و دى مش نكدية خالص

يا وفاء يا فوفا

انت جيت ؟

اه عامله ايه يا قلبى ؟

يعنى هاعمل ايه بعمل الغدا 

ربنا يقويكى يا حبيبتى

ايوه هو ده اللى انا باخده منك كلام بس هو ده الحاجة الوحيدة اللى انت فالح فيها

فى ايه بس يا حبيبتى مالك ؟

مليش 

لا بجد احكى لى مالك يا حبيبتى

احكى ايه و زفت ايه بس و النبى تسيبنى فى اللى انا فيه انا مش ناقصاك

فى ايه بس يا قمر

اه قمر صح اهىء اهىء اهىء

بتعيطى ليه بس

بعيط على حظى الاسود 

ليه كده طيب

يعنى مش عارف ليه بقالك قد ايه ما خرجتنيش 

ما خرجتكيش ازاى احنا مش لسه اول امبارح كنا سوا فى فرح بنت خالتك

و النبى ما تفكرنى بالفرح 

ليه ده كان جميل

ما هو ده اللى فارسنى هى دى الافراح و لا بلاش مش فرحنا

ماله بس فرحنا

كان اورديحى يا اخويا

اورديحى ازاى بس احنا مش متعشيين يوميها ببطة و 4 اجواز حمام

انت بتنكت 

و ما انكتش ليه بس ده كان اجمل يوم فى حياتنا

حياتك انت اه طبعا لانك اتجوزتنى فيه لكن انا كان اسود يوم فى حياتى كان مالى انا بالجواز و بالهم ده ما انا كنت معززة مكرمة فى بيت ابويا 

و هو انا ببهدلك يعنى ؟

ايوه قاعدة لوحدى زى قرد قطع من صباحية ربنا لحد ما سيادتك تتكرم و تتعطف و ترجع البيت

طب و هو انا كنت مانعك من الخروج

يعنى هاخرج اروح فين يا حسرة

لو عايزة تشتغلى يا حبيبتى اشتغلى

اشتغل !!!!!! اشتغل ليه ان شاء الله هو انت كنت متجوزنى علشان اشتغل و اتبهدل

طب اعملك ايه انا طيب لا عاجبك قعدة البيت و لا عاجبك الشغل 

انت كمان بتزعق لى 

لا يا حبيبتى ما بازعقش بس انا بجد احترت معاكى علشان ارضيكى

لا ترضينى و لا بتاع سيبنى انت بس فى حالى و انا ابقى كويسة

خلاص يا وفاء انتى حرة اقولك على حاجة اخبطى دماغك فى الحيط و الشقة 3 اوض يعنى قدامك بدل الحيطة 12 دى بقت عيشة تقصر العمر

و طبعا استمرت الاخت وفاء فى العياط و الندب لمدة 4 ساعات متواصلة حتى الغدا سابته ياكله لوحده