هاقتله و اخلص عليه كله الا امى

الجزء الأول

-----------------------

حوده يا حوده

ايوه يا امه نعم

يا ابنى قوم بقى انت هاتفضل متكوم على السرير كده لحد امتى

و النبى يا امه سيبينى فى حالى انا مش طايق نفسى

يا ابنى اتقى الله فينا و انزل شوف شغلك بقى

مش غاير فى حته سيبينى فى حالى بقى

اسيبك ايه الاسطى بتاعك وقف البت شيماء اختك و قالها انه لسه باقى عليك رغم اللى عملته

الله يقطع الاسطى على سنينه السودا و هى البت بنتك بتقف معاه فى الشارع ليه

هو اللى نده لى يا اخويا

و بتردى عليه ليه يا مقصوفة الرقبه انتى

يا ابنى و فيها ايه بس لما ترد عليه

و النبى يا امه تطلعى انتى منها و هو قالك ايه بقى الراجل ده

قالى قولى لحوده انى برضه باقى عليه و هانسى كل اللى عمله و انه مستنيك وقت ما تصفى تبقى تعدى عليه

يا اما نفسى اعرف ايه اللى حصل بينك و بينه و عمل فيك كده

اللهم طولك يا روح . يا ستى باقولك مش شغلك

خلاص انت حر . بس لازم تعرف ان البيت ما بقاش فيه و لا مليم و لا عايزنى اندار على رزق اخواتك البنات اللى بيشتغلوا علشان يجهزوا نفسهم

لأ يا ستى مش عايزك تندارى على حد انا هانزل اشوف اى سبوبة تجيب لى قرشين

يا ابنى سبوبة ايه بس ده انت ميكانيكى قد الدنيا و الأسطى بسيونى يتمنى لك الرضا ترضى

امه انا هاغور من البيت بدل ما اقوم اولع فى روحى

خلاص يا ابنى حقك عليا اعمل اللى انت عايزه ما انا علشان ابوك مات لازم افضل تحت رحمتك و تبيع و تشترى فيا و تذلنى بالقرش

من امتى و انا باعمل فيكى كده و من امتى و انا حارمك من حاجة يا امه حرام عليكى ما انا من يوم موت ابويا و انا شغال زى الماكنه ما باونش عشان اجيب لك طلباتك انتى و البنات

طب مالك بس يا ضنايا

مافيش يا امه

حوده يا حوده

ايوه يا سيد

انزل لى انا مستنيك على القهوة

حاضر

يا رب سيد يقدر يقنعه يرجع الورشة تانى

يا رب يا امه ده سيد ده واد ابن حلال قوى و بيحب حوده و بيخاف على مصلحته

نعم يا عين امك

ايه يا معلم هاتعقل و ترجع امتى

سيد اطلع انت منها و مالكش دعوه بالموضوع ده ما تخلينيش اقلب عليك انت كمان

يا ابنى الورشة محتاجاك و الزباين بيسألوا عليك

انا هاشوف حته تانية اقلب فيها عيشى

انت اتجننت يا حوده

طبعا اتجنن فى حد عاقل يسيب بيته اللى اتربى فيه

اسطى بسيونى

سيبنا لوحدنا يا سيد

حاضر يا اسطى

رايح فين يا حوده

باقولك ايه يا اسطى انا مش طايق اسمع صوتك سايق عليك النبى تسيبنى انا مش عايز اعمل حاجة اندم عليها عمرى كله

هاتعمل ايه يا حوده هاتضربنى يعنى

استغفر الله العظيم يا اسطى سيبنى بقى اغور فى داهية

لأ مش هاسيبك الا لما تقولى انت مش موافق على طلبى ليه

اوافق على ايه يا راجل انت

تجوزنى الحاجة يا حوده

يا نهار اسود انت اتجننت يا اسطى . عايزنى اجوزك امى

و فيها ايه يعنى

فيها ان امى مش للجواز . امى من يوم موت ابويا و هى عايشه ليا انا و اخواتى

طب انت سألتها يا حوده

من غير ما اسألها انا ادرى بامى يا جدع

طب خصيمك النبى لا تسألها و لو هى قالت لأ انا مش هافتح الموضوع ده تانى

ماشى يا اسطى و عشان اكسفك هاسألها قدامك

و انا موافق و عارف ان ربنا سبحانه و تعالى مش هايردنى مكسور الخاطر ان شاء الله

سلامو عليكم

و عليكم السلام

ادخلى يا بت الاوضه الاسطى بسيونى معايا

حاضر

اتفضل يا اسطى

يا رب يا ساتر . ربنا يجعل دخلتى عليكم سلق اخضر

سلق . امه يا امه

ايوه يا حوده

تعالى يا امه الاسطى كان عايزك فى كلمتين

ازيك يا ست ام محمود

نحمده و نشكر فضله يا اسطى هو الواد حوده عمل ايه مزعلك منه

حوده ده زى ابنى و عمرى ما ازعل منه ابدا

ما هو ده العشم برضه . ده انت فى مقام المرحوم ابوه

منى عينى و الله بس انتى ترضى

بتقول ايه يا اسطى

الاسطى يا امه عايز يتجوزك قولتى ايه

ايه . يتجوزنى انا

تنقلع لى عين من عينيا و اشوفك انا و انتى قاعدين فى كوشة واحدة يا ام محمود

كوشة ايه يا راجل انت ما تحسن ملافظك مع امى

عيب يا حوده . حد يكلم الاسطى بتاعه كده برضه

يعنى انتى مش سامعه كلامه يا امه

ماله كلامه الراجل ما طلبش الا حلال ربنا يعنى عداه العيب و قزح

تعيشى يا غاليه

غاليه ايه ؟ فى ايه يا امه ما تردى على الراجل ده

ارد اقول ايه بس يا ابنى هى المواضيع دى بيترد عليها بالكلام برضه

عندك حق الرد على كلامه عايز شومة يتهبد بيها على نافوخه

مش هو ده الرد اللى انا اقصده يا حوده

امال تقصدى ايه

باقصد السكوت

و السكوت علامة الرضا يا ست البنات

بنات ايه يا راجل يا مخبول الوليه دى مخلفه 5 مرات قبل كده

بس فى عينى و لا السفيرة عزيزة

الهى ربنا يجبر بخاطرك يا اسطى

امه انتى اتجننتى

ليه بس يا حوده

انتى عايزة تتجوزى و تسيبينا

و مين قال انى هاسيبكم ما انا هاجى اطل عليكم كل يوم مش كده يا اسطى

طبعا و طلباتهم كلها من عينى دى قبل عينى دى

الله ده انتوا متفقين بقى

انا اتفاقى كان معاك انت اننا نسأل امك و هى اللى تقول اه او لأ

ماشى يا اسطى . ماشى يا امه اتجوزى و اتهنى

يعنى انت موافق يا حوده

اتكلى على الله يا امه . بس خدى بالك اللى خدته القرعه تاخده ام شعر

تقصد ايه يا حوده

ما اقصدش يا اسطى . ربنا يتمم بخير

و بسرعه تمت الجوازة و اتنقلت العروسة لبيت العريس و الشهادة لله الاسطى بسيونى كان شايلها على كفوف الراحة و خصوصا و انه كان عايش لوحده من يوم موت مراته و كان بيعامل ولادها احسن معامله و ما بيبخلش عليهم بأى حاجة لأنه ماكانش عنده عيال

ايه يا عم مش هاتيجى الورشة بقى

لأ مش هاتنيل

بس الورشة من يوم الفرح و هى يوم تشتغل و اسبوع لأ و الاسطى غرقان فى العسل بقاله 4 شهور

ما تحترم نفس اهلك يا زفت انت

لامؤاخذه يا حوده و الله ما قصدت

و لا تقصد ما هى السبب فى اللى انا فيه ده كله خلت الحارة كلها بتتمألس عليا فى الرايحه و الجايه

يا ابنى هى عملت حاجة غلط دى اتجوزت على سنة الله و رسوله

و حياة ابوك تنقطنى بسكاتك مش ناقصاك الحكايه

طب الورشة هاتتفتح امتى

الهى تنفتح دماغك يا بعيد و انا مال أهلى ما تسأل المحروس صاحبها

الله ما انت كمان بقيت صاحبها دلوقتى و يا بخت من كان الاسطى جوز امه

قوم اخفى يا سيد من قدامى بدل ما البسك الترابيزة دى فى خلقتك

خلاص خلاص هامشى . سلام يا معلم

حوده قعد يفكر ينتقم من جوز امه ازاى و يحرق قلبه مالقاش غير حل واحد انه يولع فى الورشه

حوده اشترى جركن بنزين و استنى لحد الشارع ما بقى هس هس و ابتدى يرش البنزين فى كل حته فى الورشة و لسه هايولع فيها لقى زبون جاى

الحمد لله انى لقيتك فاتح

خير

مافيش عايزك تشوفلى العربية مالها و راح مولع سيجارة

حوده اتسمر فى مكانه و عينه على السيجارة اللى فى ايد الزبون خايف لا يرميها و تولع الورشة و هما فيها

اطفى السيجارة دى و خد عربيتك و ارحل من هنا

فى ايه يا اسطى و ايه صحيح ريحة البنزين دى

مافيش يا سيدى و اتكل على الله بقى

و لسه الراجل هايرد عليه لقى ورديه معديه راح جرى على الظابط و حكى له على ريحة البنزين اللى فى الورشة

و الظابط دخل الورشة و حوده اعترف انه كان ناوى يحرق الورشة عشان يحرق قلب الاسطى بسيونى

طبعا الظابط خد حوده على القسم و بعت للأسطى بسيونى و حكى له على كل حاجة

مش مشكلة يا بيه حوده ده ابنى

يعنى ايه

يعنى انا متنازل عن حقى

حوده بص للأسطى بسيونى و هو مكسوف قوى من نفسه و فجأه لقى امه داخله عليه القسم و هى بتنهج

انتى ايه اللى جابك يا حمديه

يعنى عايزنى اسمع ان حوده فى القسم و اقعد ساكته

مش الدكتور قالك بلاش حركة علشان اللى فى بطنك

اللى فى ايه . فى بطنها

اه يا حوده ما انا حامل يا حبيبى

حامل يا امه

اه حامل و فى توأم كمان عقبال مراتك فى بيتك يا حوده

توأم اثبت يا حضرة الظابط امى حامل

و فيها ايه يا روح امك هى قاصر

فيها انى هاقتل الراجل ده

يا نهار اسود

و بسيونى طلع يجرى و حوده بيجرى وراه و وراهم حمديه

على مهلك يا حمديه علشان عمر و سلمى

عمر و سلمى مين

ايه رأيك فى الاسامى دى يا حوده انا اللى مختارها

حرام عليكم مش كفايه الجواز كمان هاتخلفى يا امه





---------------------------------------------

الجزء الثانى

-----------------------

حوده حوده

عايزة ايه يا بت

قوم بسرعه

فى ايه

عم بسيونى نده عليا بيقول ان امى محجوزة فى المستشفى من الفجر و هاتولد كمان شوية

طب و انا مال اهلى هاروح اسخن لها المية

حرام عليك يا حودة دى امك برضه و لازم نكون كلنا جنبها دلوقتى

استغفر الله العظيم

قوم يا حودة استهدى الله بقى و خلينا نروح لها

هو قالك فى انهى مستشفى

فى المستشفى اللى فى الميدان

طب خلاص يالا بينا

حودة انت جيت يا ابنى دى امك هاتفرح قوى

هى امى فين يا عم بسيونى

فى الاوضة ادخلوا لها يا بنات

هى امى هاتولد امتى يا اسطى

انت برضه مش هاتقول لى يا عمى زى اخواتك

عمى ايه عما الدبب

الله يسامحك يا حوده . يا ابنى ده انا خلاص هابقى ابو اخواتك

يا راجل انت ما تطلعش ظرابينى عليك احسن لك

طب خلاص لا ده وقت و لا مكان نتخانق فيه

حمدية خارجة على اخرها و البنات مسندينها

ازيك يا حوده

ازيك يا امه عاملة ايه

بخير يا حبيبى مادام شوفتكم

يالا يا ستى دكتور التخدير مستنيكى

على مهلك عليها و النبى

هى يعنى اول مرة يا بسيونى ما تخافش

بالنسبة لى اول مرة يا حب عمرى

حوده واقف على جنب سمع اتنين ممرضات بيتريقوا عليهم

انا عايزة افهم الوليه المجنونه دى طموحها ايه فى الخلف تانى

يا ستى ما انا احنا بقينا فى زمن المعجزات خلاص

على رأيك كل شىء جايز حتى حمل العجايز

حمدية دخلت العمليات و بعد ساعة طلعت الممرضة

حمد الله على سلامة المدام

الله يسلمك جابت ايه يا بنتى

ولد و بنت زى القمر

الله اكبر عمر و سلمى وصلوا بالسلامة

طب و حمدية عاملة ايه

زى الفل ما تقلقش هى صحيح غلبتنا على ما اتبنجت لكن تمام

الحمد لله

يتربوا فى عزك يا حاج

ربنا يخليكى

و الممرضه واقفه مش عايزة تتحرك

فى حاجة يا بنتى

ما تقب يا راجل بأى حاجة حلاوة الكتاكيت

لامؤاخذه الفرحة نسيتنى و اداها اللى فيه النصيب

و اول ما حوده اطمن على امه روح و سابهم فى المستشفى من غير ما يدخل لها

على فكرة امك زعلت قوى لما ما دخلتلهاش بعد ما فاقت

خليكى فى نفسك يا بت

بس اسكت يا حوده الواد عمر و البت سلمى زى القمر

طيب . هى البت سميرة فين

قاعدة مع امى فى المستشفى

و هو المحروس جوزها فين

روحنا و رجع لهم هايبات معاهم و يجيبهم الصبح

ماشى

حودة كنت عايزة اطلب منك حاجة

عايزة ايه

انا و البنات عايزين نروح نقعد مع امى لحد ما تربعن

نعم يا اختى

و النبى يا حودة دى لسه نفسه

انا يا بت انتى مش قولت لكم مافيش واحدة فيكم هاتبات فى بيت الراجل ده

طب و امك اللى لسه فاتحه بطنها دى هاتعمل ايه لوحدها

خلاص روحوا لها بالنهار بس بالليل يبقى سبع البرومبه يخللى باله من عيالة

بس يا حودة

مش عايز اسمع كلمة زيادة فى الموضوع ده انتى فاهمة و لا لأ

حاضر بس كده حرام و الله

حرمت عليكى عيشتك روحى اتخمدى و سيبينى انام انا كمان

حمدية طلعت من المستشفى و حودة طبعا ما راحش زارها فى البيت

برضه مصمم ما تحضرش السبوع يا حوده

سبوع ايه اللى هاحضره هاروح اعمل ايه فى السبوع هادق لهم الهون و لا هامسك الشمع و ادور بيه زى العيال

علشان خاطر امك الغلبانه مش كفايه ما شافتش وشك من يوم الولاده

هى مش مكسوفه من نفسها و النبى هما ليهم نفس يعملوا سبوع

الله و ما يعملوش ليه بقى

و هى ان شاء الله هاتعمل ايه فى السبوع هاتقدر تخطى على المحاريس دى الخشونة واكله ركبها

يا ابنى حرام عليك ما تتكلمش كده على امك

يا شيخة غوروا انتوا بس روحوا السبوع بس ما تتأخروش

تانى يوم حودة قاعد على القهوة لقى الاسطى بسيونى بيفرق السبوع على اهل الحارة

حمد الله على السلامه يا اسطى بسيونى و هى ام حودة جابت ايه بقى

ربنا راضانا بعمر و سلمى

ما شاء الله ما شاء الله ما هو الدهن فى العتاقى برضه

طبعا حودة اول ما سمع الكلام ده قام مشى بسرعه من القهوة و سيد وراه

هو ماله الواد ده يا ابو عمر لايكون خايف لحسن يخش الجيش

لأ ما تقلقش هو عارف انه كده كده مش هايدخل اصله عنده فلات فوت

هما اخواتك حلوين يا حودة

سيد اصطبح و قول يا صبح

طب انت هاترضى عن امك و الاسطى امتى بقى و تبيض قلبك من ناحيتهم

هى عايزة منى ايه بقى مش خلاص اتجوزت و خلفت تسيبنى فى حالى بقى

حودة روح البيت لقى امه قاعده له

حمد الله على السلامة يا امه

كده برضه يا حوده ما تجيش السبوع بتاع اخواتك على العموم انا جبت لك السبوع و جبت لك اخواتك تشوفهم

امه انا لا عايز سبوع و لا عايز اشوفهم

براحتك يا ابنى

و دخل اوضته لقى امه منيمة العيال على سريره و دخلت وراه

يا حوده حرام عليك دول اخواتك برضه و بعدين دول بكرة مش هايبقى لك غيرهم بعد ما انا و ابوهم نقابل وجه رب كريم

بعد الشر عليكى يا امه . خلاص اوعدك اخللى بالى منهم بس اتكلوا انتوا على الله و اعملوها

كده برضه يا حودة ده بدل ما تقولى يتربوا فى عزكم يا امه

عز ايه يا امه قولى يتربوا بمعاشكم

ماشى يا حوده طب ايه رأيك بقى انى بافكر سنتين تلاته كده يكونوا شدوا حيلهم و عودهم يخضر و اروح مخاوياهم على طول

عايزة تخاويهم كمان يا امه

اه اصل بسيونى نفسه فى واد تانى و يسميه ابو تريكة

ابو تريكة . هو انا كنت خلصت من عمر سلمى لما تجيبى لى ابو تريكة كمان خدى عيالك و اطلعى بره يا امه