هى عربية سيدات و لا حمام سيدات

النهاردة كنت فى مشوار و كالعادة ركبت المترو حيث السرعة و الأمان


الواحد ما بقاش بيضمن المواصلات فوق الأرض ممكن يهفه توك توك فى الشارع


المهم ركبت المترو و كالعادة عربية السيدات


شوية و دخل علينا العربية راجل


كل الستات فى العربية اتخضوا خضة كانت ممكن تسبب لهم سكتة قلبية



يا لهوى راجل


انزل بسرعه يا أخ العربية دى سيدات بس


الراجل يا كبد امه اترعب من الهجوم الفظيع اللى اتعرض له


و الله يا جماعه ما اخدت بالى


يا أستاذ بعد كده ابقى ركز و انت بتركب ما ينفعش تدخل علينا العربية كده



حاضر يا ستى و الله ما اخدت بالى و بعدين انا غريب مش من هنا . أعذرونى




انا طبعا كنت هانشل بعيد عنكم


فقلت له خلاص حصل خير حضرتك انزل المحطة الجاية علشان بس مفيش عسكرى ينشك غرامة



و طبعا بعد ما نزل الراجل الوحش انسان الغاب طويل الناب اللى اقتحم علينا خلوتنا ابتدت المناقشة



دى رجالة بتستهبل و الله


على رأيك بيبقوا عارفين كل حاجة و بيعملوا فيها عبط


احنا ناقصينهم نسيبهم بره نيجى نلاقيهم فى المترو كمان


رجاله عايزة الحرق


انا طبعا كنت قاعدة مزبهلة


هو الراجل كان عمل ايه لده كله هو كان دخل عليكم حمام مثلا


يعنى الست صاحبة الهجوم النارى دى جايه معايا فى نفس الميكروباص و كانت قاعده فيه جنب 3 رجالة واحد على اليمين و واحد على الشمال



اشمعنى الرجاله تجوز فى الميكروباص و فى الاتوبيس و فى اى مواصلة عامة بس فى المترو حرام



على فكرة قبل ما حد يفهمنى غلط انا شخصيا ما باركبش غير عربية السيدات


و سمعنى أجدع سلام على طول السلام لنون النسوة و تاء التأنيث


انا مش باركبها لأنى باكره الرجالة


لأ طبعا هما فى الاول و الاخر نعمة ربنا و اللى يكره النعمه تزول من وشه و احنا فى زمن العرسان شحة من السوق


انا باركبها علشان لما العربية تبقى زحمة و المترو يميل بيا يمين يميل بيا شمال اخبط فى واحدة انثى زيى


بس بصراحة انا بقيت باشوف تصرفات تخنق بتحصل دلوقتى فى عربية السيئات قصدى السيدات



ناس كتير بتفكر انها دخلت حمام سيدات مش مواصلة عامه



يعنى مثلا البنات اللى اول ما يركبوا يقوموا قاعدين و فاردين رجلهم على اخرها فى اخر العربية و مفيش مانع يناموا كمان و كل ده لأننا فى عربية السيدات



و الست اللى بتدخل العربية و اول حاجة بتعملها تفك طرحتها و قال ايه الجو نار و فيه منتقبات كمان بيعملوا نفس الحركة و يرفعوا النقاب



غير اللى بتظبط مكياجها و مش بعيد تشد و تعدل فى هدومها كمان



انا اسفه على المثال ده بس انا قريت فى مقال قبل كده صحفية بتقول انها شافت واحده بتستخدم ماكينة ازالة الشعر علشان لابسه بنص كم و كل ده طبعا فى عربية السيدات



يعنى انا بجد كل المناظر دى بتستفزنى


انا اتربيت انى ما اقلعش الطرحة غير فى بيتنا


و ما انامش و افرد رجلى غير على سريرى


و ما احطش مكياج غير قدام تسريحتى ده انا باتكسف اطلع المرايا اشوف الطرحة مظبوطة و لا لأ فى الشارع



لكن الناس دى بتتعامل بمنتهى التبلد فى المترو و ناسيين انه فى الأول و الأخر مواصلة عامة


و بعدين الهوانم اللى بيعملوا كده هما مش ممكن يدخل عليهم العربية راجل زى اللى حصل النهارده


و بلاش موضوع دخول الرجالة انتى مش بين كل محطة و التانية المترو بيقف مش ممكن اللى على الرصيف يشوفوكى و انتى قاعده و مفروده فى المترو


و بعدين هو احنا ما ينفعش نحترم نفسنا بس غير علشان وجود رجالة وسطنا


يعنى فين الحياء بين البنات و بين بعض



ما بتتكسفيش و انتى نايمة مفروده قدامى انا يا ستى باتكسف


ده غير انك بتبقى واخده نص العربية و بتكعبلينا و احنا واقفين


حاجة تحرق الدم بجد