النهارده عايزة اشرككم معايا فى حاجة حصلت لى
بس ليا طلب وحيد منكم
ما تركزوش معايا قوى علشان ماحدش يهيس منى
انا شخصيا باكتب الموضوع ده و انا فى قمة التهييس و حالتى ربنا الاعلم بيها
استحملونى و الاجر و الثواب عند الله
( استحملنى شكرا )
المهم ندخل فى الموضوع بقى
اولا و قبل اى حاجة عايزة اتحسبن على عم احمد زكى بدر
يعنى انا راضيه ذمتكم انا بقالى ترم كامل مرتاحه من العيال
اول هام قسموا الفصول
( الكثافة بقت ميه ميه و ارتاحنا )
تانى هام قالوا الانفلونزا بتخلص على الناس
( العيال خافوا و بطلوا يورونى خلقتهم )
دلوقتى الباشا بقى رجع المدارس 5 ايام بالكثافه القديمة و اكتر كمان ده غير انه بيطمن الناس
طب تطمنهم ليه ما احنا كنا كويسين و العيال كانت خايفه و المدرسة كانت فاضية
حسبى الله و نعم الوكيل
المهم لأن مش ده موضوعنا برضه
تولع المدارس
اه تولع ما انا هاسيبها خلاص
ده القرار اللى اخدته فى لحظة تجلى و بعد وقفه صريحة و مباشرة مع النفس
هاتقدرى تستمرى فى المدرسة يا دوشة
لأ مش هاقدر
اخر كلام يا بنتى
ايوه اخر كلام
الدنيا مش مضمونه
و ماله اللى خلقنى مش هاينسانى
يعنى كلام رجاله
احنا هانخبط ولا ايه ده كلام بنات اجدع من الرجاله
براحتك يا بنتى اللى بيشيل قربه مخرومه بتخر على دماغه
عارفه و كل حى متعلق من عرقوبه و يا ريت كل واحد يخليه فى حاله
المهم دخلت نمت و قولت اول ما هاصحى هاروح اقدم استقالتى
عملت فيها سبع رجاله مضروبين فى الخلاط و اتعبوا فى جيبه و بلوزة واحده و استعنت على الشقا بالله و قولت اكتب الاستقاله
كتبتها و رزعتها على مكتبه ( صاحب المدرسه )
انتى يا بنتى ايه الكلام الفارغ ده
و انت مالك هو وقتكم خلص معايا كده
فكرى انا الصبى ( قصدى المدرس ) اللى يسيبنى فى نص الدراسه مالهوش مكان هنا تانى
و ماله يا سيدى الارزاق على الله
بكرة تندمى
لما ييجيى بكرة و تلاقينى ماشية باشحت ما تبقاش تدينى فلوس
يا بت اعقلى وراكى جمعيات
ماحصلش
طب وراكى التزامات
التزامات ايه يا حسره ده المرتب مش مكمل تمن اتنين كيلو لحمه و فرختين
خلاص براحتك و انتى الجانيه على نفسك
يعنى خلاص الاستقاله اتقبلت
اه اتقبلت
احسن انا الكسبانه
و طلعت من باب المدرسة و سرت وحدى شريده محطمه الخطوات
طب هاعمل ايه دلوقتى
روحى البيت طبعا
هاروح اعمل ايه
يعنى ايه تعملى ايه
يعنى خلاص كده بقيت عواطليه
اه طبعا
يعنى خلاص مابقاش فى شغل كل يوم ما بقاش ورايا غير قعدة البيت و الكنس و المسح و الطبيخ و الرضاعه
رضاعه رضاعه ايه فوقى يا دوشة ياحبيبتى انتى ابتديتى تهيسى و لا ايه
خلاص معلش المهم هاعمل ايه دلوقتى
هاتدورى على شغل طبعا
طب خلاص انا اطلع على رشا صاحبتى اقدم فى الشركة عندها
فكرة حلوة يالا بسرعه بقى
طلعت على شارع الهرم استنى الميكروباص اللى هايودينى رمسيس حيث الوظيفه الجديدة عند البت رشا فى الشركه
رمسيس يا اسطى
ايوه يا اختى رمسيس اللى يشوفها يقول متعلمه و هى مش عارفه تقرا اللى مكتوب على العربيه
طب بالراحه يا عم ده انا كنت باتأكد
طب يا ستى اتاكدتى اركبى بقى ماتعطلنيش
ايه ده مفيش مكان
يا فتاح يا عليم يا رزاق يا كريم ياستى ما تقعدى فى اى حته و تخلصينى بقى ما العربيه واسعه قدامك اهو
ايوه بس مفيش كرسى فاضى
اقعدى هنا جنب الباب
بينى و بينكم ماكنتش عايزة اتاخر وعربيات رمسيس بقت المستحيل الخامس بعد الغول و العنقاء و الخل الوفى و رغيف العيش المدعم الخالى من الاضافات الحشرية
المهم ركبت و اترزعت جنب الباب
الاجرة يا حضرات و النبى تلموا مع بعضيكم مش ناقص وش وحياة ابوكم
خدى يا بنتى 2
يا انسة خدى 3
يا ابله 3 ورا و هاتى جنية ارباع لو سمحتى
و انا باحسب الفلوس لقيت نفر لسه ما دفعش
اسكت
لأ طبعا
فى واحد لسه ما دفعش ورا
يا جماعه فى واحد ما دفعش ورا
ماحدش بيرد برضه
ثوانى كده بقى لو سمحتى يا حاجة البنت اللى قاعده دى حضرتك دفعتى لها
لأ ما دفعتش
ما ينفعش كده يا امى الكرسى 4 ورا
ليه 4 ؟
هو النظام كده و الله حضرتك هاتدفعى لها ولا ايه
حاضر خدى يا بنتى
اتفضل يا اسطى العربيه كلها اهى
عايزين باقى
لأ ما تقلقش انا لبست عمة ده لده و خبطتهم فى بعض
تسلم ايدك يا ابلة متشكرين
العفو
و نزلت اخر الخط و روحت لرشا وطلع ما عندهاش شغل
رجعت الموقف تانى اخد العربية اللى طالعه الهرم لقيت السواق واقف بيقولى راجعه يا ابله
ايوه يا سيدى راجعه يعنى هاروح فين يعنى
فى حاجة
لأ مفيش متضايقة بس البلد بقت مافيهاش شغل و الحاله بقت صعبه قوى
و مين سمعك يا ابلة بس تصدقى و الله الشغل موجود بس اللى يدور طب ده انا هاموت على منادى يشتغل معايا و يريحنى من النديه و لم الاجرة و قرف الزباين
و الشغلانه دى بتجيب همها يعنى
اه طبعا يوميته 40 جنية
كام
40 جنية
و كل المطلوب منه ينده رمسيس و هرم و يلم الاجرة
اه و يا ريت لاقى تشوفليش حد ينوبك فيا ثواب و النبى
هو لازم حد ما ينفعش حدايه يا اسطى
حدايه يعنى ايه
يعنى انا ما انفعش معاك فى الطلعه دى
اه بس هاتستحملى
هاستحمل طبعا
الموقف و رزالة بتوع الكارته والزباين
و لا يهمك جربنى انت بس
خلاص براحتك انتى حره
ها اعمل ايه بقى
هاتستنى دورنا لما ييجيى انتى عارفه الساعه 11 و بيبقى الموقف هادى الساعتين دول على ما ييجيى معاد خروج الموظفين الا صحيح اسم الابلة ايه بقى
دوشة و انت
محسوبك شوقى كبوت
عاشت الاسامى يا اسطى كبوت
مين اللى عليه الدور
اجرى يا بت دوشة ده دورنا احنا
حاضر يا اسطى
ده دور الاسطى شوقى كبوت استنى
انتى مين يا ست
دى المنادى الجديد بتاعى يا حسن
لامؤاخذه يا اسطى
يالا يا دوشة اندهى بقى
حاضر هرم هرم هرم هرم
العربية دى رايحة الهرم يا بنتى
اه يا حاجة هرم
هرم ايه يا بت
امال ايه يا اسطى
لحد شارع العريش بس
حاضر
عريش عريش
ايوه كده عفارم عليكى
اربعه ورا يا كابتن ادخل الزق فى كتف اخوك و حياة والدك
الكرسى كنز
لأ الكرسى مش كنز ده حضرتك اللى عايز تخس لك بتاع 30 او 40 كيلو
اما انتى لسانك طويل قوى
لسان مين اللى طويل انت اتجننت و لا ايه
فى ايه يا دوشة
مافيش يا اسطى استنى انت بس
ما هو يا اما تلزق فى اللى جنبك يا اما تنزل و تفارقها
خلاص يا بنتى شوفى لنا اى حد سفيف ييجيى جنبنا ورا
هاننقى الزباين كمان استغفر الله العظيم يا رب
العربية كملت و جايه اقعد جنب الباب
انتى رايحه فين يا دوشة
هاقعد يا اسطى
تـ ايه يا اختى يعنى ايه تقعدى
هاقعد هنا جنب الباب
جنب الباب بيقعد نفر يا اختى
امال اعمل ايه يا اسطى
على الباب
اتشعبط
ايوه طبعا تتشعبطى و هاتى الواد اللى رايح هناك ده قعديه مكانك
مش هاعرف و الله يا اسطى
بكرة تتعودى
اصلى ممكن اقع من العربيه
و ماله لما تقعى لك تلات اربع مرات و الاسفلت يهرى جتتك هاتتودكى فى الشغلانه و هاتبقى 100 فل و 14
خلاص اللى تشوفه يا اسطى
يا بت سيبى نفسك ما تتخشبيش فى الباب كده
معلش يا اسطى مش متعوده اتشعبط بالله عليك يا اسطى اقعد جوه
لا حول و لا قوة الا بالله العلى العظيم خلاص اقعدى بس خدى بالك اليومية كده بقت 30 جنية
و ماله فضل و عدل ربنا يديمها نعمه و يمنعها من الزوال
عملنا دور من الهرم لرمسيس و كان موقف الهرم حلو و العربية كملت بسرعه و جينا موقف رمسيس
دوشة
ايوة يا اسطى
روحى ادفعى الكارته
ليه اشمعنى انا
خدى بس ال 2 جنية دول و اديهم للمعلم ناصر اللى قاعد هناك
اتفضل يا معلم ناصر الاسطى كبوت بيمسى عليك
ايه ده ان شاء الله
الكارته يا معلم
كارت احمر لما يبقى يشيعك من الدنيا كلها انتى و الاسطى بتاعك
ليه بس كده يا معلم
اعلى يا بت بـ 3 جنية كمان
حاضر يا معلم
المعلم خد 5 جنية يا اسطى
برضه و انا اللى قولت انه هاياخدهم منك و يسكت لاجل خاطر عيونك
عيون ايه يا اسطى اختشى
خلاص يا اختى ما تتخضيش قوى كده يالابقى ابتدى نديه
حاضر عريش عريش عريش
لأ عريش ايه يا بت احنا وقت زنقه دلوقتى يعنى لحد الطالبيه بس
حاضر يا اسطى طالبيه طالبيه طالبيه
ايه ده الحقى يا بت فى 2 زباين راحوا على العربية التانية
حاضر يا اسطى حمامه
تعالى هنا يا ست
تيجى فين يا بت اتكلى على الله
يا كابتن احنا اللى طالعين
طلعت روحك اجرى على عربيتكم العارجه بدل ما اخليكى تمشى زيها على فردة واحده بس
الواد المنادى مش راضى ينزلهم يا اسطى
و انتى بتعملى ايه ما تحللى التلاتين جنية اللى هاتلبيهم منى و تجيبى الزباين
حاضر يا اسطى
على الله ترجعى من غيرهم لو مش هاتعرفى تجيبيهم اتكلى على الله
لأ هاجيبهم دول 30 جنية يا ناس
انت يالا هات الزباين انزلى يا حاجة من عندك
يعنى انتى مش هاتجيبيها البر انا مش عايز امد ايدى عليكى لأنك واحده ست برضه
تمد ايدك على مين يا حمار انت . انت عارف انت بتكلم مين
انا حمار يا نهار اسود الحقونا ياعفاريت الاسفلت
و خير اللهم اجعله خير لقيت مطواه بتتفتح فى وشى
و وقعت من على السرير
اعوذ بالله من الشيطان الرجيم
بسم الله الرحمن الرحيم
يخرب بيت الكوابيس على بيت سنينها السودا
ليست هناك تعليقات:
إرسال تعليق