يعنى باهرج معاكى لو عايزة نجرب قولى موافقة بس و انا هاتصرف

خلاص موافقة

اوك ادينى بقى 10 دقايق اغير لك الملايات و اجيب لك فوطة نضيفة علشان تقعدى جوه مرتاحة

خلاص براحتك و اكون كمان كلمت مامتى علشان اكيد هاتوحشنى

هاتوحشك ايه بس ما انتى هاتشوفيها هو انا يعنى هاروح فين ما انا هاعيش فى بيتكم

اه صح . بس بقولك يا اسمك ايه انتى انا وقت ما احب اطلع هاطلع و هاترجعى انتى مكانك مش كده

اكيد طبعا . deal

Deal

و قبل ما يمروا العشر دقائق كنا مبدلين الادوار

و لانى كنت صاحية بدرى و البرد كان مجننى اول ما دخلت جوه روحت نايمة على طول اصل الجو كان دافى و جميل

بس خير اللهم اجعله خير صحيت على زعيق و خناق

ببص لقيت زورى الغلبان ملتهب و عمال يزعق و يقول كده كتير هو مفيش دم خالص مش هاين عليها تشرب كوباية ينسون واحدة مش قادر خلاص يا ناس دى هاتجننى مامتها بقالها ساعة بتتحايل عليها علشان تعملها اى حاجة دافية و دى اللى طالع عليها لا مش بحبه لا بقرف منه روحى يا شيخة منك لله


و لاول مرة احس انى بقالى سنين طويلة مش حاسه بالمسكين عمرى ما جالى برد و قدرت ظروفه و اديته حاجة دافية حقك عليا يا زورى يا حبيبى

شوية و لقيت عينى بتنفخ مالك انتى كمان

يا بنتى اتخمدى بقى حرام عليكى صاحية من بدرى و فى الشغل كمبيوتر و فى البيت كمبيوتر و لما بتحبى تريحينا شوية بتتفرجى على التليفزيون حرام عليكى مش قادرة يا ناس ده انا احمريت من السهر نفسى انام بقى طب و الله لا انام غصب عنك يا ناس الحقونى منها بقى دى بتفتحنى بالعافية امسكوا فى بعض يا جفون يا احنا يا هى النهاردة طب حد ابن حلال يطفى النور يارب الكهرباء تقطع عندكم علشان تنامى غصب عنك

المهم شوية و نامت و انا كمان نمت

اه نسيت اقولكم اننا اتفقنا اننا هانقطع الاتصال بينا لمدة يوم كامل

صحيت من النوم الصبح على صوت المنبه و هو بيرن زى السارينة و هى بمنتهى البرود بتطفيه و ترجع تنام تانى و اول ما ننام المنبه يرن تانى نقوم مفزوعين تانى

لحد ما ودانها صوتت مش قاااااااااااااادرة البتاع ده صوته مزعج ما تقومى بقى منك لله

المهم صحيت و لقيتها بتفتح الدولاب و لقيت كل العالم اللى جوا بيعيطوا فقلت لهم مالكم

لقيتهم بيقولوا لى اصل احنا عارفين اللى هايحصل دلوقتى هتطلع هدوم و تدخل تاخد دش

طب و هى النضافة وحشة

لا مش وحشة بس احنا دلوقتى دفيانين و هى ماعندهاش دم هاتروح تغرقنا مية

طب ما كده حلو علشان تفوقوا

اه نفوق بس اصبرى بقى لما تطلع من التواليت على الشارع على طول و انتى تعرفى اللى بنحس بيه و خصوصا و انها مش معترفة ان الناس فى الشتا بتلبس هدوم تقيلة مش بتبلطج و بتلبس هدوم خفيفة صيف شتا

المهم خلص الدش و طلعنا على الشارع و لقيتهم كلهم ماسكين فى بعض و الدراعات اتخشبت و الركب بتترعش و السنان بتخبط فى بعض و الهوا عامل زى التتار عمال يفترى عليهم و هما لا حول و لا قوة لهم و مفيش اى درع يحميهم لا جاكيت و لا بلوفر حتى

بجد صعبوا عليا

و اول ما وصلنا الشغل لقيتها بتنده عليا ايه رأيك فى القعدة جوه

هو انا كده بجد ؟

ليه انتى مش بتحسى بنفسك و باللى بتعمليه فيهم

لا بحس بس ما كنتش متصورة ان الوضع سيء اوى كده

و اكتر من كده كمان

طب خلاص طلعينى بقى

لأ اصبرى بقى لما اخلص شغل علشان تبقى خدتى اجازة 24 ساعة

ماشى

الشغل خلص

طلعينى بقى

طب لما اروح البيت

ماشى

انتى جيتى يا دوشة

اه يا ماما

كويس انك جيتى بدرى اما انا النهاردة عامله لك غدا هاتاكلى صوابعك وراه

عامله لنا سمك يا ماما صح ؟

شوفتى الهنا اللى احنا فيه عايزة تاكل سمك و هى عيانة كده بذمتك الالتهابات اللى انا فيها دى هاتروح ازاى

معلش يا زورى حقك عليا انا

لا و انا كمان مش قادر اخد نفسى و الله

معلش يا جهازى التنفسى

و انا كمان يا ابله تعبانه اوى

حتى انتى يا مناخيرى معلش يا حبيبتى

بالله عليكى تقولى لها تجيب لى قطرة علشان خلاص ما بقيتش قادرة

حاضر اول ما هاطلع من هنا هاشترى لك على طول

و انا عايز برادورال علشان الاحتقان

حاضر

و انا محتاجة فوار خصوصا بعد موضوع صوابعها اللى هاتاكلهم دول انا اهضم اكل اه لكن اعضاء بشرية مش هقدر من غير فوار

حاضر يا معدتى

طب بالمرة و انتى فى الصيدلية ابقى هاتى لى معاكى مسكن يا اما تكلفى نفسك شوية و تروحى تحشينى اصل السوسة هاتجننى و الله و فاضل لها شوية و توصل للعصب

حاضر يا ضرسى من عينيا

و بعد ما اخدت الروشتة منهم


بابص على الهانم لقيتها دخلت على المطبخ و ابص الاقى صينية مكرونة بالبشاميل و فراخ مشوية

قلت لها يلا بقى ادخلى و طلعينى اتغدا

لا اصبرى بقى انا نفسى من زمان ادوق المكرونة بتاعة مامتك

انتى هبلة و لا ايه ادخلى بسرعة و طلعينى المكرونة دى انا طالباها من شهر و ما صدقت انها عملتها لى

لا مش داخلة

لا بقولك ايه ادخلى من سكات الطيب احسن

لا مش داخلة و ورينى هاتعملى لى ايه ؟

يا بنتى ما تخلينيش اتهور عليكى

ما تقدريش

خلاص هاطلع لك بنفسى

و مين هايسيبك تعملى كده على فكرة العالم اللى جوه دول بقالهم سنين متعذبين بسببك يعنى لو عرفوا انك انتى اللى كنتى بتعذبيهم مش هايسيبوكى تطلعى من جوه سليمة

لا عنك انتى انا هقولهم و بعدين انا وعدتهم انى هاخلى بالى منهم بعد كده و مش هافترى عليهم تانى و هازود المرتبات قصدى الفيتامينات

صح يا رجالة

صح بس على الله تصدقى بقى

و الله ما هاعمل فيكم كده تانى هالبس تقيل و هاخد الدوا و مش هاكل سمك تانى و انا تعبانة

و ايه اللى يضمن لهم كلامك

انا اضمنه برقبتى و بعدين العاقل مش اللى يتعظ من غلطاته العاقل اللى يتعظ من غلطات غيره و انا شوفت و امنت و ابصم بالعشرة ان اللى عايز يعمل حاجة بيعملها و بصراحة بقى طرة بقت زحمة و انا ما عنديش استعداد اترمى فيها الناس هناك كلهم مش من مستوايا دى عالم ضاحكة على خمسة و تمانين مليون بنى ادم لكن انا غلبانه ضاحكة على زور و معدة و مناخير هاروح فين بينهم بس وعد منى انى هاحسن معاملتكم من هنا و رايح

برضه مش هادخل الا لما اكل المكرونة الاول

يعنى انتى مش هاتجيبيها البر ماشى قوينا يا رب

المهم كلمة منها على قلمين تلاتة منى دخلت بعد ما طيرت لها سنتين و قطعت نص شعرها و برضه انا اللى اكلت المكرونة فى الاخر


اصل دى بالذات ما كانش ينفع معاها الحسنى ابدا

و حتى لو هاعمل اصلاح لازم زى ما باطلع الجزرة اطلع العصاية سيف المعز و ذهبة يعنى

اصل فى اصناف كده لازم تتسك على دماغها ايا كانت مفردات العصر الجديد اللى هاطبق آلياته ( حلوة آلياته دى يخرب ثقافتى )

نياهاهاهاهاهاهاهاها شوريرة انا

و كل دور برد و انتوا طيبين