سلامو عليكم

 و عليكم السلام يا على حمد الله على السلامه

الله يسلمك العيال فين

كل واحد فى اوضته بيستعد

ربنا يستر

عملت اللى اتفقنا عليه

اه روحت الصيدلية و جبت المطلوب

يا رب نفلح المرة دى و الفكرة دى تجيب نتيجه

ما تقلقيش ان شاء الله خير الصيدلى قاللى هو نص قرص على كوباية عصير و هايبقوا تمام ان شاء الله

انا خايفه قوى انت فاكر المرة اللى فاتت عملوا ايه ؟

فاكر يا ستى بس ان شاء الله المرة دى مش هايحصل حاجه

تفتكر كده

اه بس انتى زياده فى الاطمئنان خبى السكاكين

يا نهار اسوح ده انا كنت هانسى فاكر المرة اللى فاتت لما جريوا على المطبخ ده انا كنت هاموت ساعتها

ما هو انتى عجبتينى ساعتها لما وقعتى من طولك و خليتى البت توته قعدت تصوت . هى فين صحيح مش سامع لها حس

بعتها عند اختى من الصبح . المرة اللى فاتت كانت هاتنداس فى الرجلين لما قاموا على بعض

طب احسن برضه . ما هى ماينفعش تشوف اخواتها و هما فى الحاله دى

ماما . يا ماما

 نعم يا حبيبى

 جهزتى الغدا و لا لسه

 اه جهزته يا مصطفى

ايه يا درش مافيش ازيك يا بابا

معلش يا بابا اصلى متوتر شويه

ليه يا حبيبى ماتهدى كده ده ماحدش واخد منها حاجه

ماحدش واخد منها حاجه . يا بابا النهارده لو حصل زى كل مرة هاموت نفسى و لو ابنك فتح بقه معايا و الله لاموته لك هو كمان

 هاتموت مين يا مصطفى

 هاموتك يا محمود

ماتحترموا نفسكم بقى اعملوا احترام لوجودى

الله انا مش من الصبح قولت لكم كل واحد فيكم على اوضته و ما تطلعوش الا ساعة الزفت الماتش

 ماشى يا ماما على العموم الماتش قرب كلها ساعتين

طب هما مش هايتغدوا و لا ايه

انا هادخل لكل واحد فيهم اكله فى اوضته مش عايزينهم يقوموا على بعض من دلوقتى خليهم كل واحد فى حاله

انا كل ما ابص لهم بابقى مش طايق اخوكى حسن

طب و حسن ماله

مش هو اللى كبرها فى دماغ مصطفى و خلاه يشجع الزمالك فيها ايه لو كان بقى اهلاوى زى محمود مش كان زماننا مرتاحين دلوقتى

يا سلام يا اخويا طب ما هو جمال اخوك هو اللى خلى محمود يشجع الاهلى

اذا كان جمال و لا حسن الاتنين منهم لله انا كان نفسى يطلعوا زيى لا باحب الكورة و لا باطيق اسمع سيرتها

و مين سمعك هو احنا كنا عمرنا بنتفرج على ماتشات انا مش عارفه يا اخويا العيال دول لو ما كانوش توأم كانوا عملوا ايه فى بعض

 احلام حضرت لكل واحد فيهم الغدا بتاعه و دخلته له اوضته

عملتى العصير يا احلام

باعمله اهوه هو الراجل قالك احط قد ايه فى كل كوبايه

نص قرص . اوعى تكترى لا العيال تروح فيها

لا ما تخافش . بس هو مفعوله بيشتغل بعد قد ايه المهدىء ده

بعد ساعتين من دلوقتى و بيقعد مفعوله 4 ساعات . هو الماتش الساعه كام

محمود بيقول الساعه 7

طب كويس قوى و الساعه دلوقتى 5 يبقى كده تمام قوى يعنى ساعتين الماتش و ساعتين بعد الماتش كمان يكون التحليل خلص و الشوارع هديت

مصطفى و محمود شربوا العصير

و بعد ساعة لقوا محمود طالع من اوضته بيشغل التليفزيون

فى ايه يا محمود مش لسه فاضل ساعة على الماتش

اه يا بابا بس هاتفرج على شوبير

 مصطفى طالع من اوضته و لافف نفسه بعلم الزمالك . اقلب ياض الراجل ده انا مش باقبله

 و انت مالك تقبله و لا ما تقبلوش انا هاتفرج عليه

 انا باقولك اقلبه احسن لك

 مصطفى ما تخلينيش اقوم لك و خللى يومك يعدى على خير

يا ولاد صلوا على النبى و اهدوا كده ده لسه فاضل ساعة على الماتش ما تسمعوش صوتنا للجيران من دلوقتى ابوس ايديكم

 يا ماما يعنى انتى مش شايفه ابنك هو متعمد يجيب الراجل اللى اسمه شوبير ده رغم انه عارف انى ما باحبهوش

محمود اطفى التليفزيون و خش اوضتك دلوقتى و انت كمان يا مصطفى التليفزيون مش هايتفتح الا على الماتش

بس يا بابا

اسمعوا كلام ابوكم بقى

 انا عارفه انت مش عايز تجيب لكل واحد فيهم تليفزيون ليه

اه و ماله اجيب لكل واحد تليفزيون و اجيب لكل واحد دش و بالمرة اجيب للمفعوصة الصغيرة واحد هى كمان عشان الكرتون

طب ايه رأيك بقى انا هاعمل جمعية عشان اجيب تليفزيون و دش تانى عشان نخلص من وجع القلب ده

ربنا يسهل المهم بس ان مفعول المهدىء يشتغل قبل الماتش مش عايزين نخسر حد من العيال بسبب الكورة

الساعة 7 و الماتش ابتدى و الحمد لله مفعول المهدىء اشتغل

 ايه ده يا على العيال بتتفرج على الماتش و هما بيضحكوا
سبحان الله ده المهدىء ده عامل زى السحر اول مرة يتفرجوا بهدوء كده

 الماتش خلص تعادل و قاموا الاتنين حضنوا بعض و قعدوا تانى يتفرجوا بهدوء

بابا هات الريموت عشان اقلب و اجيب قناة الحياه

ليه يا حبيبى ؟

عشان نتفرج على شوبير . انت عارف ان محمود بيحب يشوف تحليله بعد كل ماتش

 اه بس انت يا مصطفى يا حبيبى ما بتحبهوش

 لا عادى يا حوده خلينا نتفرج

 و قعدوا ساعتين يتفرجوا

هو شوبير ده هايخلص امتى الساعه داخله على 11 و مفعول المهدىء قرب يخلص

انا عارف الراجل ده بيطول كده ليه . ده لو عامل تقرير عن حرب مش هايطول كده

انا خايفه مفعول المهدىء يروح و العيال تفوق لنفسها تانى

طب اجرى اعملى كمان اتنين عصير بسرعه

ايوه بس ده مفعوله بيشتغل بعد ساعتين

اه صحيح . اقولك حطى لكل عيل برشامة فى كوبايته و لا اقولك خليهم اتنين

يا راجل لحسن العيال يجرى لها حاجه

و الله يبقى احسن هانبقى احنا الكسبانين ساعتها

طب انا هاقوم اعمل العصير و انت خللى عينك عليهم

حاضر بس بسرعه ما تطوليش

و شوبير كالعادة نازل تقطيع فى الزمالك زى ما يكونوا قتلوا له قتيل

 و طبعاً كان واضح ان أداء الزمالك تراجع فى الفترة الاخيرة من المباراة و لولا الاصابات اللى فى فريق الاهلى كان أكيد هايفوز بسهولة يعنى التعادل من وجهة نظرى نتيجة غير مرضية بالمرة يالنسبة لجمهور الاهلى لكن طبعا بالنسبة لجمهور الزمالك ما كانوش يحلموا باكتر من كده و المفروض يبوسوا ايديهم شعر و دقن
 نياهاهاهاهاها

 ههههههههههههه

 انت بتضحك على ايه يا متخلف

 مين ده اللى متخلف

انت طبعا و بعدين مين اللى جاب القناة دى

فى ايه يا مصطفى ما تهدى يا حبيبى

اهدا ايه مين اللى جاب الراجل ده يا بابا

اقلب التليفزيون يا محمود عشان اخوك

اقلب ايه ده انا هاقوم اقلب عليه ترابيزة السفرة لو ما اتكتمش و خلانا نتفرج على اللى احسن منه

 احسن من مين يا محمود

 احسن منك و لو ما اتكتمتش مش هايحصل كويس

 يعنى هاتعمل ايه يعنى

 هافرجك هاعمل ايه و قاموا على بعض زى المجانين

بسرعه يا احلام هاتى العصير

الخلاط مش عايز يشتغل يا على

يا نهار اسود دول رايحين على المطبخ خبى السكاكين و اجرى استخبى يا احلام







(( انا زملكاوية جداً جداً جداً ))