انى فى كل مرة هاحط موقف معين ينطبق عليه مثل من الأمثال الكتير اللى بنرددها
اصلى بحب أسمع الامثال جدااااااااااا و حياة خالتى ستوتة اللى ماتت متقطعه فى حادثة موتوسيكل
-----------------------------------------
-----------------------------------------
-----------------------------------------
الموقف الأول
أحمد انا زهقت بقى من الفيفا دى
مش انتى يا شيماء اللى قلتى لى علمنى و هالعب معاك
زهقت بقى ماليش دعوه
طب عايزة ايه يا حبيبتى
باقولك ايه تيجى نلعب كوتشينة
كوتشينة
أه علشان خاطرى يا حماده و نلعب الشايب
الشايب ماشى بس هايبقى فيها احكام
مش مشكلة ان شاء الله اكسبك
اما نشوف يا جامد
و خلص الدور بهزيمة شيماء
الحكم بقى يا شوشواحكم يا سيدى
صينية مكرونة بالباشميل
ايه
انت عارف الساعه كام دلوقتىماليش دعوة هاتعشينى مكرونة بالباشميل
حمادة شوف لك حكم تانى ما تبقاش رخم
هو كده انتى مش قلتى نلعب شايب و هاتتحملى الحكم اشربى بقى
ماشى يا احمد بس قبل ما اقوم اعملها نلعب دور تانى
و ماله نلعب بس المرة دى الدور هايبقى على صينية كيك بالبرتقال
العب بس انت و ما تقاطعش ان شاء الله المرة دى انا اللى هاكسب
و فعلا شيماء اللى كسبت المرة دى
شوشو حبيبة قلبى
مفيش حبيبة قلبى الحكم بقى انك تغسل كل المواعين بتاعة صينية المكرونة
شيماء انتى عارفه انى عمرى ما غسلت مواعين قبل كده اقولك خلاص يا حبيبتى انا مش عايز مكرونة
لأ هاعملها و انت هاتغسل المواعين
بقى كده طب و ماله ايه يعنى شوية اطباق مكان المكرونة
لأ يا حبيبى شوية اطباق ايه
دى حلة للباشميل و حلة للحمة و حلة لسلق المكرونة غير الكبة و الملاعق
شوشوانا قايمة اعمل المكرونة
و انا هاقوم العب لى دورين فيفا على ما تخلصى و اجى اغسل المواعين
مرت ساعه و احمد قلق على شيماء و قام يشوفها فى المطبخ لقاها بتغسل المواعين
بتعملى ايه يا شيماء احنا مش قلنا المواعين عليا انا
لا يا حبيبى روح انت العب و انا هاخلصهم
شيماء الطبق اللى على المطبخ ده مكانه ايه
الكيك
انتى عملتى كيك كمان
طبعا يا حبيبى مش نفسك فيها
خلاص يا شوشو روحى انتى ارتاحى و انا هاشطب المطبخ
لا روح العب و انا هاخلص بسرعه
لا يمكن ابدا انتى لازم ترتاحى و انا اللى هاشطبه
خلاص زى ما تحب اروح انا بقى اخد دش
احمد صحيح كنت هانسى
نعم
ما تفتحش على الكيك علشان ما تهبطش زى كل مرة
حاضر
و الحمد لله انى دخلتها الفرن قبل ما تاكل منها و هى نيه
مش بادوقها علشان لو محتاجه سكر يا سكر
احمد ابتدى يغسل فى المواعين و فجأه جرس الباب رن بيبص من العين السحرية لقى مامته اللى ساكنه معاهم فى نفس البيت
جرى بسرعه قلع مريلة المطبخماما اتفضلى يا حبيبتى
ازيك يا حماده
اهلا يا ماما
باقولك يا حبيبى كنت عايزة كيس لحمة من اللى شايلاهم عندكم فى الفريزر ما انت عارف الديب فريزر بتاعى باظ
حاضر يا ماما هاجيبه لك حالا
لا استنى انت انا اللى هاجيبة علشان عايزة كيس كبير
اتفضلى يا ماما
ايه ده
فى ايه يا ماما خير
الحوض ماله يضرب يقلب كده و بعدين مراتك فين
فى الحمام بتاخد دش
بتاخد دش و سايبة المطبخ بالمنظر ده
احمد واقف مبلم مش عارف يرد على مامته لقى شيماء بتنده عليه من بره
شطبت المطبخ يا حماده
لا لسه يا اختى ما شطبهوش
طنط
ايوه طنط يا حبيبتى مطبخ ايه اللى عايزة الراجل يشطبه و هو شقيان طول اليوم و طلعان عينه علشان يكفى مصاريفك و طلباتك ايه مش مكفيكى تعبه و شقاه بره كمان هاتشغليه خدام عند سيادتك فى البيت
كفايه يا ماما لو سمحتى انا اللى قلت لشيماء انى هاشطبه لانها كانت تعبانه
تعبانه ما هى زى القرده اهى و لابسه و متهيأه ايه يا حبيبتى انتى عايزة تلبسى و تتزوقى و ابنى يشتغل بلدالك
يا طنط و الله ده كان بيساعدنى بس
يعنى ايه بيساعدك هو احنا جايبينك من بيت ابوكى و مدينك راجل طول بعرض علشان يخدم جنابك
كفايه بقى يا طنط لو سمحتى
كفايه ايه هو انا لسه قلت حاجه بصى يا بنت الناس من اولها كده علشان نبقى على نور احنا ما عندناش رجاله بتخدم مراتاتها عاجبك على كده عاجبك مش عاجبك يبقى لينا كلام تانى
ما تقول حاجه يا احمد انا ساكته علشان خاطرك
يا ماما ما يصحش كده
اسكت انت خالص هو ايه اللى ما يصحش النهارده تخليك تشطب المطبخ بكرة اطلع الاقيك بتسيق البلاط
و ماله لما يساعدنى يعنى مش جوزى
لا يا حبيبتى مفيش عندنا الكلام ده لو كانت الست مامتك بتعمل كده فى البيه ابوكى فلازم تعرفى اننا حاجه تانية و رجالتنا رجاله بجد مش زى ناس
هى حصلت تجيبى سيرة بابا و ماما طب و الله ما انا قاعده لك فى البيت يا احمد
يا شوشو استنى بس اعقلى هاتسيبى البيت دلوقتى
ايوه و لما تبقى تعقل الست مامتك ابقى تعالى لى بيت بابا
عاجبك كده يا ماما
اتنيل على عينك بكرة ترجع و رجلها فوق رقبتها و بعدين احنا لازم نعودها على طبعنا من الأول و كله علشان مصلحتك يا عبيط
بس يا ماما
ما بسش ايه ده فى ريحة حاجة بتتحرق
بيفتح الفرن لقى المكرونة و الكيك اتحرقوا
تمت
و المثل
( قال يا قاعدين يكفيكوا شر الجايين ) -----------------------------------------
-----------------------------------------
-----------------------------------------
الموقف الثانى
ماما
ايوه يا مسعد
انا نازل الانترفيو
ربنا معاك و يوفقك يا حبيبى و يوقف ولاد الحلال و ييسر لك امورك و يجعل اليابسه فى ايدك خضرا و يخبز لك العيش
ايه كل ده
شوية دعوات تفتح لك البيبان المقفله اصلها معصلجة معاك اوى
ربنا يخليكى ليا يا ماما و دعواتك دى تيجى بفايدة
ان شا الله يا حبيبى
و راح مسعد على الانترفيو
المدير هايقابلكم حالا
و دخل اول واحد و بعديه التانى و مسعد كان الأخير
اتفضل يا أستاذ
انت كاتب فى السى فى بتاعك انك دفعة 2002 كنت بتعمل ايه بقى الـ 8 سنين اللى فاتوا
مفيش يا فندم اتخرجت من الكلية و روحت اخدت شهادة تأجيل من الجيش 3 سنين و بعد كده اشتغلت فى شركة لمدة الـ 3 سنين دول و قالوا لى بعد ما تاخد الاعفاء هانثبتك روحت علشان اجيبها لقيتهم بيقولوا لى انى هادخل الجيش
بعد تأجيل 3 سنين . الموضوع ده ما بيحصلش كتير
لاجل حظى انا حصل المهم بعد ما خلصت السنه جيش جيت ارجع الشركة تانى لقيتها فلست و قفلت
المدير كان بيشرب قهوة بيحطها على الترابيزة راحت واقعه على عقود صفقة مهمه فبص لمسعد بصه لها مغزى و قاله
بقى قلت لى الشركة فلست
اه يا فندم
طب كمل عملت ايه بعد كده
مفيش نزلت مسكت المحل بتاع ابويا بس بعيد عنك الضرائب حجزت علينا و ابويا مات بحسرته
اه
بعد كده اتعلمت السواقه و اشتغلت على تاكسى بس ربنا ما يوريك عملت حادثه و التاكسى اتدشدش و لسه باسدد فلوس تصليحه لصاحبه و من ساعتها و انا باحاول اشتغل
طب انت كاتب ان عندك خبرة فى الصيانة مش كده
اه طبعا يا فندم ده أساسا تخصصى و الشركة اللى كنت شغال فيها كنت ماسك قسم الصيانة
طب بص كده ممكن تعمل ايه فى الكمبيوتر اللى قدامك ده
و قعد مسعد يفك فى الجهاز و يظبطه و فعلا الجهاز اشتغل
و لسه المدير هايتكلم معاه فى تفاصيل الوظيفه لقى تليفون من اخوه بيقوله ان باباه نقلوه للمستشفى علشان جت له أزمة قلبية و فى نفس ذات اللحظة لقى الكمبيوتر بيدخن و راح مفرقع
فنده للسكرتيرة و قالها وزعى البنى ادم اللى جوه ده
و مسعد ما قدرش يروح البيت بعد ما فهم من كلام السكرتيرة معاه انها بتزحلقه و راح لعماد صاحبه
خلاص يا عمده انا زهقت
وحد الله يا مسعد فى ايه تانى
لا اله الا الله محمد رسول الله فيه انى لسه جاى من انترفيو جديد و برضه ما اتقبلتش
ليه بس
الراجل قاعد باعمل الانترفيو معاه جاله تليفون ان ابوه نقلوه للمستشفى و الجهاز اللى كنت باعمل عليه الاختبار فرقع
عادى يا مسعد كلها حوادث عادية و ممكن تحصل ابوه اكيد عيان و الكهربا اكيد فيها حاجه بلاش تحط فى دماغك الحاجات دى
يا عماد الراجل بص لى بصه معناها انى نحس
علشان متخلف بلاش تصدق الموضوع ده على نفسك علشان ما تتعبش
احنا هانضحك على نفسنا يا عماد ما انت عارف اللى فيها ابويا و مات بحسرته بعد ما مسكت له المحل بشهر
و البنت الوحيدة اللى حبيتها يوم ما روحت اقابل ابوها علشان اخطبها وقعت من البلكونة و هى بتلم الغسيل
و فاكر ساعة امتحانات الاعدادية لما جات لى الحصبة و اضطريت ادخل ثانوى صنايع
بس كنت من المتفوقين
يا فرحتى ما انا جيت فى سنة تالته و عملت الزايده قبل الامتحان باسبوعين و ما عرفتش ادخل كلية الهندسة زى ما الكل كان بيتوقع لى
و ساعة امتحانات البكالوريوس لما حصبت للمرة التانية و دى حاجة ما بتحصلش غير نادرا ان البنى ادم يحصب مرتين و فى السن ده
يا راجل ده الدكتور ساعتها قال لابويا ابنك ده منحوس يا حاج
برضه عادى لازم يبقى عندك ثقة فى نفسك اكتر من كده بص انا عندى واحد صاحبى كان بيقول ان الشركة اللى شغال فيها عايزة افراد امن ايه رأيك اكلمه لك
كلمه
الو ممكن اكلم محسن لو سمحت . ايه
طب متشكر اوىايه مات
لأ امبارح اتقبض عليه علشان خبط واحد بعربيته
يا ابنى ما انا قلت لك المنحوس منحوس
و فجأه لقوا ام عماد بتصوت
يالهووووووووووووى الحقنى يا عماد
و خرجوا الاتنين جرى
فى ايه يا ماما
الأنبوبة ولعت و انا باعمل لكم الشاى
و قبل ما عماد يبص لمسعد كان مسعد واخد ديله فى سنانه و طاير
و قعد مسعد يلف فى الشوارع كتير و بعد كده قرر يروح بيتهم لقى مصطفى ابن خالته نازل من عندهم
كويس انى لقيتك يا مسعد
عايز ايه يا مصطفى
تعالى معايا انا رايح فرح أخت واحد صاحبى حتة فرح بقى من الاخر
لأ الله يكرمك ماليش نفس اروح فى اى حته
يا راجل هانروح نهيس شوية و تفك عن نفسك
و فى الفرح ابو العروسة راجل صعيدى و فرحان ببنته و ضرب النار ابتدى
مسعد قال لمصطفى ايه ضرب النار ده
ما تخافش دى مسدسات صوت
يا راجل
طبعا امال مفكر ايه هايضربوا نار بجد
و فجأة الميكروفون باظ
و اخو العروسة جه لمصطفى يقوله ما تعرفش حد بيفهم فى الصيانة الميكروفون باظ
مسعد تطوع و قاله انا بافهم فى اجهزة الصوت فين المايك
متعلق عندنا فوق تعالى معايا
و طلعوا فوق يصلحه و هو واقف بيصلحه لقى المعازيم ابتدوا بيضربوا نار
و اخو العروسة قاله ادخل جوه بسرعه على ما ضرب النار يخلص لحسن حاجة تيجى فيك
ليه يا عم هو مش رصاص فشنك
لأ مش فشنك ده بجد
و قبل ما يكمل كلامه كانت الطلقة جات فى مسعد و الناس اتلمت عليه و الفرح باظ
تمت
و المثل
( قلت للنحس انا رايح اتفسح*قالى وراك وراك هو انا مكسح )-----------------------------------------
-----------------------------------------
-----------------------------------------
الموقف الثالث
يا بابا انت لازم تشوف لى حل خلاص ابو مها خطيبتى قالى لو ما اتصرفتش فى موضوع الشقة هايفسخ الخطوبة
خلاص يا خالد كلها شوية و عمرو خطيب اختك يوصل و نشوف هايستلم الشقه بتاعته امتى و نحدد ميعاد لفرح اختك و بعدها نبتدى نوضب الشقة
انت لسه مصمم برضه على اللى هاتعمله يا ابو خالد
انتى شايفه لها حل تانى يا ام خالد
بس انت كده هاتخنقنا و هاتخنقهم
فى ايه يا ماما حرام عليكى ده انا ما صدقت اقتنع و بعدين ما انتى كنتى موافقة
يا حبيبى و الله انا عامله عليك اكتر ما عامله علينا هاتبقى عايش فى حق مش شقة
يا ماما يعنى انا كنت لقيت غيرها و قلت لأ
خلاص بقى يا ام خالد الخيرة فيما اختاره الله و بعدين الواد لو قعد عمره كله يشتغل مش هايقدر يجيب شقة
هو زى ما اتفقنا هانقسم الشقة بينا و بينه و نعمل له باب مستقل ليه لوحده
اوضة اميرة نفتحها له على الصالة الصغيرة و تبقى ريسيبشن
و اوضته يعملها اوضة نوم
و ياخد الحمام الكبير و يبقى يعمل الطرقة مطبخ
و احنا كفايه علينا اوضة نومنا و الصالة الكبيرة و المطبخ و الحمام الصغير
خلاص اللى تشوفه ربنا يهنيك يا ابنى و يسعدك انت و اختك
ترن ترن ترن
تعالى شوفى مين يا اميرة
حاضر يا بابا ده تلاقيه عمرو
عملت ايه يا عمرو
الحمد لله يا عمى روحت دفعت عربون لصاحب العمارة و هانستلم اول ما نكمل ثمن الشقة
طب و هاتجيب باقى الفلوس ازاى
ما انا سافرت لابويا البلد و هو قالى انه هايبيع اخر حتة ارض فاضله عندنا و هايدينى ثمنها علشان الشقة
و الكلام ده هايبقى امتى
على اخر الشهر ان شاء الله بس الفلوس اللى هاتيجى مش كتير علشان كده احنا هانختصر شوية فى العفش يعنى واحده واحده و بكرة نجيب كل اللى نفسنا فيه
و ماله يا ابنى المهم انكم تتلموا فى اربع حيطان و خلاص علشان نفضى بقى للأستاذ ده و نجوزه
ان شاء الله يا عمى
و فعلا بعد شهر كان عمرو جايب باقى الفلوس و دافع ثمن الشقة و اضطروا يجيبوا عفش فى اضيق الحدود لأن والد اميرة ماقدرش يساعده بأى فلوس زيادة
و بعدها بشهر تانى كان الفرح
بعد الفرح باسبوعين قاعدين بيتفقوا هايعملوا ايه فى الشقة
خلاص يا بابا هاتقبض المكافأة الأسبوع الجاى
ان شاء الله
يعنى اتفق مع الصنايعية اللى هاييجوا يشتغلوا فى الشقة
اه يا سيدى اتفق و قول لابو خطيبتك كمان يعمل حسابه ان الفرح هايبقى كمان شهرين بالكتير
و الله يا خالد لولاك انت ما كنت رضيت اجوز اختك سلق بيض كده و على عفش اى كلام
يا ام خالد خلاص بقى اهو منها سترناها و اطمنا عليها و منها ناخد اوضتها لأخوها
ترن ترن ترن ترن
مين اللى هايجيى لنا دلوقتى
مش عارفه قوم يا خالد شوف مين
ايه ده
اميرة ايه اللى فى ايدك دولالحقنى يا بابا
فى ايه يا بنتى جوزك طلقك و لا ايه
لأ يا بابا دى العمارة بتاعتنا
مالها
جابوا لصاحبها قرار ازاله للدورين الاخرانين اللى فيهم شقتنا علشان اتبنوا من غير ترخيص
و جوزك فين
طالع ورايا بس بيجيب باقى الشنط
تعالى يا ابنى ادخل ايه اللى حصل ده
انا اسف يا عمى و الله ما كنت اعرف انه نصاب
طب و العمل دلوقتى
و الله انا وشى منكم فى الأرض يا جماعة
يا ابنى و انت ذنبك ايه بس فهمنى ناوى تعمل ايه
هانبلغ ضد صاحب العمارة بس حضرتك عارف ان الموضوع ده بياخد وقت
و انا ناوى ان شاء الله اشتغل بكل جهدى و ادبر فلوس عقد عمل و اسافر اى بلد و ابعت اخد اميرة
و حضرتك عارف ابويا ما بقاش معاه حاجه يديها لى و العفش مش هايجيب حاجه طبعا
و بعد اذنك يا بابا انا هاقعد انا و عمرو فى اوضتى الفترة اللى جايه لحد موضوع السفر ده
ما هو مش هاينفع نسافر نقعد فى البلد عند باباه علشان الشغل
و مفيش فلوس نجيب بيها شقة ايجار جديد حتى
و ما تقلقش يا عمى الفترة مش هاتطول كلها 7 , 8 شهور او سنة بالكتير على ما ادبر فلوس العقد
اه يا ابنى و ماله تشرفوا و تنوروا خد الشنط و دخلهم اوضة اختك يا خالد
حاضر يا بابا
تمت
و المثل
( جوزناها علشان تتاخر * راحت و جابته راخر )-----------------------------------------
-----------------------------------------
-----------------------------------------
الموقف الرابع
أسماء يا أسماء يا أسماء
قومى يا أسماء ردى على جارة الهنا
معلش يا حبيبى هارد عليها و اجيلك حالا
فى ايه يا علا
حسن جوزى راح الشغل خلاص و انا باحضر فى الفطار تعالى نقعد مع بعض شوية
لأ اصبرى علشان على لسه ما نزلش
ماشى هاستناكى
لأ بصى هاتى انتى الفطار و تعالى نقعد سوا عندى
و ماله زى ما تحبى اول ما جوزك ينزل رنى لى على طول و انا انزلك
ماشى
.............................................
الهانم كانت عايزة ايه بقى
مفيش يا على عايزانى اطلع افطر معاها
انا مش منبه عليكى ما تطلعيش عندها تانى و تسيبى البيت
و الله قلت لها تنزل هى
ماشى يا أسماء بس على الله اجى مالاقيش غدا زى المرة اللى فاتت
لأ يا حبيبى خلاص مش هاتتكرر تانى بس انا هاعمل ايه هى اللى كل يوم عايزانا نقعد مع بعض علشان بتزهق من القعدة لوحدها
انا مش معترض بس ما ينفعش تفضلى قاعدة معاها اليوم كله و فى الاخر ارجع مالاقيش اكل
ما انا قلت لها تنزل هى و انا هاشتغل فى البيت و هى قاعدة معايا
كده احسن برضه
.............................................
و بعد ما على راح الشغل علا نزلت علشان تقضى اليوم مع أسماء
علا خليكى ثوانى هاقوم اجيب الحاجه من المطبخ اتسلى فيها و احنا قاعدين بنتكلم
و ماله يا حبيبتى قومى
معلش يا علا هاقوم اشوف الحاجة اللى على النار
و ماله يا اختى قومى
انتى مش غريبة بقى يا علا هاقوم اجيب المكنسة و انضف الشقة
و ماله
ثوانى بس يا حبيبتى هاغير ملاية السرير و جاية لك حالا
زى بعضه يا اختى
بصى يا علا هاسيبك ربع ساعة بس هاقوم اخد شاور و اجيلك ده بيتك و طرحك طبعا
مش مشكلة يا حبيبتى النضافه حلوة برضه
أسماء موبايلك رن و انتى فى الحمام
اه ده تلاقيه على بيرن لى علشان اعرف انه قرب يوصل
ليه هى الساعة بقت كام دلوقتى
6 و نص ياه ده الكلام خدنا و ما حسيتش بالوقت ده انا حتى ما عملتش غدا و حسن زمانه راجع من شغله
يبقى تجيبى حسن و تيجوا تتغدوا معانا النهارده
لأ ازاى ما يصحش هو لما يجيى يبقى ينزل يجيب اى حاجه جاهزة و خلاص
ايه ده حسن بيرن عليا شكله رجع انا هاطلع بقى
ماشى يا علا نورتينى و الله
.............................................
ازيك يا حسن
انتى كنتى فين يا هانم
كنت تحت عند أسماء
بتعملى ايه عند الست أسماء
الله قاعده معاها شوية بابقى زهقانه و بانزل اتسلى عندها
طب حضرى لى الغدا بسرعة على ما ادخل اغير هدومى علشان هاكل و انزل تانى رايح مشوار مهم
الغدا
اه الغدا يا ست علا
اصل يا حبيبى انا من الصبح قاعدة مع أسماء و ما عملتش غدا
تانى لأ تانى ايه ده عاشر انتى ايه ما بتحرميش كل يوم على الموال الاسود ده
مرة أسماء كانت عندى و ما عملتش اكل
مرة انا عند أسماء و ما عملتش اكل حرام عليكى يا شيخة انتى ايه عايزة تجننينى
الوقت سرقنا و الله يا حسن
الوقت سرقكم طب و يا ترى بقى الست أسماء هى كمان ما عملتش غدا
لأ بصراحة عملت
طبعا انتى قاعدة بترغى زى الهبله و هى بتعمل غدا لجوزها منك لله يا علا انا هاروح اتغدا عند امى
تمت
و المثل
( الشاطرة تعمل حاجتها و الخايبة تقعد تحدتها ) -----------------------------------------
-----------------------------------------
-----------------------------------------
الموقف الخامس
باقولك يا ام محمد عايزين نشوف عروسة لعصام ابنى
عصام
اه عصام مالك اتخضيتى كده ليه
مفيش بس انتى عارفه ان عصام ابنك يعنى
يعنى ايه يا ام محمد الواد ماله ما هو زى الفل
اه طبعا يا اختى ما قلناش حاجة طب هو لقى شغل
شغل ايه ده ماشاء الله عينى بارده عليه واقف مع ابوه ماسك له المحلات و ايه بقى مخلى العمال ماشيين على العجين ما يلخبطوش
عصام
اه يا وليه عصام حتى اسألى
طب و الله الف مبروك ان ربنا صلح حاله
يعنى هاتشوفى له عروسة تبقى بنت حلال و متربية
اشوف له يا اختى العرايس كتير
-----------------------------------
عصام
ايوه يا ماما عايزة ايه
قوم يا حبيبى علشان تنزل المحل
يادى المحل و سنين المحل باقولك ايه يا ماما انا لسه مخمود من شوية مش ناقص قرف المحل ده سيبينى نايم الله يسترك علشان بجد لو قومت و نزلت ممكن اقتل حد من الزباين الهم
لا و على ايه يا حبيبى نام نوم العوافى
-----------------------------------
المحروس ابنك الحيلة فين
نايم يا ابو عصام
ابو عصام قولى ابو الخيبة ابو الوكسه
ما تقولش على الواد كده تف من بقك ده انا ابنى زينة الشباب و زى الفل
الهى يعملوه زينة رمضان و يعلقوه فى الشارع يا بعيده
يا وليه انتى مش شايفه خيبة ابنك
علام و ما فلحش فيه حتى حتة الدبلوم ما عرفش ياخده
المحل و لولا ان ايدى فيه كان زمانه جايب درفه من زمان
ده غير انه صايع و فلاتى و مبصبصاتى و كل يوم بتجيلى منه مشاكل تملا دفتر محاضر
لا بجد اخص عليك يا ابو عصام ما تقولش على الواد كده ده بكرة هايبقى سندنا انت ناسى اننا ما جيبناش غيره
ياما جاب الغراب لامه يا ريتك كنتى بركتى عليه اول ما ولدتيه خلفة الندامه ده
بعد الشر ان شا الله عدوينه
طب و تدعى على الشعب المصرى كله ليه هو فيه حد بيطيقه غيرك ايه عايزة تخلصى على الدنيا كلها و تقعدى انتى و هو لوحدكم فيها
بس بقى يا ابو عصام و الله هازعل منك كده و بعدين انا عايزاك فى موضوع مهم
خير استر يا رب
كنت عايزة اجوز عصام
تجوزى مين يا اختى و ده هايتجوز ازاى ان شاء الله حيلته ايه يفتح بيه بيت
الله فيه ايه يا راجل ما ربنا يخليك ليه
ربنا ياخدنى و يريحنى منك و منه ان شاء الله
بعد الشر عليك هو احنا لينا غيرك يا اخويا و بعدين ده يوم المنى لما نشوفه عايش و متهنى مع مراته و يجيب لنا شوية عيال كده نفرح بيهم
يا ستى انا عامل على بنت الناس اللى عايزة تبهدليها مع الفاشل ده هايبقى ذنبها ايه بس
تتبهدل ليه ان شاء الله ده انت بكرة هاتشوف عصام ده لما يتجوز هايبقى زى الفل و لا حد هايبقى زيه صدقنى يا ابو عصام الواد لو استقر و شال مسئولية هايبقى كويس
خلاص اللى تشوفيه بس لازم تعرفى انى مش هاتصدر له فى حاجة
يعنى ايه ان شاء الله هاتسيب الواد يروح لوحده للعروسة
ايوه تروحى انتى و هو و لما اهل العروسة يبقوا يسألوا على البيه و يوافقوا عليه ابقى اروح لكن قبل كده مش هاكسف نفسى انا مع ابنك اللى سيرته زى الزفت ده
ماشى يا ابو عصام اقعد طلع اشاعات على الواد كده
لما انت ابوه و بتقول عليه كده عايز الغرب يقولوا عليه ايه
ده انا ابنى زى الفل و احسن الناس و بكرة ست البنات هاتبقى من نصيبه ان شاء الله و هاتشوف
بكرة الساعه كام يا ام النطع
-----------------------------------
لقيت لك بقى عروسة زى الفل يا ام عصام
بجد يا ام محمد طب فرحينى يا اختى
بنت زى القمر و متعلمة و ابوها و امها ولاد حلال و مالهمش فى المشاكل خالص
ربنا يكرمك يا ام محمد و يتمم على خير ان شاء الله
شوفى بقى عصام و شوفوا ميعاد يناسبكم علشان اقول لام العروسة
قولى لها بكرة ان شاء الله الساعه 8
-----------------------------------
و فعلا ام عصام خدت الأخ عصام و راحوا الميعاد و الرفض كان من نصيبه لأن البنت شافت انه عيل اهبل و سطحى
و بعد كده توالت العرايس و كل عروسة يا اما ترفض بعد ما تقعد مع المحروس يا اما يترفض بعد ما يسألوا عليه و يعرفوا سمعته اللى زى الخنفسه الدكر فى اوضه ضلمه
-----------------------------------
مش انا قلت لك انك صعب تلاقى عروسة للأستاذ
باقولك ايه يا ابو عصام انا هاسافر البلد بكرة ان شاء الله
ليه
هاشوف له عروسة من هناك البنات هناك على قفا من يشيل
بص برضه الوليه حرام عليكى بنات الناس ذنبهم ايه مع الخايب ده طب انا و انتى عملناها و خلفناه و لازم نتحمل قرفه لكن هما ذنبهم ايه
ما تقولش كده على الواد انا ابنى زى الفل و بكرة ان شاء الله هاشوف له عروسة بنت حلال تناسبه مش المتنمردين بتوع هنا
روحى بس نصيحه منى ابقى شوفى له عروسة هبله علشان ما تاخدش بالها من بلاوى ابنك
هبلة ليه يا اخويا ده انا ابنى يقعد على البساط و ينقى ست البنات
تمت
و المثل
(خنفسة شافت ولادها على الحيط قالت لولى ملضوم فى خيط)إجابة آخرى
( القرد فى عين امه غزال )-----------------------------------------
-----------------------------------------
-----------------------------------------
الموقف السادس
حسنى انا قلبى واجعنى اوى
ليه بس يا فاطمة
يعنى انت مش شايف حال البنت اللى لا يسر عدو و لا حبيب
انهى بنت فيهم
يعنى هاتكون انهى بنت هالة طبعا
مالها هالة
البنت عدت التلاتين و لسه قاعدة من غير جواز
و فيها ايه يعنى ده كل شىء قسمة و نصيب
ما قلناش حاجة بس برضه ربنا بيقول اسعى يا عبد و انا اسعى معاك
و ده هانسعى له ازاى ان شاء الله هادور ادلل عليها
تدلل يعنى ايه المثل بيقول اخطب لبنتك و لا تخطبش لابنك
اخطب لمين يا فاطمة انتى اتجننتى
يا حسنى البنت العمر بيجرى بيها و انا خايفه تفضل كده من غير جواز
لا حول و لا قوة الا بالله العلى العظيم يا ستى دى حاجات بتاعة ربنا لو كاتب لها تتجوز هاتتجوز ان شاء الله
ما هو لو كنت طاوعتنى و اقنعتها توافق على العريس الاخرانى اللى جالها كان زمانها فى بيتها دلوقتى
عريس ايه عايزانى اوافق اجوز بنتى المتلعمة المثقفة لواحد ما بيعرفش يفك الخط حتى
يا اخويا بلا علام بلا زفت خدنا ايه من التعليم ده الراجل كان كسيب و كان هايهنيها
يا فاطمة اتقى الله فى بنتك بكرة ربنا يبعت لها نصيبها لحد عندها
يارب
---------------------------------------------
باقولك ايه يا فاطمة
ايوه يا نعمه
انا جايبة لهالة عريس انما ايه بقى لقطة
بتتكلمى جد يا نعمه
و هى الحاجات دى فيها هزار برضه
طب و ده ظروفه ايه
ده يا ستى يبقى اخو صاحب مؤمن ابنى امهم ماتت من فترة
و عادل العريس ده يا حبة عينى الوحيد اللى ما اتجوزش فيهم
فاخوه قال لمؤمن يشوف له عروسة بنت حلال علشان مش عايزينه يفضل عايش لوحده
و خصوصا و انهم مالهمش اخوات بنات يقضوا له طلباته
يا صلاة النبى يعنى يتيم
مش باقولك لقطة يعنى بنتك لا هايبقى ليها حما تقرفها و لا حتى اخت جوز تناقرها
طب خلاص خليه يجيى يشوف البنت و يكلم ابوها
يعنى موافقة
ايوه طبعا موافقة
خلاص حددى ميعاد مع ابو هالة و بلغينى علشان اقول للعريس
---------------------------------------------
طب و العريس ده بيشتغل ايه يا فاطمة
مش عارفة و الله يا حسنى
طب عنده كام سنة
لا و الله مش عارفة
طب مؤهله ايه
اعدمك يا اخويا ما اعرف
أمال وافقتى على اى اساس انه يجيى
الله و فيها ايه يعنى لما يجيى و نبقى نسأله على كل اللى عايزين نعرفه
افرضى يا وليه طلع مش مناسب ليها
و هو حد هايضربنا على ايدينا لو طلع مش مناسب خلاص يبقى كل شىء قسمة و نصيب
خلاص يا فاطمة خليه يجيى بكرة بعد صلاة العشاء
---------------------------------------------
و فعلا عادل جه و معاه اخوه و معاهم مؤمن ابن الست نعمة
و انت بتشتغل ايه بقى يا ابنى
انا يا عمى محاسب قانونى
جميل و بالنسبة بقى للشقة
عادل يا عمى هايقعد فى شقة بابا و ماما انا و اخواتى اتفقنا و هانسيبها له
طب الحمد لله
ام هالة قومى اندهى لهالة
و جت هالة و شافت عادل و سابوهم قاعدين لوحدهم شوية و ابتدوا يتكلموا مع بعض
---------------------------------------------
و بعد ما الضيوف مشيوا
ايه رأيك يا بنتى
مش عارفة و الله يا بابا هو كلامة مش مريح خالص
مش مريح ازاى يعنى ان شاء الله
مش عارفة حاسه فى اسلوب كلامه انه مش مظبوط
مش مظبوط ازاى يا ست هالة
لو سمحتى يا فاطمة سيبى البنت تتكلم كملى يا حبيبتى
يا بابا و الله مفيش حاجة معينة بس انا ما ارتحتش للكلام معاه
شوف برضه البت ما ارتحتيش يعنى ايه
يعنى مش حاسه بقبول ناحيته يا ماما
يعنى ايه قبول
استنى يا فاطمة بعد اذنك مش يمكن علشان دى اول مرة تشوفيه ايه رأيك نخليه يجيى تانى و تعملى صلاة استخارة
حاضر يا بابا
و فعلا بعد ما عادل ابدى موافقته على هالة طلبوا منه يجيى مرة تانية
و بعد المقابلة التانية و صلاة الاستخارة هالة فضل رأيها زى ما هو
مش قادرة يا ماما انا مش حاسه انى ممكن اعاشر الراجل ده
طب قولى لى سبب معين للرفض
مش مرتاحة للكلام معاه حاسه انه جاى يتجوزنى علشان اخدمه مش اكتر يعنى جوازة و السلام
يا بنتى حرام عليكى انتى عايزة تموتينى ناقصة عمر
ليه بس يا ماما
يا حبيبتى افهمينى اى ست بتخدم جوزها
و هو انا اعترضت بس ما يبقاش ده السبب الوحيد اللى هايخليه يتجوزنى
ده واحد طول قعدته معايا يقول لى مواعيد شغلى كذا
اصحى من النوم الاقى الفطار متحضر
ارجع الاقى الغدا و الاقى الشقة زى الفل
ما بحبش الصوت العالى
الرغى و الكلام الكتير بينرفزنى
و فيها ايه يعنى لما يفطمك على طبعه من اولها
مش عارفه يا ماما بس طريقة كلامه معايا ناشفه اوى
بصى يا هالة انا هاكلمك بصراحة يا حبيبتى انتى دلوقتى مش صغيرة علشان تقعدى تتبغددى و تتدلعى
يا حبيبتى مش عايزاكى تزعلى منى يا بخت من بكانى و بكى عليا
انا اكتر واحده فى الدنيا تهمها مصلحتك يا بنتى احنا مش هانعيش لك العمر كله
و اخواتك كلهم اتجوزوا خلاص و بعدين عايزاكى تلحقى تجيبى لك حتة عيل تفرحى بيه
بس يا ماما
من غير بس يا هالة بصى بقى لو ما وافقتيش على العريس ده اعرفى انى هابقى مش راضية عنك
خلاص يا ماما اللى تشوفيه
---------------------------------------------
و فعلا تمت الجوازة و توقعات هالة كلها طلعت فى محلها
جوزها طلع راجل بارد من غير اى مشاعر و بيعاملها زى ما تكون خدامة فى البيت
مفيش كلمة حلوة و لا لمسة حنينه على طول اوامر و شخط و نطر
عادل
عايزة ايه
انا كنت عايزة ازور ماما بكرة
ليه ان شاء الله
اصلها تعبانة اوى و هاتتحجز فى المستشفى و كانت عايزانى ابقى مرافق معاها
تبقى مرافق مع مين
مع امى يا عادل
و انا مين هايشوف طلباتى
طلباتك يا حبيبى هاعملها قبل ما امشى و ليك عليا اجى كل يوم اشوف كل طلباتك و اقضيها لك
لا
لا ليه بس
هو كده مفيش مرواح شوفى حد تانى يقعد مع امك
حد مين ما انت عارف ان اختى هبة مسافرة بره و غادة لسه والده من شهر يعنى مش هاينفع
برضه لأ
يا عادل علشان خاطرى دى امى و مالهاش غيرى و ابويا مش هاينفع يقعد معاها مرافق فى المستشفى
باقولك ايه يا بنت الناس هو ده اللى عندى و لازم تعرفى انى ما بحبش اللت و العجن الكتير
انا قلت لأ يعنى لأ بيتك مش هاتسيبيه تحت اى ظرف
انا متجوزك علشان تشوفى لى طلباتى و انتى عارفه
مش متجوزك علشان تسيبينى و تروحى بيت اهلك
عادل
مفيش عادل الكلام خلص لحد كده امك هابقى اوديكى تزوريها فى ميعاد الزيارة و غير كده مالكيش عندى
---------------------------------------------
الله يسامحك يا ماما انتى السبب فى الجوازة دى ما انا كنت قاعدة فى بيت ابويا و مبسوطة بحياتى
تمت
و المثل
حد يدوق معايا كده . هو ده رز برضه يا ناس
ايه هاتسيبينى مع بسمه ليه هو انا عملت لك ايه يا مفترية
