يوميات مدرسة اجن من الطلبة ( الجزء الرابع )

( 9 ) نور و مهند

كان يوم ما طلعتلوش شمس يوم ما ابتدت المسلسلات التركى تتعرض فى التليفزيون

العيال زى ما تكون اتجننت خلاص

كل واحده من البنات عايزة مهند و اللى عايزة يحيى

و منها لله لميس اللى جننت لى الصبيان

ادخل فصول البنات التيكيت عليه صور مهند

الكشكول عليه صور مهند

حتى الاستيكرز اللى بيلزقوها جوه الكشكول ما بقتش باربى و الكلام الفارغ ده

كلها صور المحروس و الهانم فى حضنه

نيجى نتكلم مع بعض شويه شفتى يا ميس نور عملت ايه فى مهند امبارح

ادخل فصول الصبيان الاقى نفس الهبل و الاستيكرز و بصى يا ميس المزة الصاروخ دى و لميس دى جامده و خسارة فى يحيى جته البلا فى شنبه

و على طول كده فى الهبل ده كل حصة لغاية ما اتخنقت منهم


فى يوم كنا فى المعمل و كانت حصة بنات و خلصنا العملى و قلت لهم شوفوا لو عايزين نعمل حاجه جديدة


اه يا ميس ندخل على النت


طب ماشى بس ما حدش يدخل على حاجه غير لما اشوف الأول


ما انا اصلى مش باطمن لهم خالص


قلت لهم و لا اقولكم احنا ندخل على google و نعمل search على موضوع واحد كلنا مع بعض كده


أأمن برضه


ماشى يا ميس


عايزين تعملوا بحث على ايه بقى


نعمل على الصور يا ميس


ماشى عايزين صور مين


قامت بنت بقوة الصاروخ مهند طبعاً يا ميس


راحت التانية لأ مهند ايه يحيى يا ميس


يخرب بيوتكم مهند ايه و يحيى ايه


ايوه يا ميس عايزين مهند


لأ يا ميس يحيى


راحت التانية ردت عليها انتى هبله يا بت يحيى ايه ده مهند زى القمر


قمر ايه انتى ما شوفتيش شنب يحيى


و انا كنت هاتفرس بصراحه شنب ايه اللى بيتخانقوا عليه التخلفين دول

شنب ايه يا بت


ده يجنن يا ميس


طب ما الصرصار شنبه قد كده يجنن هو كمان


يا ميس صرصار ايه انتى ما شوفتيش يحيى بيعامل لميس ازاى


و لا مهند شوفتيه يا ميس بيعامل نور ازاى هى دى الرجاله مش تقولى لى الواد مودى


مودى مين يا بنت


مودى بتاع 3 / 4


قامت بت منطورة من مكانها ماله مودى بقى يا حبيبتى


واد اهبل كده و فاكر نفسه حاجه و هو بارد اصلا


يا سلام يا اختى


اه


ليه مش احسن برضه من عمر الليثى


و فجأه بقدرة قادر الخناقه ما بقتش على مهند و يحيى لأ بقت على مودى و عمر


الله الله اردحوا لبعض اكتر يا متشرده انتى و هى


الله يا ميس مش شايفه اتكلمت ازاى على مودى


و هو كان من بقية اهلك


زميلى يا ميس و زى اخويا


اخوكى برضه


اه اخويا و متربيين مع بعض كمان


و حضرتك ايه موضوع عمر ده كمان


زميلى يا ميس


ماشى يا حلوة


احنا كنا فى ايه منكم لله يا بعده


كنا هانعمل بحث على مهند

لأ يحيى

لأ مهند

لأ يحيى


بــــــــــــــــــس لا ده و لا ده امشوا غوروا على الفصل الله يقطع مهند على يحيى فى ساعه واحده




و المهم بعد كده فى حصة الصبيان قلت لهم نعمل ايه النهارده مختلف بعد ما خلصنا الدرس


ندور فى الصور على مهند و يحيى يا ميس


اتارى البنات ولاد اللذين كانوا قايلين لهم


ايه ده انتوا كمان بتحبوا مهند و يحيى


لا يا ميس يمكن نلاقى صور حلوه كده ما انتى عارفه بقى


لا مش عارفه يا سيدى


فرد ولد رخم خلاص يا ميس احنا ندخل على الفيس توك ندور على عريس ما عندكش عريس يا كرومبو


ليه يا حلوه ما الفصل فيه 40 دكر مافيش واحد فيهم مالى عينيكى يا بيضه


ليه كده ده انا باهزر معاكى


الله ما انا كمان باهزر معاك


طب خلاص اختارى لى انتى عريس


يا واد استرجل جتها نيله اللى عايزة خلف زى خلفك ده انت لو ابنى كنت مت بحسرتى


يا ميس انتى تطولى تجيبى عيل قمر زيى


قمر انت ما فيش مرايا فى بيتكم يالا


لأ فيه و باشوفنى فيها قمر


ما هو يا اما انت احول يا اما مراية بيتكم مكسرة


يا ميس حرام عليكى


حرمت عليك عيشتك و اخرس بقى بدل ما اقطعك اربع تربع و اخلى كل ربع يتحسر على التلاته التانيين و يقول يا ريتنى كنت معاهم


ايه


جتك اواه ما سمعتش


لأ سمعت الله يسامحك


اللله ياخدك و يريحنى منك


ماشى الله يسامحك برضه لانى عارف ان كل ده من ورا قلبك


طب اسكت بقى عشان احبك


حاضر


قام واحد تانى طب سيبينى افتح الايميل بتاعى


فقلت له تفتح الايميل تنيل بيه ايه هى مش متلقحه فى الفصل فوق ده انا حتى لسه شايفاها الصبح و هى بتتهزق على البنطلون اللى لابساه


اه ما انا مش هاقعد عشان اتكلم معاها


امال تتكلم مع مين انت تعرف حد غيرها و لا ايه


لا يا ميس اعرف حد غيرها ايه ده انا قاعد عشان اشوف ماما لو فاتحه


فاتحه ايه


الميل بتاعها


يا سلام


اه ما هى بتيجى من طابور العيش على الكمبيوتر على طول و الله قبل ما تفطر حتى


لا ياراجل طب و انت مش لسه سايب ماما فى البيت عايز منها ايه بقى


اشوفها يمكن عايزة خضار فاكهه جبنه اى حاجه اجيبها لها معايا و انا مروح


اقعد يا لا مش هاتفتح حاجه


يا ميس بالله عليكى افتحه


الهى ربنا يفتح فى وشك 6 غرز يا بعيد


الهى على الأقل اخد اجازة و ارتاح من المدرسة


ادعوا معايا عليه يا عيال


ادعى انتى بس انتى يا ميس و احنا هانأمن وراكى


بس للأسف قبل ما الحق ادعى عليه الحصة خلصت



--------------------------------

( 10 ) أهلاوى و لا زملكاوى



بقى المدرس اللى يعلن عن هويته و انتماءاته الكرويه فى البلد دى و خصوصاً قدام الطلبه يبقى مجنون رسمى

و الحمد لله انا كده من زمان

الجنان ده ابتدى فى اليوم اللى قبل ماتش الزمالك و الأهلى

انا داخله الفصل فى امانة الله و لقيت حلبة مصارعه منصوبه جوه الفصل

و العيال اول ما شافتنى هييييييييه الميس جات اهى

فى ايه يا بلاوى

الحقى يا ميس عمر و يوسف مقطعين بعض

و ماله سيبوهم لحد ما يخلصوا

و قولت ابعد من وشهم

جه ولد يحوش بينهم قلت له سيبهم خالص لغاية ما يخلصوا

عايزة اشوف مين فيكم ارجل من التانى و هايطلع اللى تحت ايده بعاهه يا صايع يا متشرد منك ليه

انتوا عارفين اللى يغيظ ايه بقى

ان انا كنت فاكرة ان الطريقة دى ايه بقى هاتكسفهم و هايقوموا يفزوا اول ما اقول كده

بس العيال كملوا خناق

زى ما تكون فى كرنبايه دخلت الفصل

بينى و بينكم خفت لا العيال تموت بعض بجد و اروح انا فى داهيه

و انا مش عامله حسابى خالص اتسجن اليومين دول

لسه بدرى على الاجازة و كنت مرتبة لها برنامج تانى خالص

المهم عملت فيها جان دارك و قلت ما بدهاش

مادام الكلام اللى بالذوق مش جايب نتيجه تبقى العافيه هى اللى هاتجيب نتيجه

و روحت مشمرة و نازله عليهم بالخرطوم

طك طك طك و لا همنى افترا بقى

لحد ما العيال قاموا من فوق بعض بينهجوا و حالتهم حاله

روحت ماسكه واحد منهم من ودنه

و قلت له ايه ده يا زفت

راح الولد قليل الأدب منزل ايدى من على ودنه

ايدك بس يا ميس و افهمى الموضوع الأول

لأ مش هافهم حاجه و اوعى تمسك ايدى تانى و نزل ايدك جنبك

و روحت ماسكه ودنه تانى

استغفر الله العظيم طب يا ميس ثوانى بعد اذنك ما ينفعش تمسكى ودنى كده انا مش عيل

لأ عيل و عيل اهبل كمان و عايز تاخد بالجزمة

كده يعنى

اه كده

و روحت منزله ايدى من باب الأدب طبعا و لأن ايدى وجعتنى اصلى كنت مشعلقاها ودن الولد فوق قوى

و قلت له اتفضل احكى

و روحت زاغده التانى فى كتفه و انت بقى لسه حسابك جاى

طيب

احكى يا زفت

يا ميس يرضيكى برضه الواد المعفن ده يشتم ابو تريكة

يشتم مين يا حبيبى

ابو تريكة

ابو تريكه و ايه يعنى هو كان من بقية اهلك

نعم

نعم الله عليك يا حبيبى

راح قام ولد من مكانه انتى زملكاويه ولا ايه يا ميس

اه زملكاويه عندك مانع

يا نهار اسوووووووووود الميس طلعت زملكاوية يا عيال

يا لهوى يا ميس هو لسه فى حد زملكاوى

اه لسه عندك مانع بقى

اه طبعاً عندى

بله و اشرب ميته يا حبيبى

لأ أبله ايه حضرتك لازم تسمعينى كده غلط ما ينفعش و الله لازم تشجعى الأهلى

لازم ايه يا اخويا و انت مالك يا رذل اشجع مين احنا فى الكورة دلوقتى و لا فى المجزرة اللى كانت شغاله يا شوية تحف

راح الولد التانى الزملكاوى حبيب قلبى رد بمنتهى البراءة و الطيبة

يا ميس يا حبيبتى انا باقول رايى بمنتهى الصراحه و الأدب راح ماسك فى خناقى

ما انا عارفه يا حبيبى ما هما اصلهم جمهور عدوانى و عنيف

و روحت زاغداه فى صدره كنت هاوقف له قلبه ما هو مش علشان زملكاوى هاسكت له صحيح روح الفانلة البيضا بتجمعنا لكن ما بدهاش

بس برضه الكلام ده مش فى حصتى يا تحفه

حاضر يا ميس انا اسف و مش هاجيب سيرة الكورة تانى فى حصة حضرتك فى الفسحه نبقى نقطع بعض براحتنا

ادخل مكانك يالا و اللى حصل ده ما يتكررش تانى

راح الولد الأهلاوى جاى يدخل هو كمان

رايح فين

هادخل مكانى انا كمان

هو انا قلت لك ادخل

طب ما هو دخل

دخل لما اعتذر

اه بس انا ما باعتذرش لزملكاويه

نعم يا حبيبى ما بتعتذرش لأيه

ما باعتذرش لزملكاويه يا ميس

الكلام ده لو انا بالعب معاك فى الشارع لكن احنا هنا فى المدرسة

و روحت ماسكه الخرطوم و ضربته

تصدقوا اتخيلت انى باضرب كل لاعيبة الأهلى و انا باضرب الواد ده و باضرب البطولات اللى خدوها مننا و باضرب الألقاب اللى اتحرمنا منها بقالنا سنين و باضرب شوبير و مدحت شلبى و كل اعلامى اهلاوى غاوى يبهدل فينا

الواد ما عرفش يدافع عن نفسه راح جرى بره الفصل و وقف على الباب

روحت طالعه وراه و جيت امسكه لقيت الناظر ماسكه من قفاه

ايه ده يا ميس

البيه طلع من الفصل

طلع يعنى ايه تعالى هنا و جاى يضرب الولد

روحت شاداه من ايده و قلت له بعد اذنك يا مستر

فى ايه يا ميس هاضربه لك

و تضربه انت ليه هو انا كاتعه و لا اتشليت انا هاضربه

يا ميس الضرب ممنوع

يعنى هو ممنوع عليا و مش ممنوع على حضرتك

ايوه انا الناظر و لو ضربته مش هايشتكى لكن لو حضرتك ضربتيهم هايشتكوا

لا يا مستر و انا اقدر برضه دى لو موتتنى حتى مش هافتح بقى و راح غامز لى

ماشى يا عمر

شكرا يا مستر و بعد اذنك بقى

ادخل يا عمر يا حبيبى

شوفتى ما خليتش سحس بومب يوقع بيننا ازاى

طب ما انا كمان ما هانش عليا اخليه يضربك

ما انا خدت بالى عشان كده عملت معاكى الواجب ده ادخل بقى

لما تعتذر الأول

لأ مش هاعتذر

تانى

خلاص حقك عليا يا قمر

ماشى يا سيدى ادخل بقى

و جه يوم الماتش و اتغلبنا حسبى الله و نعم الوكيل

و العيال كلها استلمونى بقى احسن يا ميس مش قولنا لك ده اللى هايحصل

و اللى يقوللى حولى بقى شكلك بقى وحش

الا ولد واحد جالى يقولى يا ميس انا اهلاوى بس كنت زعلان عشانك امبارح

يا راجل و زعلان ليه بقى ان شاء الله

عشان امتحان الشهر قرب و خفت تجيبى لنا امتحان زى الزفت انتقاما مننا

يا سلام

لأ بجد يا ميس افرضى اتجوزتى واحد اهلاوى هاتعملى ايه

و انا اتجوز اهلاوى ليه

نصيبك جه كده

يا ابنى انا هاسأله اول ما يتقدم لى قبل ما اسأله على اسمه و لو طلع اهلاوى هارفضه

طب افرضى طلع لك عيل اهلاوى

و العيل ده بقى انا هاتبناه من الملجأ و لا ايه مش فاهمه يعنى هو مش ابنى يبقى انا اللى هاربيه

الله افرضى طلع بيحب الأهلى

لأ ما انا هاعلق له صور الزمالك فى كل حته و هاعلق له صورة ابو تريكه و اقول له هو ده اللى قتل جدك يا حبيبى و يتم ماما حبيبتك و ماما كانت بتحب جدو قوى

نعم

نعم الله عليك اطلع يا ابنى حصتك انت فاكرنى بالعب

و جالى ولد زملكاوى يقولى يرضيكى اللى حصل امبارح ده

طب و انا ذنبى ايه هو انا كنت بالعب

لأ بس انتى قعدتى تقولى هانكسب و هانفوز و كده يعنى قعدتى تقاطعى فيها يا ميس

لأ و هو انا قاطعت بس ده انا اللى قولت لعبد الواحد يتسطل و هو واقف فى المرمى و قولت لهانى سعيد يتهطل و يسيب اللاعيبه تعدى و قولت لشيكابالا يتحول و ما يشوفوش الجون و انا اللى زنيت على حسام حسن و حطيت التشكيل المنيل اللى كان بيلعب اقولك على حاجه انا اللى كلت الجبنه


--------------------------------

( 11 ) حصة احتياطى



انا مش عارفه هما عايزين منى ايه ؟

لسه نازلة من حصه من عند البعدا اللى ما يتسموا و يادوب هاريح بقى لقيت المشرفه فى قفايا

حصة احتياطى ياميس

نعم حصة ايه ؟

احتياطى اصل مستر محمد عبد الله أخت مراته بتولد و راح يوديها المستشفى

طب يا حبيبتى ربنا يقومها بالسلامه انا مالى بقى

يا ميس ما هو عنده حصه و لازم حد يدخلها

طب ما أى حد يدخلها اشمعنى انا ما تشوفى حد من مدرسين العربى زمايله يدخلها على الأقل يدى العيال الدرس

لأ مافيش حد فاضى

يعنى مافيش حد بتاع عربى فاضى فى المدرسة كلها

بصى يا ميس مستر حسن قال ان حضرتك اللى هاتدخليها

عملها فيا سحس بمب

يا بنتى يهديكى يرضيكى لسه طالعه من حصتين زفت اعدادى

مش هاينفع و الله يا ميس و بعدين بلاش تعملى مشاكل معاه

و الحصة دى بقى سنه كام

رابعه ابتدائى

رابعة ابتدائى اه عيال يعنى

اه يا ميس و فصل هادى قوى

دخلت الحصة طبعا و انا رجلى فوق رقبتى

العيال اول ما شافونى الميس بتاعة الكمبيوتر اهيهمفيش عيل بينده لى باسمى ميس الكمبيوتر ميس الكمبيوتر لحد ما كرهونى فى الكمبيوتر و سيرته

ده زى ما اكون بامشى فى المدرسة و معلقة الماوس فى صدرى

امال مستر محمد فين يا ميس

غايب

لا يا ميس ده كان موجود الصبح

روح يا حبيبى عنده ظروف و روح

طب مش كان يقول

معلش نسى ياخد الاذن من سيادتك اترزع بقى


بصوا يا سنه رابعه خلوها حصة حلوة و خلوها تعدى من غير ما انكد على حد فيكم اللى عايز يكتب واجب ناقص له يكتبه اللى عايز يطلع ياكل ياكل و اللى عايز يشرب يشرب بس مش عايزة صوت ماشى

حاضر يا ميس

بس العيال ابتدوا صوتهم يطلع

و انا قاعده على اول ديسك مش قادرة ازعق حتى

بس يا ابنى انت و هو مفيش فايده

يا بت اتهدى و بطلى كلام و لا حياة لمن تنادى

المهم قولت اهى حصة استحملها و خلاص و بينى و بينكم كنت مزعقة كتير فى الحصة اللى فاتت فماكنش فيا حيل

و هما فضلوا يتكلموا كده بتاع ربع ساعه لغاية ما لقيت مدرس بيفتح عليا باب الفصل

هو الفصل ده ما فيهوش حد و لا ايه ؟

ايوة يا مستر خير

يا ميس مش عارفين نشتغل

ليه ؟

الصوت يا ميس مش عارف اشرح حاجه

خلاص يا مستر سورى انا هاسكتهم

يا ريت

يعنى انا ادخل اعدادى العيال تتكلم انزل ابتدائى العيال تتكلم ابتديت احس انى مدرسة فاشلة

لأ مش ممكن استسلم لهم بسهولة كده

روحت مقومه البنت اللى فى اول ديسك

انزلى المعمل هاتى لى الخرطوم

و البنت اول ما طلعت بيه العيال بقوا زى الكلاب اول ما شافوه اتكتموا

الارهاب برضه ما يضرش مع الاشكال دى

على الله بقى اسمع صوت حد فيكم يا سنه رابعه مفهوم و على الله حد يقول لى تويليت او اكل او شرب هايبقى يومه مش فايت اللى هايطلب حاجه هاينضرب و اللى هايشتكى من حد هاينضرب

يا ريت بقى ما حدش يتفزلك و يقولى ما استغلتيش الحصة ليه فى حاجه مفيده

تعالوا اقفوا 5 حصص ورا بعض بتشرحوا و تشتغلوا عملى و تكتبوا على الكمبيوتر و تيجى الحصة الفاضية اللى لسه بعدها هادخل حصة اعدادى كمان و تجيلى حصة احتياطى و يبقى مطلوب منى اكون فريش و اتعامل مع العيال بالراحه و بعدين ما انا كنت كويسة معاهم بس هما اللى قلوا بأصلهم معايا

المهم وقفت لهم تلت ساعة و انا مش عايزة اتحرك من قدام البورد و هما باصين لى و خايفين ينطقوا

لغاية ما لقيت بنت بتعيط فجأه و من غير ما اعملها اى حاجة

مالك بتأوأى ليه

مفيش

مفيش ايه مالك يا بنتى انطقى

يا ميس مفيش حاجه خلاص

يا بنتى يا تتكلمى يا تبطلى عياط مش ناقصاكى الحكايه انتى كمان

حاضر هابطل عياط و هى بتعيط برضه

استغفر الله العظيم من كل ذنب عظيم حد عارف البنت دى بتعيط ليه

اه يا ميس انا عارفه

ليه يا حبيبتى

اصلها عايزة تروح التويليت و خايفه تقول لحضرتك لحسن تضربيها

ايه ده هو انا اتغبيت قوى كده

( حسيت انى شديت على العيال جامد )

طب ما تقولى يا حبيبتى

يا ميس ما حضرتك قولتى هاتضربى اللى عايز يروح التويليت

لا يا حبيبتى خلاص روحى

شكراً يا ميس

سنه رابعه لو عايزين تاكلوا او تشربوا اتفضلوا مش مشكله بس المهم ما يطلعش صوت اوكى

و لسه هاقول يا هادى و هابتدى اقعد ارتاح شوية لقيت سحس بمب بيفتح الباب

فى ايه يا ميس

خير يا مستر

البنت اللى لسه طالعه من الفصل دى بتعيط ليه

مفيش حاجه يا مستر

مفيش حاجه ايه و بعدين ايه اللى فى ايدك ده يعنى حضرتك تدخلى حصة احتياطى تقومى تضربى البنت لحد ما تعيط

حضرتك شوفتنى باضربها

لأ بس هاتعيط ليه و بعدين الخرطوم اللى فى ايدك ده بيعمل ايه معاكى

ما بيعملش يا مستر اصل المعمل كان فاضى و هو بيخاف يقعد لوحده فطلع ورايا

افندم حضرتك بتهزرى ضاربه بنت و بتهزرى

يا مستر قولت لحضرتك ما ضربتهاش

و لسه هاكمل و هازعق لقيت البنت جت من التويليت

انا ضربتك يا حبيبتى

لأ يا ميس ما ضربتنيش

ما تخافيش يا ماما لو الميس ضربتك قولى

لأ يا مستر ما ضربتنيش و الله

امال كنتى بتعيطى ليه

اصلى كنت عاوزه اروح التويليت

طب و فيها ايه

اصل الميس قالت ما حدش هايروح

ليه كده يا ميس

يعنى الراجل ده بيتلكك لى و عايز يلبسنى اى مشكلة و السلام

كنت معقباهم يا مستر عشان بيتكلموا

و هو العقاب بيبقى بالطريقة دى

مستر انا من ساعة ما دخلت المدرسة دى و انا باتعامل مع تيران اعدادى فماتجيش حضرتك دلوقتى و تدخلنى حصة ابتدائى و عايزنى اتعامل مع العيال عادى انا اساسا نسيت التعامل مع الاطفال بيبقى ازاى

و هى دى مشكلتى انا يا ميس

لأ يا مستر مش مشكلتك مشكلتى انا و هابقى احلها ان شاء الله . حضرتك عايز منى حاجه تانية

لأ شكرا بس بالراحه شويه على العيال

حاضر

المهم بقى انى كان نفسى امد ايدى عليه اقوله و انت مالك يا حشرى يا رخم يا رذل اديله نص و هو خارج من الفصل اعمل فيه اى حاجه بس ما ينفعش ما هو الناظر برضه و ليه برستيجه فى المدرسة الهى ينشك فى برستيجه البعيد

تانى يوم داخلة حصه اعدادى

لقيت ولد جاى يقولى ايه اللى عملتيه ده يا ميس

عملت ايه

اللى عملتيه مع رحمه

رحمه مين يا بنى ادم

رحمه اختى

اختك . طب و انا مالى باختك

مارضيتيش توديها الحمام لحد ما عيطت حرام عليكى يا ميس دى عيله صغيرة

و انت مالك يا رذل

مالى ازاى اختى يا ميس

اختك فى البيت يا حبيبى لكن هنا انت وهى تاخدوا بالجزمة

طب على الله اختى تيجى تقوللى انك ما وديتهاش الحمام تانى

على الله ايه ؟

البت يا ميس كانت هاتموت و بعدين انا قولت لها الميس ما بترفضليش طلب يعنى لو كانت عرفت انك اختى كانت هاتوديكى على طول

ده بأمارة ايه ان شاء الله تكونش من بقية اهلى

لأ بأمارة انك بتحبينى

لأ مش باقبلك

بس برضه هاتوديها ماشى

ادخل جوه بدل ما اضربك بقى انا كل ده واخده الكلام بهزار ما تخلنيش اقلب عليك

ماشى هادخل بس اوعى تهزى صورتى قدام البت

بعد كده كنت فى المعمل و لقيت البنت عندها حصة كمبيوتر

بقى انتى رايحه تشتكى للحمار اخوكى

لا يا ميس و الله ده مستر حسن كان بيسالنى كنت باعيط ليه قدامه فحكيت له

منك لله يا سحس بمب

طب ماشى

و بابص لقيت السوسة بتغمز لصاحبتها اللى قاعده جنبها و راحت جايه عليا

باقولك يا ميس هو انا ممكن اروح الحمام

نعم

اصل اخويا قاللى قولى للميس و هى مش هاترفض

هو انا اللى باديكى الحصة

لأ

طب قولى للميس اللى عليكى

فراحت للميس اللى عليهم يا ميس ممكن اروح الحمام

روحى يا رحمه

لأ بعد اذنك يا ميس مش هاتروح ابقى أوأى بقى و اشتكى لعنتر فجله بتاعك اترزعى مكانك يا بنت