هو بابا عايز منى ايـــــــــــــه يعنى ؟

انا عايز افهم ابنك بيبص لى كده ليه

يا محمود هو بص لك و لا جه جنبك ما الواد فى حاله اهو

بصى له يا اختى و شوفى بيبص لى ازاى ده الواد بيبص لى بقرف زى ما اكون جوز امه مش ابوه

يا محمود انت حاطط نقرك من نقره ليه هو قدك

بصى برضه الواد باصص لى ازاى ده ما بيهونش عليه يضحك فى خلقتى

طب سيبه و اطلع معلش يا يوسف يا حبيبى ما تعيطش ده بابى و الله بيحبك

سكتى يا اختى البيه ابنك

محمود لو سمحت مالكش دعوه بيه انت عايز تعقد لى الواد اللى حيلتى و اللى كنت باترجاه من الدنيا

انا عارف ان انتى اللى هاتبوظى الواد ده بدلعك الزياده فيه

و ما ادلعهوش ليه مش جالى بعد 5 سنين ده انا كنت قربت افقد الأمل انى اخلف

بس ده ولد يعنى لازم نشد عليه انا عايزه يطلع راجل ما ينفعش كل ما يتقمص و يعيط تجرى تحايلى فيه . و بعدين ده واد صايع اصلا انتى ما شوفتيش عمل ايه امبارح فى عيادة الدكتور ده طول ما هو قاعد بيبص للبت اللى قدامه و يضحك لها اللى عمره ما ضحك فى وشى ابدا

يووووووه انت من دلوقتى هاتقول عليه صايع امال لما يكبر هاتعمل ايه هاتطرده من البيت

مش بعيد

طب قوم نام عشان نروح بكرة بدرى نطعمه

هو هاياخد انهى تطعيم بكرة

انت نسيت تطعيم الـ 6 شهور

ياااااه دى الأيام بتجرى هوا ده انا حاسس انك لسه مخلفه امبارح

ضحكت عليكم

لأ بس بجد سيبكم من الرغى اللى فات

و تعالوا نتكلم جد

ليه الأبهات دايما حاطين نقرهم من نقر ولادهم الصبيان

هى دى غيره و لا ايه انا بجد مش قادرة افهم ليه طبيعة العلاقة بين الشباب و ابهاتهم علاقة دايما فيها تحفز و تحدى جامد

ليه مافيش طرف من الاتنين عنده استعداد يتنازل و يسمع الطرف التانى

انا فاكرة لما بابايا الله يرحمه مات واحد زميلى بيعزينى قاللى عقبال ابويا انا كمان

انا عندى الولاد فى المدرسة لما بيقعوا فى مشكلة و تقول لولد منهم هات لى بابا يقولك لأ بابا ما بيتفاهمش و عصبى و مش هايرحمنى

لكن تعالى شوف باباه ده لو اخته البنت هى اللى عندها مشكلة بيبقى حد عاقل جدا و رزين و واقف فى صف بنته

لكن مع ابنه

طبعا ما هو اللى بيقلبه فى ماكينات الحلاقه و فى مفتاح العربية و مش هانقول الهدوم ما هو بابا مابيلبسش باديهات و بناطيل لو ويست

لكن الأب من دول يلاقى صوت الواد على فى البيت و صوته اخشن يركبه 100 عفريت يلاقيه بيقول لأخته رايحه فين و جايه منين يحس ان البساط بيتسحب من تحت رجليه

تلاقيه قلب على الوش التانى و عمل فيها ابا الغضب و الدنيا تقوم و ما تقعدش

عشان العيل اللى كان لسه فى اللفه طلع له حس

و بدل ما يبتدى يوجهه لأ تلاقيه بيحاول بكل طريقة يكتم حسه و لا صوت يعلى فوق صوت سى السيد بابا

ليه المثل بتاع لو كبر ابنك خاويه ما بقاش موجود

و العكس بقى تلاقى الأمهات بيدلعوا الولاد دلع فظيع اصله الحيله اصله جاى لى بعد البنات اصله سندى فى الدنيا اصله و اصله لحد ما شوية شوية هاتقول اصله سبعى و جملى و الراجل اللى جوه ده مالهوش لزمة

ليه الأبهات دايما اميل للبنت و الأمهات اميل للصبيان مع ان الاتنين محتاجين الأب و الأم مافيش حد يقدر يستغنى عن حد منهم

لكن دايما تلاقى البنت حبيبة ابوها و الولد ننوس عين امه


بجد الموضوع ده بينرفزنى لأنى عانيت منه جدا بعد موت ابويا طول عمرى ماكنتش قريبة من حد غير ابويا و امى طول عمرها كانت اقرب لأخويا

عشان كده بعد موته حسيت بوحده فظيعه لكن ماما ربنا يخليها لى قدرت بحنيتها اللى عمرى ما شوفت زيها و بابا عايش تقرب منى و تعوضنى

و لأنى برضه باشوف اخوات اصحابى كلهم عندهم نفس المشكله

كل يوم واحده تيجى تقولى بيتنا كان قايد حريقة امبارح

ليه يا بنتى

بابا و اخويا كانوا بيتخانقوا و فى الأخر اخويا ساب البيت و بات بره

بيتنا الحمد لله ما حصلش فيه كده لأن بابايا مات و اخويا لسه صغير

يا جماعه حاولوا تقربوا من ابهاتكم

هما اكيد فى شوية غيره على حبة غيظ يعنى اشمعنى انت بتخرج و تسهر و عايش حياتك بالطول و العرض و هو شقيان و طالع عينه

يا شباب اتعبوا شوية و قربوا منهم و حسسوهم انكم مقدرين تعبهم

صدقونى الموضوع ده بيجيب نتيجه حلوة قوى