نزلت الامتحان و العيال امتحنوا و الورق جالى و عينكم ما تشوفش الا النور زى ما اكون كنت بادرس فى مدرسه تانية و لناس تانية و العيال دى زى ما تكون ما شافتش برمجه قبل كده


 لدرجة انى شكيت ان الورق اتوزع على فصول غير اللى انا باديها


و هى دى فرصتى بقى للانتقام


 طلعت الفصل و ما نسيتش اخد معايا دراعى التالت

 أيوه الخرطوم

 دخلت الفصل و الورق فى ايدى

 قام واحد رذل ايه يا ميس صححتى الورق

 ايوه يا زفت صححته

 و انا نجحت

 استنى على رزقك و ارجع مكانك دلوقتى

 ماشى

 و ابتديت بقى انده الاسامى و اوزع الورق

 احمد حسن

 نعم

 ايه الدرجه الزفت دى 3 من 10

 يا سلام

 اه يا حبيبى 3

 طب و النبى كويس و اد يا محمد جبنا

 طب و محمد ماله

 اصل احنا حلينا مع بعض

 يعنى انتوا الاتنين كنتوا بتحلوا سوا

 اه و الله يا ميس و من غير ما نغش من حد

 طب هات الورقه يا حبيبى

 ليه

 هاتها بس

 و روحت مغيرة الدرجه و خليتها 1.5

 ايه ده يا ميس

 هو كده 1.5 ليك و 1.5 لمحمد قسمة العدل

 يا نهار اسود

 اسود على دماغك يا متخلف و ضربته و قلت له ادخل مكانك قبل ما اكسرك

 حاضر


..........................


 و ندهت للتانى عمرو جابر

 نعم

 بص يا عمرو قبل ما اديك الورقة لف كده ورينى ضهرك

 ليه

 لف بس

 حاضر

 الواد لف

 طب خلاص قولى بقى انت بتداريه ازاى

 بادارى ايه

 الديل

 نعم

 ما هى دى اول مرة اشوف حيوان من غير ديل

 فى ايه يا ميس

 فيه ايه انت يا اخى ده انا لو بادرس لبقر كانوا فهموا حاجه لكن تجيب صفر ليه يا ابنى

 انا اسف يا ميس

 اسف ايه و ضربته برضة و قلت له غور يالا ادخل مكانك


..........................


 و ندهت للى بعده

حسن باشا

 نعم

 نعم الله عليك يا حبيبى ممكن اعرف جبت عشرة ازاى

 بمجهودى يا ميس

 عشرة من عشرة بمجهودك ازاى يا ابنى هو انا تايهه عنك

 يا ميس و الله بمجهودى

 طب تعالى و كتبت له سؤال و قلت له حله

 يا ميس ده سمسون صغير ده انا احله بصباع رجلى

 كده طب ماشى

 و مسحت السؤال و كتبت واحد اصعب منه

 خد بقى الجوين ده

 فقام لى واحد و قالى ايه ده يا ميس أصلى و الله

 ما انا عارفه يا رذل و بعدين اترزع مكانك

 و بصيت للأخ حسن ما تحل يا عم الحج

 حاضر بس انا مش هاقدر على ده

 ليه يا حبيبى

 اصل انا صدرى بيوجعنى

 ولا ما تهزرش و حل السؤال

 لأ مش عارف

 عشان تعرف انك غشاش

 غشاش ايه يا ميس ده انا خايف اخد اوفر دوس

 و روحت واخده الورقة وكتبت عليها غشاش

..........................


 محمود على

أيوان

 خد يا ظريف 7

 ايه ده انا جبت 7 و الله ما مصدق الحمد لله يا رب

 فى ايه يا ابنى هاتعمل فرح عشان 7

 دى اول مرة تحصل


..........................


 مصطفى عبد الرحمن

 ايه

 جتك اواه ايه قلة الادب دى ازاى ترد على الميس و تقول ايه يا بنى ادم انا بقى عايزة أفهم انتوا بيعلموكوا ايه بالظبط فى البيت

 بيعلمونا نحشش

 تعالى اطلع بره ايه اللى انت قولته ده

 اسف انا باهزر معاكى و الله

 اسف ايه و بتهزر ايه مين بقى يا حبيبى اللى بيجيب لك الحشيش بابا و لا ماما

 ليه كده يا ميس

 مش انت اللى بتقول و بعدين انا باكلمك ليه انا هاعمل لك استدعاء ولى امر بس على الله نلاقيه فايق

 خلاص يا ميس انا اسف و الله

 ماشى خد يا زفت 8 من عشرة خسارة فيك و ضربته عشان قلة الادب

 ..........................


 تامر

 نعم

 9

 طب حلو و الله

 ماشى يا سيدى بس المرة الجايه عايزاك تجيب عشرة

 حاضر يا حبيبتى

 ايه حبيبتك دى يالا

 يا ميس ما انا باحبك زى اختى و الله

 ماشى بس تقول يا ميس

 حاضر مش انا بقى زى اخوكى

 طبعا

 طب مفيش بقى بوسه لاخوكى

 روحت ضارباه بالقلم على وشه

 ليه كده ده احنا بنقول اخوات

 طب ما انا باربيك اهوه مش اختك الكبيرة
امشى مكانك و بطل قلة ادب

 اوكيه يا ميس

 فواحد غلس حب يسخنه قاله يا نهار اسود على القلم اللى كلته

 قلت له فى ايه يا مؤمن ما انا لسه ضارباك على قفاك الحصه اللى فاتت و لا نسيت

 و الفصل كله قعد يضحك عليه




 و قعدت أوزع الورق و ضربت لى كام عيل ساقط بس المصيبة انهم كانوا بيضحكوا لما بينضربوا زى ما اكون باهزر معاهم


--------------------------------



( 7 ) فلاش باك





بعد ما نزلت من الحصة اللى فاتت قعدت مع زمايلى عماله اشتكى من العيال و من قرفهم و انى خلاص زهقت منهم

 فواحده زميلتى قالت لى انا عارفه العيال بقوا عاملين كده ليه ده احنا عمرنا ما كنا كده

لقيت كلامها عمل لى Refresh للذاكرة و خلانى افتكر مواقفى و ذكرياتى ايام ما كنت طالبه

 افتكرت ان عمرى ما كنت باريح اى مدرس من صغرى و كنت على طول بتيجى منى شكاوى كتير قوى


 أول موقف

 انا فاكرة كنت فى الحضانة و كانت عندنا ميس رخمة قوى

 فى يوم كنت بابص من الشباك و كنا فى الفصل لوحدنا لقيتها واقفة تحت الشباك فببراءة الأطفال قلت اخلص منها و جبت كرسى حديد صغير بتاع الاطفال ده و روحت رامياه على دماغها

 بس ربنا ستر و كانت اتحركت قبل ما الكرسى يقع على دماغها

 و هى طبعاً طلعت تجرى على الفصل و سألت مين اللى رمى الكرسى

 فقام واد غتيت و فتن عليا

 و طبعاً ما خلصنيش من ايدها الا ولاد الحلال

 تانى موقف

 كنت فى اولى ابتدائى و كانت الميس بتصحح الكشاكيل و انا قاعده ورا

 أه قاعدة ورا ايه كلكم كنتوا بتقعدوا فى اول ديسك يعنى

 و هى قالت عايزة كراسة الواجب

 و انا طبعاً مش هاطلع للهانم عشان اديها الكراسة

 روحت حدفاها لها راحت لبست فى وشها

 و طبعاً استدعاء ولى امر

 تالت موقف

 كنت فى خامسة ابتدائى و كنت انا زعيمة التزويغ من حصة العربى

 ما كنتش باقبل مدرس العربى ده خالص

 و فى يوم قفشنا واحنا مزوغين من حصته

 و بعت جابنا و طبعاً كلنا انضربنا فى الموضوع ده

 بس انا ايه بقى

 مش هاقول ما انضربتش

 بس العيال كلها قعدت تعيط الا انا وقفت له بابص له بغيظ و ايدى فى وسطى و جايباه من فوقه لتحته بقرف

 و طبعا العيال كلها دخلت مكانها و عدت على خير الا انا استدعاء ولى امر و فضلت متذنبة الحصتين

 بس الحقيقة بابا الله يرحمه قاللى بلاش بصة القرف دى لأنه بنى ادم زينا

 و طبعا سمعت كلام ابويا و من وقتها ما بصتش لمدرس بقرف الا فى ظروف معينة لما كانوا بيضطرونى لكده بمواقفهم اللى زى وشهم

 رابع موقف

 كنت فى اولى ثانوى

 انا فى ثانوى عمرى ما التزمت بيونى فورم خالص

 كنت على طول بالقميص و البنطلون

 يهديكى يرضيكى البسى جيبة يا بنتى

 و انا لا يعنى لا

 فى يوم جه الناظر بيفتش على الزى

 طبعاً اول ما دخل اتصدم قاعده له بالمنظر ده فى اول ديسك

 أه ما انا بقيت اقعد فى الاول عقبال عيالكم يا رب

 فقومنى و كان حظى انى كنت لابسه تاتو فى ايدى

 البلاستيك اللى ما بيتقطعش

 قاللى ايه المنظر ده و هو فى قمة الأرف

 نعم

 فين اليونى فورم

 ما انا لابساه اهوه

 لابسه ايه ده يونى فورم المدرسة

 اه

 أه ايه يا بنت ايه المنظر ده

 معلش يا مستر اصل بابا ما عندوش فلوس يجيب لى اليونى فورم

 يعنى ما عندوش فلوس لليونى فورم و عنده فلوس للزفت اللى فى ايدك

 ده تاتوه

 هاتيه

 حاضر وروحت قالعاه

 الراجل من غيظه حب يقطعه بس ما قدرش

 مستر ما تحاولش ما بيتقطعش عايز مقص و شغلانه كبيره

 فبص لى بغل

 ما تضايقش نفسك و الله ما هاتعرف تقطعه

 و روحت واخداه من ايده ورميته من الشباك

ادينى خلصتك منه و رميته لك خلاص يا سيدى

 قاللى اه خلاص و قال للمستر اللى كان علينا ما تقعدهاش الحصتين بتوعك

 و ابن اللذين وصى الدادة تدخل فى كل حصة تقول للمستر اللى علينا يذنبنى

 بس على مين كنت باصعب عليهم و يقعدونى اصل المدرسين كانوا بيخافوا منى قصدى بيحبونى

خامس موقف

 كنت فى تانية ثانوى

 كانت حصة الرياضة و المستر بتاع الرياضة ما كانش بينزل لى من زور الحقيقة

 فانا قاعده و نفسى اطلع من الحصة و للأسف ما لحقتش ازوغ

 المهم قعدت و ما رضيتش اطلع الكشكول

جه عندى انتى ما بتكتبيش ليه

 مش معايا كشكول

 ليه بس كده

 نسيته

 طب طلعى ورقة اكتبى فيها

 حاضر

 رجع الراجل يكتب بص لقانى برضه ما باكتبش

 ايه ما بتكتبيش ليه

 اصلى اكتشفت انى كاتبه فى كل الكشاكيل فى النص يرضيك يا مستر ابوظ كشكول

 لا طبعا

 و راح قاطع لى ورقه من كشكوله و الله اصله كان راجل طيب الله يمسيه بالخير و جابها لى و رجع يكتب

 روحت نادهه عليه مستر

 نعم

 ممكن قلم

 أه ممكن على وشك

 لأ على وشى ايه قلم اكتب بيه

 لأ اطلعى بره بدل ما ارتكب جنايه النهارده

 حاضر

 و طلعت بس ما مشتش فضلت واقفه له عند باب الفصل مش عايزة ابعد

 فصعبت على الراجل و قاللى طب ادخلى يا بنتى اسمعى الشرح و ابقى هاتى الكشكول المرة الجاية

 لأ ده انا واقفه هنا عشان الناحية التانية شمس مش عشان الشرح كتر خيرك يا مستر انا مرتاحه كده

 بس انا مش مرتاح غورى فى داهيه وعلى الله اشوف وشك فى حصتى تانى


 سادس موقف

 كنت فى تالته ثانوى

 بقى احنا بعد ما فشلت محاولاتنا فى التزويغ من المدرسه بسببى

 لأننا كل مرة كنا بنزوغ كنا بندى البواب 3 جنيه و نزوغ

 ففيه مرة حبيت ارخم عليه ففتح لنا الباب و بيقولى الفلوس

 قلت له روح اشتكينا للمديرة و جريت انا و صحابى

 المهم اننا بعد الموقف المنيل ده ما بقيناش عارفين نزوغ

 و احنا ماشيين فى الحوش لقينا اعلان عن تنظيم فريق للكشافه

 قلت لهم بس فرصتنا و بكده مش هانحضر الحصص و هانفضل اليوم كله فى الحوش كشافه بقى

 روحنا كتبنا اسامينا عند الكابتن اللى جايبينه ينظم الفريق و لقيناه واد صغير و شكله لسه متخرج و أمور

 المهم اول يوم فى الكشافة نزلنا من اول حصة

و ده قالنا بصوا انا رايح مشوار اجى الاقى الاوتاد اتدقت عشان نبتدى الشغل لما اجى

 طبعا احنا و لا فى دماغنا حاجه قعدنا نلعب و نرغى لحد ما جه هو الساعه 11

 الراجل اتصدم لقى الحوش زى ما هو و ما عملناش حاجه خالص

و بصوت عامل زى المدفع اجمعوا كلكم قدامى

 وقفنا كلنا فى الضل

 لأ تعالوا هنا فى الشمس

 انا لما اقول كلمه تتسمع و عقاباً ليكوا هاتفضلوا ساعتين فى الشمس

 قلت الله اما اغزيك يا شيطان و لبست الكاب عشان الشمس

 راح جاى مطيره من على دماغى

 ايه ده

 فى ايه

 بترمى الكاب ليه يا كابتن

 ما هو انا مش موقفك عشان تلبسى لى كاب احنا كنا فى الجيش بنقف بالست ساعات فى عز الشمس

 جيش ايه اتارى الواد يا عينى طلع سايكو و جاى يطلع عقده علينا و مش واخد باله اننا بنات

 فروحت جايبه الكاب من على الأرض و قلعت الشارة و روحت رامياهم له جنبه

و قلت له معلش يا كابتن اصل انا وحيده و ما ليش جيش

 و بصيت لاصحابى راحوا كلهم عملوا زي ما انا عملت


سابع موقف

 كنت فى اولى المعهد

 حتى دكاترة المعهد ما سلموش منى

 كنت داخله متأخرة

 و الدكتور ما بيحبش كده طبعاً

 فوهو قاعد فى مكانه و من غير ما يبص لى

الحماره اللى داخله دى تطلع بره

 ما هو حضرتك راجل كبير و قد ابويا الله يرحمه و عشان كده مش هاقدر أرد عليك

 و بابص لقيته قايم يجرى و الله العظيم

 بس انا ايه طيران كنت بره المعهد خالص ما لحقنيش الحمد لله و احنا ساعتها كنا لسه فى سنه اولى يعنى ما حدش كان لسه يعرفنى فى الدفعة و الا كنت اتشنيرت خالص


سورى يا جماعه على المصطلح اللوكال بس من عاشر القوم بقى و انا معاشره مجرمين بقالى فترة


ثامن موقف


 كان فى امتحان عملى و كان الدكتور بيسأل كل واحد سؤال واحد بس واللى ما يعرفش يجاوب فى ساعتها ياخد صفر

 انا جه الدور عليا بيسألنى ما عرفتش اجاوب

 راح كتب لى صفر

 فبصيت له باستعطاف و صعبت عليه


 راح قالى انتى شكلك مذاكرة يا بنتى خلاص انا هاسألك سؤال تانى

 حاضر يا دكتور اتفضل

 و سأل سؤال اسهل من الاولانى

 و انا برضه ما رديتش

 ايه يا بنتى ده سؤال سهل خالص و من المحاضرة اللى فاتت

 ثوانى بس هافكر

 الراجل بمنتهى الغيظ اللى فى الدنيا تفكرى ايه انا غلطان ومش صفر واحد بس لأ صفر تربيع و اطلعى بره






 كل ده طبعاً غير مدرسين التدريب اللى كنا بنطلعهم معيطين من الحصص


 كفايه كده بقى لا تقولوا عليا كنت مشاغبة و لا حاجة انا باحكى لكم بس


بصراحة لما افتكرت اللى كنت باعمله قلت اللى العيال بيعملوه فيا ارحم برضه من اللى كنت باعمله