- كريم
= ايوه يا بابا
= ايوه يا بابا
- اسمها ايوة برضه
= اسف نعم يا بابا
- رايح فين؟
= رايح الجامعة
- ليه؟
= علشان المحاضرات طبعا يعنى هاروح ليه!!
- و عندك ايه النهاردة؟
= نعم !!!
- نعم ايه عندك محاضرات ايه ؟
= عندي محاسبة
- و فين كتاب المحاسبة بقى ؟
= كتاب ايه يا بابا
- الكتاب يا ابني بتاع المحاسبة
= لا مش معايا للأسف
- ليه ان شاء الله ؟ انت مش واخد مني اول السنة فلوس قد كده على حس الزفت الكتب
= حصل بس احنا ما بنروحش الجامعة بكتب يا بابا
- اومال بتروحوا بايه ؟
= بالمترو
- بتقول ايه سمعني كده
= ما بقولش يا بابا بقول لحضرتك اننا مش بنحتاج الكتاب فى المحاضرة
- طب و محاضرتك دي الساعة كام ان شاء الله؟
= كمان نص ساعة بالظبط و حضرتك كده مأخرني و الله
- و الله انا مأخرك لكن لو كان جالك تليفون دلوقتي ما كنتش اتعطلت مش كدة
= ايه يا بابا الحجج الفكسانة دي ما الموبايل فى جيبي اللي عايز يكلمني هايكلمني
- فكسانة !!!!! و ايه فكسانة دي كمان يا استاذ كريم
* يووووووووووووووه يا مختار انت مش لسه عامل نفس الكمين ده للبنات الصبح
= يا ماما الحقيني ده ناقص يقولي طلع بطاقتك
- تلحقك من ايه هو انا بعذبك
= يا بابا ابوس رجلك عندي محاضرة
- يا ابني هو انا منعتك من الخروج انت بس قولي هاتخلص امتى و هاترجع البيت الساعة كام اقولك على حاجة خش هاتلي جدولك من اوضتك و امشي
= يا نهار اسود جدول ايه اللى هادخل اجيبه
* يا مختار حرام عليك سيب الواد يمشي
- مش هايمشي الا لما يقول هايرجع امتى و بعدين انتى مالك اصلا ادخلي المطبخ علشان هامشي الواد ده و جاي وراكي علشان عايزين نصبنه و نرص الحلل علشان رصة امبارح ما كيفتنيش و انا بشوفها الصبح
* رصة ايه اللى ما كيفتكش
= انتوا كنتوا بترصوا حلل و لا حجارة يا ماما
* اتنيل انت اخرس هو انا ناقصاك و بعدين مين اللى هايصبن المطبخ ؟ حسنية جاية يوم الخميس و هى اللى هاتعمله
- لا حسنية مين اللى هاتعمله انسي الكلام ده خلاص من هنا و رايح انا و انتي اللى هانعمل كل حاجة
* احنا ازاى بس و امتى ما انت عارف اني بارجع من الشغل مهدودة و لا انت عايزني يوم الاجازة يتهد حيلي فى الشقة
= يا بابا ممكن انزل بقى
- يا ابني اصبر متسربع على ايه
= يا بابا المحاضرة
- يخرب بيت المحاضرة اللي هاتجننك خلاص غور بس قولي هاترجع امتى
= الساعة 11
- ازاي هاتنزل 10 و ترجع 11
= 11 بالليل يا بابا
- يا نهارك اسود ليه ؟ و هاتتغدا امتى
= غدا ايه ؟ يا ماما ما تقولي له حاجة
* يا مختار ارحم الواد بقى و سيبه ينزل . انزل يا كريم
- ينزل يروح فين ما هو دلع سيادتك فيه اللى عامل فينا كده
= دلع ايه ؟ ايه افلام المقاولات دى يا بابا هو انت كنت ظبطتني باضرب
- بتضرب مين ؟
= مفيش يا بابا سيبني بقى و ليك عليا لما ارجع ابقى اعملك كل اللي انت عاوزه
- ماشي يا كريم انزل و لما ترجع ليا تصريف تاني معاك
و انتى بقى قدامى على المطبخ
* كان يوم اسود يوم ما طلعت معاش مبكر
- بتبرطمي تقولي ايه يا صفاء
* بقول كان يوم اسود يوم ما طلعت معاش مبكر
- اه باحسب