طبعا مبدئيا تحية لكل زملكاوى

و لكل الاهلاوية برضه مش مشكلة

ما تقلقوش كلمة اهلاوى دى عن قريب ان شاء الله مش هاتشوفوها تانى

( بعد نصايحى الكل هايبقى زملكاوى )

بصوا بقى يا جماعة

انا طول عمرى زملكاوية

من يوم ما ربنا خلقنى و انا و الحمد لله كده

عمرى ما اتخيلت انى ممكن اشجع فريق تانى غير الزمالك

و حتى لما الفريق كانت حالته متدهورة كنت برضه بافتخر بكونى زملكاوية

المشكلة اللى بتواجهنى دلوقتى ايه بقى ؟

عارفه ان مافيش حد مهتم يعرفها

بس هاعتبركم قولتوا لى ايه

و هارد عليكم

انا دلوقتى لما باتناقش مع الاطفال و الشباب الصغيرين باشوف ان فريق الزمالك بالنسبه لهم مش فريق مهم زى الاهلى

طب الحل ايه دلوقتى

العيال دى ما شافتش انجازات الزمالك

و علشاتن نبقى واقعيين احنا علشان تبان لنا كرامات تانية قدامنا شوية لسه

يبقى نعمل ايه

انا من ناحيتى يوم ما ربنا يكرمنى بطفل هاخليه زملكاوى غصب عن عينه و عين اللى يتشدد له

ده بالنسبة للبامبينو بتاعى

طب و باقى العيال هاعمل معاهم ايه

هانسيطر عليهم ازاى

انا يا جماعه من موقعى ده خلف شاشة الكمبيوتر

باطالب كل زملكاوى يخلى ابنه زملكاوى

كل راجل زملكاوى يهدد مراته بالطلاق لو ما شجعتش الزمالك

كل اخ او اخت كبيرة يمارسوا اسلوب القهر و يخلوا اخواتهم زملكاوية ( ماعدا انا طبعا )

اخويا ممكن يحدفنى من البلكونه لو قولت له كده

لكن البركه فيكم بقى

ايه تانى

اه كل مدير يعمل كده مع مرؤسيه

خليكوا معايا يا بنى ادمين و فكروا شوية

اه بما انى سخنت بقى

يبقى ايه كمان يا بت يا دوشة

صفر فى اعمال السنه لكل اهلاوى على ارضك الطاهرة يا مصر

و طبعا الدرجة النهائية و التكريم فى مجلة الحائط و شهادات التقدير لكل زملكاوى

طبعا مش محتاجه انى انوه ان هو ده الأسلوب اللى لازم يتبعه كل مدرس او مدرسة زملكاوية

نعمل ايه تانى فكروا معايا

مش قادرة افكر دلوقتى فى حلول تانية

الموضوع متجدد يا جماعه و البركه فى دماغ الزملكاوية اللى بتطق اشعاع

همتكم معايا

عايزة افكار جديدة و جريئة

و الموضوع برضه ما يسلمش من شوية عنف و قهر

و ارهاب حتى لو استدعى الموقف

الزمالك حديد و راجع من جديد