أنا نفسى اشتغل يا ناس

أنا نفسى اشتغل يا ناس

مروة يا مروة يا مروة


نعم يا ماما



ايه يا حببتى ما بترديش ليه




سورى يا ماما و الله ما سمعتك





انتى بتعملى ايه



مافيش بادور على شغل



تانى . انتى ما بتحرميش برضه بتدورى فى الجورنال اللى كله نصب فى نصب ده



يا ماما و الله خلود و نادين اصحابى اشتغلوا عن طريق الجورنال اللى مش عاجبك ده


اه خلود و نادين طب و سيادتك . انتى ناسية الشركة اللى دفعونا 800 جنية عشان تتدربى فيها و فى الاخر طلعت نصبايه ده غير مكاتب المحاسبة اللى كانوا بيهدوا حيلك 3 شهور تدريب و بعد كده يقولوا لك ما نعطلكيش


لا يا ماما ما انا المرة دى مش هادور على مكاتب محاسبة تانى و لا شركات تدريب

امال هاتعملى ايه المرة دى هاتدورى على مكتب مخدماتى

لا يا ماما مخدماتى ايه انا قررت اشتغل سكرتيرة


سكرتيرة طب و هاتشتغلى سكرتيرة فين


فى اى شركة هو انا هاغلب يعنى هو كل المطلوب لباقة و حسن مظهر و شوية E على كمبيوتر و الموضوع هايقضى ان شاء الله


و هو الانجليزى بتاع How are you و fine thank you ده هاينفع


قولها يا خالد و النبى

خالد لو سمحت ما تتدخلش انت انا باكلم ماما دلوقتى

و كمبيوتر ايه اللى بتعرفيه انتى مفكرة نفسك هاياخدوكى تشغلى لهم أغانى و أفلام و لا هايلاعبوكى games فى الشركة


و انت مالك و بعدين بقى الشركات دى بتهتم بالنت اكتر و انت عارف ان انا شاطرة فى النت


اه صح اصلك هاياخدوكى تعملى Chat مع العملاء يا بنتى بطلى تخلف بصى لامكانياتك و اتكلمى انتى واحده معاكى بكالوريوس تجارة بتقدير مقبول بالعافية و بدرجات الرأفه يبقى شغل ايه اللى بتدورى عليه


لا انا امكانياتى اكبر من كده بكتير يمكن انت ما تعرفهاش لكن اكيد هالاقى اللى يقدرها


تقصدى ايه يا بت


ما اقصدش الافكار السودا اللى فى دماغك انا قصدى انى شاطرة و ممكن اتعلم بسرعة و يا ريت تطلع انت منها


انتى حرة انا نصحتك و على العموم اتفلقى انتى عايزة حاجه منى يا ماما


رايح فين


يعنى هاروح فين هاروح الشركة بتاعة بابى طبعاً عشان استلم الطلبية اللى جايه من الصين . نازل اقعد على القهوة شوية مع اصحابى


انت بتتريق طب يا حبيبى ما تشوف الجورنال اللى مع اختك يمكن تلاقى شغل بدل ما انت بقالك 3 سنين متخرج و مش عارف تشتغل


يا ماما شغل ايه صلى على النبى . انا مستنى المكتب اللى خد الفلوس منى يتصل بيا عشان اسافر و اخلص


ربنا يا ابنى يوفقك . و انتى لقيتى حاجه فى الجورنال


ادينى بادور يا ماما

انا عارفه شغل ايه اللى بتدورى عليه ما اديكى قاعده فى البيت و خلاص


يا ماما زهقت و بصراحة بقى الـ 200 جنية اللى بابا بيديهم لى مش بيكفونى


طب و اللى يخليهم لك 400


هو بابا هايرضى برضه


اه هايرضى مالكيش دعوة انتى


ماليش دعوه ازاى ما انتى بتشوفيه و هو بيديهم لى بيبقى عامل ازاى ده انا خايفه فى مرة تجيله ذبحة و هو بيطلعهم من الحزن اللى بيبقى فيه

يا بنتى ما هو معذور انتى متخرجة من سنتين و اخوكى من 3 سنين و مافيش حد فيكم دخل علينا بحزمة بقدونس لغاية دلوقتتى لا بتاخدوا منه كمان . ده غير مصاريف اختك اللى فى ثانوية عامه


طب امال هايرضى يدينى 400 جنية ازاى

ما هو مش هايديهم لك لله

امال ايه


بصى يا حبيبتى . انتى عارفه طبعا ان ام محمد اللى بتيجى تنضف لنا الشقة بتاخد 50 جنية فى المرة و بتيجى 4 مرات فى الاسبوع ايه رأيك نخليها ماتجيش تانى و تعملى انتى الشقه بدالها

ايه عايزة تشغلينى فى البيت بالفلوس


هو انتى كنتى بترضى تشتغلى ببلاش


يا ماما حرام عليكى ايه معاملة مراة الاب دى



هو فيه مراة اب بتدى فلوس مراة الاب بتدى بالجزمة

لأ انا مش موافقه طبعا

خلاص اعملى اللى يريحك انتى حرة بس لما يتنصب عليكى ما تبقيش تيجى تعيطى زى كل مرة


و قعدت مروة تدور لغاية ما لقت اعلان عن طلب سكرتيرة

مطلوب سكرتيرة حسنة المظهر لا يشترط مؤهل لمكتب استشارات هندسية

مروة اتصلت بالرقم الموجود فى الاعلان و صاحب المكتب رد عليها و حدد لها معاد الساعه 10 الصبح


و فى الميعاد مروة طارت على المكتب


السلام عليكم


و عليكم السلام

انا عندى انترفيو النهاردة


هو حضرتك استاذة مروة


اه هو باشمهندس احمد موجود


باشمهندس احمد مش موجود و الله لكن هو قال لما حضرتك تيجى تستنيه هو على وصول اتفضلى


دخلت المكتب و لقت الولد اللى فتح لها الباب جاى و جايب لها الموبايل بتاعه


باشمهندس احمد عايز يكلمك


ايوه يا باشمهندس


ايوه يا مروة بصى انا هاتاخر شوية


طب انا ممكن اروح و اجى لحضرتك بكرة

لأ انتى خلاص استلمتى الشغل و على العموم طه الساعى هايوريكى الشغل على ما اجى و على فكرة احنا مش هانختلف على حاجه مرتبك مبدئيا هايبقى 400 جنية ده غير العمولات اللى هاتطلع من كل عمليه المكتب هايعملها و ما تقلقيش احنا العملاء بتوعنا عالم محترمة و بيقدروا الناس اللى بتتعب معاهم



اوكى يا فندم ربنا يقدرنى و اكون عند حسن ظنك . مع السلامة

بصى يا ستى ده مكتب السكرتيرة هايبقى مكتبك و انا هاروح اجيب شوية طلبات و هاجى لك

مروة قامت تتفرج على المكتب لقيته عبارة عن اوض مقفولة كل اوضه فيها ترابيزة و كام كرسى و مافيهاش مكاتب و لا رسومات و لا اوراق و شوية و لقت واحد من العملا جاى


صباح الخير


صباح النور يا فندم


هو انتى جديدة هنا

اه


امال فين سمر



ما اعرفش و الله بس هو مافيش حد من الموظفين لسه جه . حضرتك تأمر بحاجه


لأ الحقيقة انا كنت جاى لسمر بس على العموم انتى هاتلاقى الملف بتاعى عندكم ابقى شوفيه و حاولى تخلصينى لو سمحتى عشان انا زهقت و عموما الكارت بتاعى اهوه


حاضر يا فندم

جرس التليفون رن


الو


الو شركة الهدى


ايوه يا فندم


ممكن اتعرف على طبيعة المعاملة عندكم


لأ و الله انا لسه جديدة فى الشركة و لسه مافيش موظفين موجودين ممكن حضرتك تتصل كمان شوية


ايه يا مروة اللى بتقوليه ده

مين معايا

انا احمد يا مروة . هو طه ما اداكيش الورقة اللى هاتقرى منها للعملاء و لا ايه


لا و الله ما حصلش


و موظفين ايه اللى لسه ماجوش ادينى طه بسرعه


هو مش موجود . و لا استنى جه اهوه


ايوه يا احمد باشا


ايوه يا زفت ما اديتهاش الورقة اللى كتبتها لك ليه ؟


نسيت و الله بس هاديها لها اهوه

بصى يا استاذة مروة الورقة دى حضرتك تحفظيها كويس و اى حد يكلمك تقريها له


حاضر


الورقة بقى مكتوب فيها ايه ؟

مع حضرتك شركة الهدى . شركة الهدى بتوفر كل اللى بتتمناه عندنا جميع الاعمار و جميع الجنسيات و المؤهلات

لو اللى بيتصل راجل عندنا عرايس ممكن تشارك فى الاثاث و على استعداد للسفر و بنوفر كمان جواز المسيار و الجواز العرفى و كل ده بأقل الاسعار


لو اللى بتتصل ست ممكن نوفر لحضرتك العريس اللى بتحلمى بيه و باقل الاسعار


طه يا طه


نعم


هو ده مكتب ايه


يعنى انتى ما فهمتيش من الورقة مكتب جواز ايه مش باين


يعنى انا هاشتغل ايه بالظبط

هاتوفقى راسين فى الحلال


بس الاعلان كان بيقول شركة هندسية

ما هو كان كده فى الاول و لما الباشمهندس لقاه بيخسر حوله لمكتب جواز


مروة فكرت تاخد بعضها و تهرب بس خافت من شماتة مامتها و اخوها فيها و قررت تستنى و تشوف اللى هايحصل

شوية و التليفون رن

مكتب الهدى


ايوه يا فندم


سمر معايا


لا يا فندم مع حضرتك مروة


امال سمر فين


لحظة واحده . يا طه هى سمر فين


راحت فى الوبا


ايه

غارت فى داهيه سابت المكتب


سمر سابت المكتب يا فندم


طب مش مشكلة على العموم انتى صوتك احلى

نعم


بصى بس . انا عايزك تشوفى لى حته حلوة كده لحسن الوليه اللى معايا مجننانى على الاخر

ربنا يقدم اللى فيه الخير يا فندم بس يا ترى حضرتك عندك مواصفات معينة


اه هى اهم حاجه تكون مش نكدية كفايه عليا البومه اللى فى البيت و تكون حلوة

طب بالنسبة للمؤهل


مش مشكلة اى حاجه . بس تبقى خدمتينى بجد لو شوفتى لى حاجه عرفى . و انتى و شطارتك بقى و همتك معايا و ليكى الحلاوة ان شاء الله و لا اقولك انتى صوتك عجبنى ايه رأيك على فكرة انا راجل فنجرى قوى

لا يا فندم مش هاينفع و الله


خلاص يا ستى ما تتخضيش . بس شوفى لى حاجه على ذوقك كده


ربنا يسهل يا فندم . مع السلامة


قفلت معاه و سألت طه هى مين سمر دى يا طه


دى السنكوحه اللى كانت شغاله هنا قبلك


سنكوحه الله يكرمك يا طه


لأ انا ما اقصدش اصل دى بت كانت مصدية و شكلها يقرف و كل ما زبون يدخل المكتب تحط عينها عليه يالا اهى غارت فى داهية بعد ما وقعت عريس لقطه خسارة فى عضم ابوها . لكن ما قولتليش يا أنسة مروة انتى مخطوبة ؟

لا يا طه


انا مش عايزك تقلقى ان شاء الله نصيبك متشال لك و عريسك بعون الله هايبقى من هنا


انت بتقول ايه

صدقينى مافيش واحده دخلت المكتب هنا الا و طلعت بعريس بس انتى و شطارتك بقى العريس اللى تلاقيه كويس اوعى تخليه يفلت من ايدك . تصدقى بالله انا مجوز اخواتى الاتنين من المكتب


و لسه مروة هاترد عليه لقت التليفون بيرن


شركة الهدى معاك يا فندم


قصدك شركة النصب يا روح امك


ايه ده انت مين ؟


انا جمعه عويس يا ست سمر اللى مقلبينه فى 2000 جنية لغاية دلوقتى و لسه ما شوفتش حاجه ايه نسيتى صوتى


حضرتك انا مش سمر

و ايه المشكلة يعنى تلاقيكى برضه بنت ......... نصابه زيهم


لا انت بجد بنى ادم غبى و قليل الأدب و راحت قافلة السكة فى وشه


ترن ترن ترن


الو


انتى بتقفلى السكه فى وشى طب و حياة امك لاجى اطربق المكتب على دماغك


طه مين جمعه عويس ده


تلاقيه حد من العملاء



بس ده بيقول انكم ناصبين عليه و هاييجى دلوقتى

و ماله خليه ييجيى


ييجيى ازاى ده بيقول هايطربق المكتب على دماغنا

و ماله . ما تخافيش يا انسة مروة انا هادافع عنك برقبتى

هاتدافع عنى . ليه هو ممكن يعمل ايه


انتى شايفه الجرح اللى فى ايدى ده


اه


اهى دى ضربة مطواه خدتها بدل الست سمر من شهر قبل ما تمشى


نعم


اه كان زبون مقلبينه فى 3000 جنية و برضه ماطالش لا ابيض و لا اسود وكل ما نجيب له عروسة ما تعجبوش جه و البت سمر طولت لسانها عليه جه يغزها روحت واخد الضربه بدالها

لا يا راجل


اه و الله و انتى كمان اى حد هايقرب لك هادافع عنك برقبتى

راحت مروة من غير كلام واخدة شنطتها و جريت و خدت أول تاكسى و طيران على البيت



انتى ايه اللى جابك بدرى انتى مش قلتى استلمتى الشغل خلاص


ما انا استقلت


انتى لحقتى يا بنتى على العموم خيرها فى غيرها يا حبيبتى و لا تضايقى نفسك


ماما . كلمى ام محمد و قولى لها ما تجيش تانى . استعنا على الشقا بالله و راحت شايلة السجاجيد

خالد

يا نعم

انزل لى بأغنية و الله يا زمن