يخللى ابوه يطلقها
انت بتهرج يا أشرف ما انت عارف ان ابويا ميت
اهدى بس كده فى ايه هى طنط خانقاك فى ايه طيب
خلاص فاض بيا ما بقتش قادر اتحمل كل واحدة اخطبها تفضل وراها لحد ما تطفشها ده انا لو كنت اتجوزت من اول خطوبة كان زمانى عندى عيل طولك
انت بتعايرنى علشان قصير
بس برضه هايهرج تانى و الله خلاص حاسس انى هاتجنن
يا ابنى انت مش قلت لى قبل كده ان نسرين خطيبتك الجديدة مخها كبير و مش بتقفش على مامتك و مستحملاها
ايوه بس انا خايف البنت تزهق فى الاخر و ما تقدرش تكمل هى صحيح بنت حلال و صبورة بس كل بنى ادم مننا و ليه طاقة و دى مستحملة اللى ماحدش يستحمله
للدرجة دى هى مامتك بتعمل ايه بالظبط
هاحكى لك عندك يوم ما روحنا نخطب نسرين
--------------------------------------
ماما يا حبيبتى نسرين دى انا بحبها اوى و لو ضاعت من ايدى ممكن يجرى لى حاجة
بعد الشر عليك يا حبيبى اطمن مش هانخرج من عندهم الا و هى خطيبتك
يا خوفى يا بدران
خوفك من ايه يا حازم
خوفى من ان اللى بيحصل كل مرة يتكرر
كل مرة و هو انا يعنى كنت باعمل ايه كل مرة ده كله كان علشان مصلحتك
ماشى يا ماما و عسى ان تكرهوا شيئا يمكن ربنا عمل كل ده علشان نصيبى مع نسرين بس ابوس ايدك بقى يا ماما بالراحه عليها اصلها رقيقة اوى
من أولها كده رقيقة طب يا اخويا بكرة نقعد على الحيطة و نسمع الزيطة
حيطة ايه اللى هاتقعدى عليها يا ماما انتى فاكرة نفسك نيللى فى الفوازير
بقى كده بتتريق عليا من دلوقتى امال بعد كده هاتعمل فيا ايه هاترمينى فى دار مسنين
و انا اقدر برضه يا شوشو ده انتى اللى ليا هو انا اقدر استغنى عنك ابدا يا قمر
طب يلا يا اخويا علشان ما نتأخرش على الناس
--------------------------------------
و أول ما وصلنا العمارة يا ابنى ابتدت فى حركات كل مرة
ايه القرف ده
فى ايه يا ماما
الناس دى باين عليهم مش نضاف على فكرة
ليه بس
شايف العنكبوت اللى معشش فى السقف
عنكبوت ايه يا ماما و بعدين هما مالهم بمدخل العمارة هاينزلوا يزعفوه مثلا
ماشى يا سيدى ابتدينا نحامى لهم
--------------------------------------
و اول ما دخلنا الصالوان عند الناس راحت مميلة على ودنى
طب و التراب اللى فى شقتهم ده مالهمش دعوه بيه
فين التراب ده كمان يا ماما
اللى على السجادة من أول باب الشقة لحد ما هنا
التراب ده من جزمة حضرتك اللى ما مسحتيهاش على باب الشقة
طلع كده لكل حاجة حجة بكرة شقتك هاتبقى معفنه
بس يا ماما مامة العروسة جاية
دى امها يا خوفى البنت تطلع شبهها
و بعيد عنك بقى يا اشرف قعدت تطلب و تتشرط على الناس لحد ما انا شخصيا زهقت
و الله انا كنت خايف ابوها يطردنا
ده مفيش حاجة صبرته علينا غير انى مفهمه ان امى بتحبنى و متعلقه بيا لأنى ابنها الوحيد
و اتحايلت عليه يهاودها و انا هانفذ له كل اللى هو عاوزه بعد كده
ده غير انه عامل خاطر لبنته اللى بتحبنى
--------------------------------------
و لا اللى بتقوله للبنت باستمرار
حازم ده ابنى الوحيد و مليش فى الدنيا غيره و اوعى تفتكرى انك بجوازك منه هاتاخديه منى لأ يا حبيبتى ده ما يقدرش يستغنى عنى ابدا ده انا فضلت ارضعه لحد ما بقى فى اولى ابتدائى
و هى طبعا ساكته علشان خاطرى
مامتك دى كارثة
ماشى يا سيدى دى لسه من يومين حارقه دم البنت تصور بتقولها يوم ما تجيبوا العفش هاقعد لكم على باب الشقة و الحاجة اللى ما تعجبنيش مش هادخلها و انا اللى هافرش كل حته فيها على ذوقى
لأ كده كتير طبعا
ما هو ده اللى مخوفنى ان كده فعلا كتير و خايف ان نسرين تسيبنى و انا لو ما اتجوزتهاش يبقى مش هاتجوز ابدا
و فى نفس الوقت كل ما باجى اشد على ماما شوية ما بتبطلش عياط
و تقعد تفكرنى انها ضحت بعمرها كله علشان خاطرى
و ما رضيتش تتجوز بعد بابا الله يرحمه رغم انه ميت من و هى صغيرة
فبتصعب عليا اوى خصوصا انها مالهاش غيرى فى الدنيا
طب و اللى يحلك الموضوع ده كله
إزاى
ادينى ودنك
لأ طبعا انت اتجننت انا ما اقدرش اعمل فيها كده
ليه بس مامتك ماشاء الله عليها زى القمر و صحتها زى الفل يعنى مفيهاش حاجة لما تجوزها و تخلص من تدخلها فى حياتك على الأقل تلاقى حد غيرك يشغلها عنك
ايوه يا أشرف بس هى عمرها ما وافقت انها تتجوز من بعد موت بابا رغم ان اتقدم لها عرسان كتير
يا سيدى كانت بترفض علشان خاطرك لكن لما تلاقيك انت موافق و مرحب بكده اكيد هاتوافق على طول
صدقنى مفيش ست بيبقى نفسها تعيش وحيدة طول عمرها
انت شايف كده يعنى
ايوه شايف كده و بصراحة بقى انا عندى ليها عريس مية مية
مين بقى العريس
عمى عبد الله
عمك عبد الله ده مش اللى مراته ماتت من سنة
ايوه و انت عارف انه من ساعتها مبرشت على امى فى البيت و بصراحة الجوازة دى هاتبقى مصلحة ليك و لامى كمان
اشمعنى
بصراحة كده امى زهقت من طلبات عمى و اخر مرة الخناقه بينها و بين ابويا كانت هاتقف على طلاقهم
و انت عارف امى لو اطلقت هاتيجى تقعد عندىو بصراحة لو جت قعدت معايا مش بعيد مها مراتى تطلب الطلاق
طب و انا ادبس امى فى واحد زى عمك ليه
و هو عمى ماله بس ده حتى راجل مركزه كويس و الأهم انه ما بيخلفش يعنى طنط مش هاتجيب لك عيل و تدخلك الجيش
هى حصلت للجيش كمان عموما انا هاسألها و ربنا يقدم اللى فيه الخير ان شاء الله
-------------------------------------------
ماما
نعم يا حازم
كنت عايز اقولك على حاجة
خير يا حبيبى
أشرف صاحبى بيسلم عليكى
الله يسلمك و يسلمه هو عامل ايه و اخبار مراته و بنته ايه
زى الفل بس
بس ايه فى ايه يا حازم
مفيش يا ماما اصله كان عايز يجيى يزورنا بكرة ان شاء الله
و ماله هى دى أول مرة خليه يجيى ينورنا و يجيب معاه مراته و بنته
لأ هو هايجيب معاه عمه عبد الله
و عمه جاى ليه
مفيش اصله كان عايزنى فى شغل و جاى يتفق معايا عليه
و ماله يا حبيبى يشرفوا و ينوروا
-------------------------------------------
هاه قولت لها
قلت لها انكم هاتيجوا تزورونا بس ما قدرتش اقولها على موضوع الجواز ده
طب و احنا هانيجى ازاى و هى ما تعرفش انه جاى يتقدم لها
يا سيدى نعتبر المرة دى قعدة تعارف و انا هابقى اطلب منها تدخل تقعد معانا شوية و انت ابقى خللى عمك يحاول يتكلم معاها و كده بقى
خلاص مش مشكلة ميعادنا بكرة ان شاء الله
ان شاء الله
-------------------------------------------
منورين يا جماعة
ده نورك يا هانم
أستأذن انا بقى و اسيبكم تتكلموا فى الشغل
ليه يا ماما خليكى قاعدة معانا شوية
لأ يا حبيبى علشان تبقوا براحتكم
شغل ايه ما تخليكى معانا يا مدام علشان نتأنس بيكى
لأ معلش و الله ورايا شوية حاجات لازم اقوم اعملها
خليكى شوية هو انا لسه لحقت اتعرف عليكى
فرصة تانية ان شاء الله
هى ايه الكروته دى
كروتة
فى ايه بالظبط يا أشرفمفيش حاجة يا طنط ايه يا عمى ما تصبر شوية
أصبر ايه مش عايز اقعد اتفاهم معاها و اتعرف عليها اكتر ده جواز يا ناس
جواز مين الراجل ده بيقول ايه
حازم تعالى ورايا لو سمحت
طب نستأذن احنا بقى يا حازم قوم يا عمى
اقوم ايه انا لسه ما اتعرفتش عليها كويس
قوم يا عمى الله يكرمك بدل ما اولع فى روحى احنا أسفين يا حازم
هو ده اللى مفهمه كل حاجة يا أشرف
و الله فهمته بس واضح انه لما شاف مامتك اتجنن
الله يسامحك خده و غور بقى
-------------------------------------------
هو انا بقيت مزعجة اوى كده يا حازم
ليه بس كده يا ماما
مش عارف ليه عايز تجوزنى علشان تخلص منى خلاص مش طايقنى للدرجة دى
يا حبيبتى و الله ابدا انا قلت ان بعد جوازى حضرتك محتاجة حد يملا عليكى حياتك و بعدين حضرتك من بعد موت بابا و انتى ظالمة نفسك علشان خاطرى
و مين قالك انى كنت بارفض الجواز علشان خاطرك
أمال ايه يا ماما اوعى تكونى مأنتمه من ورايا
لأ طبعا بس انا كان فى حياتى راجل قبل ابوك الله يرحمه
و لما ظروفه ما سمحتش بجوازنا سابنى و سافر
و انا اتجوزت ابوك و اهو ما استحملش كتير و فيص منى على طول
كنتى بتحبى يا ماما
أه يا حبيبى حازم ده كان كل حياتى
حازم انتى كمان مسميانى على اسمه يعنى حازم ده مش على اسم اخوكى اللى مات و هو لسه صغير
يعنى كنت عايزنى اقولك الحقيقة و اكسر نفسك وسط اصحابك
اللى يقولك انا على اسم جدى و اللى يقولك انا على اسم عمى
انت بقى كنت هاتقول ايه انا على اسم البوى فريند القديم بتاع ماما
طول عمرك بتضحى يا شوشو
انا يا حبيبى عايزة افهمك ان بعد حازم كانت الرجاله كلهم واحد بالنسبة
لى ابوك زى غيره و ده اللى خلانى اتجوزت
انما انت بقى حاجة تانية انت الراجل الوحيد اللى بعد حازم اللى اتعلقت بيه
يا حبيبى انت كل دنيتى و كان مستحيل اتجوز تانى و حد يجيى يشغلنى عنك
يا حبيبتى ربنا يخليكى ليا
و صدقنى يا حبيبى انا من هنا و رايح مستحيل اضايقك او اضايق نسرين تانى
بجد يا ماما
طبعا يا حبيبى هاتمنى لكم السعاده من كل قلبى و لو بعدى عنكم هايريحكم هابعد
لأ طبعا يا حبيبتى ده انتى هاتبقى فى عينينا
قال ابعد عنكم قال هو انا هاسيبك ليها بالساهل كده دى هاتشوف ايام
--------------------------------------
مش ممكن اللى بتحكيه ده يا حازم بقى طنط كان فى حياتها حب جميل كده
و الله انا كنت ظالماها انا كنت دايما حاسه ان قلبها جامد و عمره ما عرف الحب
لا و الله هى دى الحقيقة يا نسرين
طب بجد صعبت عليا و بعدين انت ازاى تفكر تجيب لها عريس من اصله
اعمل ايه بس أشرف قالى ان دى الطريقة الوحيدة اللى هاتخليها تخف من علينا
طب تصدق ان بابا ليه ابن عم لسه راجع من فرنسا من شهرين
و بابا هايموت و يجوزه و لما شاف مامتك قالى ايه رأيك نجوزها له
بس بصراحه خفت طنط تحسبنى عايزة اجوزها علشان تبقى انت ليا لوحدى
عموما حصل خير و الحمد لله انها جت على قد كده
انا شخصيا مش ناوى افتح موضوع الجواز ده تانى
و احنا بقى من ناحيتنا نبقى نستحمل و خلاص
طبعا يا حبيبى دى فى الأول و الاخر مامتك و أكيد هاتبقى مامتى انا كمان
ربنا يخليكى ليا يا قلبى
--------------------------------
إزيك يا ماما
أهلا يا عروسة
حضرتك عامله ايه
انا كويسة الحمد لله انتى بقى عامله ايه
انا تمام الحمد لله مادام حضرتك راضية عنى
راضيه اه بصى يا نسرين شغل التعابين ده ما يخيلش عليا
تعابين ايه بس يا ماما
ايوه شغل الجر النواعمى ده و اتمسكن لحد ما تتمكن ما ينفعش تعمليه معايا انا
انا و الله يا ماما ابدا ده ربنا اللى يعلم انا بحب حضرتك قد ايه
برضه و لا يفرق معايا الكلام ده كله انا اهم حاجة عندى ابنى
ده حازم فى عينيا يا ماما
و يبقى فى عينيكى انتى ليه ما هو طول عمره فى عينيا انا و لا هى كانت ضاقت عليه
يا طنط لا انا و لا حازم لينا بركه غير حضرتك
ماشى يا اختى ما انا علشان عارفه كده عملت لكم مفاجأه هاتعجبكم اوى ان شاء الله
خير يا ماما
لأ مش هاقولها لك دلوقتى هاقولها لك يوم الفرح ان شاء الله
و ماله يا ماما اكيد اى حاجة من حضرتك هاتسعدنى و تسعد حازم ان شاء الله
ان شاء الله يا حبيبتى
--------------------------------
الفرح ابتدى و طول الفرح الست شريفه ام حازم ماسكه فى ايده و مش سايبه له فرصه يرقص مع نسرين خالص
و كل ما يروح يمين وراه شمال وراه لحد ما كانت نسرين هاتتجنن
و كل شوية حازم يهمس فى ودنها و يقول لها هانت دلوقتى اخدك و نطير على الفندق و نبقى لوحدنا و ما ابقاش لحد غيرك
و الحمد لله الفرح خلص على خير
و بعد ما حازم و نسرين ركبوا العربية جت ام حازم عايزة تسلم عليها
و وشوشتها فى ودنها و من بعدها نسرين وشها اتقلب
--------------------------------
فى ايه يا حبيبتى من اول ما ركبنا العربية لحد ما وصلنا الفندق و انتى متغيره مالك بس يا قلبى
بصراحه يا حازم انا مش عايزة انكد عليك بس مامتك قالت لى على خبر مش حلو بصراحه
خير
قالت لى انها و هى بتحجز لنا الأوضه فى الأوتيل هنا حجزت لنفسها اوضه علشان تيجى تتفسح معانا
و قالت لى ابقى قابلينى لو سبته لك لوحدك
لأ بقى كده كتير فعلا
بصى يا حبيبتى لو هى فعلا عملت كده هاخدك و نطلع على اى اوتيل تانى من غير ما نعرفها مكاننا
بس انا خايفه تزعل
لأ بقى مش من حقها تزعل و بعدين ده شهر العسل يعنى لازم نقضيه لوحدنا
خلاص اللى تشوفه يا حبيبى
ايوه كده عايز اشوف ابتسامتك الجميلة
--------------------------------
و الله مامتك طلعت طيبة فعلا و غير ما اتصورتها خالص
اسبوعين اهوه دلوقتى من يوم الفرح و هى لا ظهرت فى الأوتيل
و لا حتى حاولت تكلمنا على الموبايل
طبعا يا حبيبتى لما الموضوع دخل فى الجد بانت على حقيقتها
اصل ماما بتحبنى بجد و مش عايزة من الدنيا كلها غير سعادتى
ربنا يخليها لك يا حبيبى
و يخليكى ليا باقولك ايه ما تيجى ننزل نتفسح شوية بقالنا اسبوعين دلوقتى مش بنخرج من الأوضه غير قليل
طب يلا بينا
--------------------------------
ايه ده
فى ايه يا حازم
مش ماما اللى ماشيه هناك دى
فين
اهى اللى هناك على البسين و مين بقى اللى متعلقه فى دراعه ده
ده اونكل حازم
اونكل حازم مين
اونكل حازم ابن عم بابا اللى حكيت لك عنه اللى كان مسافر بره
طب و ده ايه اللى لمه على ماما يكونش ابوكى عملها و جوزهم لبعض
مش عارفه تعالى لما نشوف ايه الحكايه
ماما
ازيك يا حازم صباحيه مباركه يا حبيبى و لو انها جت متأخرة
انتى بتعملى ايه مع الراجل ده هنا يا ماما
ده يبقى عمك حازم اللى انا مسمياك على اسمه
معقول بقى الحب القديم يطلع هو اونكل حازم
ايوه يا نسرين و بعد الفرح ما خلص كنت واقفه باعيط
لقيت اللى بيحط ايده على كتفى
و بيقولى معقوله اسيبك من 30 سنه و انتى بتعيطى
و ارجع برضه الاقى لسه الدموع ماليه عيونك
و بعدين يا ماما
و لا قبلين يا حبيبى بصراحه ما حبيناش نضيع وقت تانى من عمرنا
و قررنا نتجوز و جينا نقضى شهر العسل هنا
فى الأوضه اللى كنت حاجزاها علشان انغص عليكم شهر العسل بتاعكم
بقى تبقى جنبى اسبوعين بحالهم و ما تجيش تبلغينى خبر جوازك
الحقيقة دى كانت رغبتى انا يا حازم انا اللى طلبت من شريفه تسيبكم تستمتعوا بشهر العسل بتاعكم
و موضوع جوازنا كده و لا كده كنتوا هاتعرفوه طبعا
الف مبروك يا أونكل مبروك يا ماما
الله يبارك فيكى يا نسرين يا حبيبتى
و انت يا حبيبى مش هاتقول لنا مبروك
مبروك واحده بس الف مليون مبروك يا ماما و زغروطه كمان
--------------------------------
حازم
نعم يا نسرين
باب الأوضه بيخبط قوم افتح لايكون حد من الروم سيرفيس جايب لنا الفطار
حاضر يا حبيبتى
ايه ده ماما
صباحية مباركه يا حبيبى
صباحية ايه انتى بتعملى ايه هنا و فين اونكل حازم
اونكل حازم مين يا حبيبى
جوزك
جوزى و هو انا كنت اتجوزت يا ابنى انتى عملتى ايه فى الواد يا مقصوفة الرقبه
و الله ما عملت له حاجة يا ماما ده نايم امبارح زى الفل
ده انا حتى صحيت النهارده من النوم على صوت زغاريطه و هو نايم
نايم يعنى ايه
يعنى مفيش أونكل حازم
يعنى انتى ما اتجوزتيش يا ماما
معقول كل ده كان حلم
انت بتحلم اتنك جوزتنى صباحيه مباركه يا قلب ماما قوم بقى علشان نفطر سوا
الله يبارك فيكى يا ماما
ليست هناك تعليقات:
إرسال تعليق