و شايف علشان توبتى تبقى نصوحه انى لازم افضفض لكم عن كل حاجة مريت بيها فى الشغلانه دى
لازم احكى لكم عن كل حاجة
و هابتدى معاكم من الأول خالص
من اول يوم امى خدتنى و راحت للشيخ عباس علشان يشغلنى معاه
صباح الخير يا سيدنا
صباح الخير يا ام حنكش عامله ايه و العيال اخبارهم ايه
بيبوسوا ايدك يا سيدنا و مش ناقصنا غير رضاك و عايزين الصله اللى بينا ما تطقعش
و الله يا ام حنكش انا كمان عايز نفضل على صله انتى عارفه ان ابو حنكش كان احسن واحد اشتغل معايا
و حنكش ما يتخيرش عن ابوه
و الله انا استمنى طبعا بس هو عنده استعداد
طبعا عنده انت عارف ان حنكش كان ملازم ابوه زى ضله فى كل عمليه و الواد سر ابوه بقى
طب و الله يا ريت نجربه
يا ريت يا سيدنا ده يبقى يوم المنى و الله
قولت ايه يا حنكش عايزين نسمع صوتك
قولت اللى تؤمر بيه يا سيدنا . انا تحت امرك و من ايدك دى لايدك دى
خلاص على بركة الله تجيى لى من بكرة نبتدى الشغل
من النجمه هاكون عندك يا سيدنا
استنونى بقى فى اول حلقه
محسوبكم حنكش ابن عفركوش ( عفريت ابن عفريت معفرت و مأصل )
-----------------------------------------
العمليه الأولى
النهارده اول يوم شغل زى ما انتوا عارفين
صحيت من النجمة طبعا و حضرت نفسى و طرت على الشيخ عباس فى لمح البصر كنت عنده
( عفريت بقى )
صباحو يا سيدنا
صباح الخير يا سيدى مواعيدك حلوة يا حنكش طالع لابوك
ما انت عارف يا سيدنا لا فى مواصلات هاتعطلنى و لا ازمة مرور هاتوقفنى هى ديتها ايه اقوم اطس وشى بشوية جاز علشان ينور و يشعلل و اجى لك على طول
ماشى يا سيدى بص بقى احنا النهارده فى شخصية مهمة قوى جاية لنا
مين يا سيدنا
دلوقتى هاتعرف بس عايزك تبقى قاعد معانا علشان تعرف العملية محتاجة ايه
هالزق لكم ما تقلقش
بس عايزك ماتظهرش مش عايزين نصرع الراجل ده راجل كباره و ليه وزنة فى البلد
خلاص ما تقلقش هاشغل خاصية الـ invisible
يعنى ايه
يعنى هاختفى يا سيدنا
طب و حياة امك ما ترطن تانى علشان نعمر مع بعض
لامؤاخذه يا سيدنا
الضيف وصل يا سيدنا
خليه يدخل يا ام السعد . حنكش اخفى بقى
سلامو عليكم يا سيدنا الشيخ
و عليكم السلام يا باشا . طلباتك يا سيد الناس
انت عارف ان دى اول سنه ليا فى الوزارة و انت عارف برضه ان اهم حاجة بتخلى وزير التربية و التعليم يعمر فى كرسيه هى الثانوية العامه
عارف طبعا دى الثانوي العامة دى بتبقى موسم
انا بقى عايزك السنه دى تغير اسلوبك فى الموسم ده
ازاى يعنى
يعنى السنه دى عايز الامتحانات تيجيى صعبة و العيال تحتاس
ايه الطلب الغريب ده
بص يا سيدنا البلد مش ناقصة و والعه قوى اليومين دول و امبارح فى اجتماع مجلس الوزرا شافوا ان موسم الثانوية العامه هايبدأ و ان هى دى الوسيلة المناسبة اللى يشغلوا بيها الناس
اللى تشوفه . صحيح احنا كده هانبتدى نغير النظام بتاعنا اللى ماشيين عليه فى الموسم بس و لا يهمك كله يهون لاجل سيادتك
الله يكرمك يا سيدنا الشيخ . مش هاوصيك بقى عايز امتحانات زى الزفت و عايز درجات ما تسرش لا عدو و لا حبيب
من عينيا معاليك بس الحساب المرة دى هايختلف مش هايبقى زى بتاع التشكيل الوزارى الأخير
ما تقلقش
طبعا الوزير مشى من هنا و انا ظهرت
ايه الاخبار يا مولانا
زى ما سمعت كده عايزين نصعب الامتحانات
و ماله
فى عندك خطة يا حنكش
فى طبعا يا سيدنا بس عايزين معاليه يساعدنا شوية
ازاى يعنى
عايز اسامى العيال اللى كانوا أوائل فى سنه تانية و عايز كمان اسامى المدرسين اللى هايحطوا الامتحانات و سيب الباقى عليا انا
اذا كان كده فبسيطة قوى نتصل بجنابه نجيب منه كل اللى انت عايزة
و انا جاهز اول ما تحضرلى البينات
وصلت البينات و جهزت انا الشغل
هاتعمل ايه يا حنكش دلوقتى
هاتشوف يا مولانا ده انا هاخليها سنه سودا عليهم بس اصبر انت
اول حاجة نروح نشوف اللى بيحطوا الامتحانات
1- امتحان اللغة العربية ( أ / درويش فتح الله )
بعد ما دخلت بيت الراجل ده شوفت ان مصيبته و بلوته فى مراته الست حفيظة وليه رغايه و نكدية و حشرية يعنى من الاخر بطيخه قرعه زى ما الكتاب قال
يعنى الراجل ده مش محتاج مساعده هو من نفسه هايجيب امتحان زى وش المدام بس مادام قاعد بيكتب الامتحان يبقى لازم نسخن الجو شوية
شوية ميه مش نضيفه على غسيل الست حفيظة يجننوها
و طوبه تتهبد فى البلكونه
ايه الصوت ده يا حفيظة مش عارف اركز فى اللى باعمله
ده جاى من البلكونه اما اقوم اشوف فى ايه
يا نهار اسود الحقنى يا درويش
فى ايه
الوليه اللى عايزة قطم رقبتها طب و دينى لابيتها النهارده فى القصر العينى
فى ايه يا حفيظة
الوليه بترش ميه مش نضيفه على الغسيل ده يوم ابوها اسود
خلاص بقى يا حفيظة الطيب احسن
طيب ايه اللى احسن هو انت يا راجل مش هاتتنحرر مرة واحده فى حياتك زى بقية الرجاله و تعمل لك منظر
يعنى عايزة ايه يا حفيظة
عايزاك تطلع للنطع جوزها تمسك فيه يا راجل دول مش عاملين لنا سعر فى البيت بسبب هدوءك ده و طيبتك
يا حفيظة اقصرى الشر
انت هاتطلع له و لا اطلع انا امسك فيهم هما الجوز و اشيعهم لك على المشرحة
خلاص هاطلع
طبعا طلع الاستاذ درويش و كلمه منه على روصيتين من حفيظة لجارتها الموضوع كبر و ما خلصش غير فى القسم
يخرب بيتك يا حفيظة ده انتى طلعتى العن منى انا كنت عايز اعمل شوية دوشة فى البيت و خلاص لكن انتى ما شاء الله عليكى قلبتيها لجنايه
استاذ درويش طلع بعد ليله فى الحجز لقى قدامه الورقة اللى بيحط فيها الامتحان راح مطلع غله كله فيها و جاب امتحان ما يقدرش عليه مختار الصحاح بنفسه
الأول
2- امتحان اللغه الانجليزية ( أ / محمد عبد السميع )
أستاذ محمد راجل مش متجوز و متعقد من الستات من صغره
التليفون بيرن فى بيت أ / محمد
ألو
ألو استاذ محمد
ايوه يا فندم مين حضرتك
انا واحده معجبه بحضرتك قوى
معجبه بيا ازاى يعنى
يا استاذ ده حضرتك فتى احلامى
انا
ايوه يا استاذ ده انا طول عمرى باحلم باليوم اللى اكلمك فيه و النهارده اخيرا قدرت اعتر على رقمك و احقق حلمى
معقول طب انتى مين
و فضلت المكالمات شغاله لمده اسبوع و فى اخر الاسبوع كان محمد بيطلب الجواز من صاحبة الصوت الساحر
اه بس انا عندى شرط واحد
ايه هو ؟
عايزة اعرف امتحان الثانوية العامة اللى انت هاتحطه علشان ابنى
انتى ما قولتليش انك عندك ولاد قبل كده و بعدين هو انتى كنتى بتعملى كل ده علشان الامتحان يعنى انتى مش بتحبينى
لأ بحبك طبعا بس هاحبك اكتر لو عرفت الامتحان
انتى دخلتى فى حيطة سد يا هانم كلكم زى بعض خونه خونه
و قعد يحط الامتحان و هو متخيل ابنها قدامه طب و حياة امك لاحط لكم امتحان بالعبرى مش بالانجليزى
الثانى
3- امتحان التاريخ ( أ / عليه ابو المحاسن )
ست طيبة قوى و بتحب عبد المحسن جوزها و هو كل دنيتها و خصوصا انهم ما عندهومش اولاد
بس فرصتى يبقى عبد المحسن هو الولاعه اللى هانولع بيها امتحان التاريخ
نجيب برنامج حلو عن الاطفال فى التليفزيون
يعنى انت لحد امتى هاتفضل كده انت من حقك يكون لك طفل يملا عليك حياتك بكرة تكبر و مش هاتلاقى حد جنبك يسندك
اعوذ بالله من الشيطان الرجيم ايه الافكار السودا دى بس و بعدين هى عليه ذنبها ايه بس
لا سودا ولا حاجة ده حقك و بعدين هو انت هاتطلقها ده انت هاتتجوز عليها مالها سماح زميلتك ست ولاده و عندها بدل العيل تلاته و جوزها ميت من سنتين و هى من ساعتها تتمنى لك الرضا ترضى
و بعد مداولات كتير بينى و بينه و بعد ما هد حيلى
قام نام و تانى يوم كان بيتفق مع سماح على تفاصيل الجواز
و طبعا انا جريت على سماح
قولى لمراته خليه يبقى ليكى و لولادك لوحدك
و حصل اللى كنت عايزه و اتطلقت الست عليه و مسكت ورقة التاريخ و حطت امتحان الناس نفسها اللى عاشت الاحداث دى لو طلعت من تربتها مش هاتقدر تجاوب عليه
الثالث
امتحان الفيزياء ( أ / حنفى ابو زيد )
ايه ده الراجل ابتدا يكتب الامتحان يا نهار اسود طب اتصرف ازاى اشغله باى حاجة و اشوف الامتحان طيب
يا نهار اسود
ده انت شيطان يا راجل حرام عليك العيال و الله العظيم صعبوا عليا
الحمد لله يا سيدنا الامتحانات كلها اتظبطت و اجدع عيل لو جاب 50 % يبقى فضل و نعمه من ربنا
الكلام ده اكيد يا حنكش
عيب يا معلم و زياده فى التأكيد هاعدى على العيال الأوائل اظبطهم برضه يمكن يكون فيهم عيل عبقرى و لا حاجة
مخدرات بقى و بنات و كده
لأ مخدرات ايه دى قديمة قوى
امال هاتعمل ايه يا حنكش
افلام ( ما حدش يفهمنى غلط ) انا اقصد الافلام اللى بتتعرض فى السينما
فيفا
فيس بوك
و سلم لى على التكنولوجيا
و طبعا المهمه تمت بنجاح و الأول على الثانوية العامه فى السنه دى دخل حقوق انتساب فى اسيوط بعد ما اضطروا يقفلوا كليات القمة علشان مافيش عيل جاب الحد الأدنى ليها
و البلد اتقلبت طبعا و الوزير منجهنا ساعتها
سامحنى يا رب
-----------------------------------------
العمليه التانية
الزبونة وصلت يا مولانا
طب دخليها بسرعه يا ام السعد
هى مين الزبونه دى يا سيدنا
دى ملبن محشى مهلبية يا حنكش
و النبى صحيح يا معلم
دلوقتى هاتشوف بس اخفى بقى لحسن دى بسكوته و ما تستحملش تشوف خلقتك دى
حاضر يا معلم هاخفى
الله الله ايه روايح الجنه اللى هلت علينا دى
هاى يا مولانا
هاى عليكى يا نجمه أأمرى يا ست الكل
الفيلم يا مولانا
انهى فيلم يا نجمه
الفيلم الجديد بتاعى عايزاه يكسر الدنيا
اكيد طبعا هايكسرها يعنى فيلم بطلته زى سندوتش القشطة اللى غرقان مربى تين ما يكسرش الدنيا ازاى
ميرسى يا مولانا بس برضه همتك معايا
اللى تأمرى بيه يا نجمه
عايزاه يحقق أعلى ايرادات
و ماله يحقق
و عايزاه يعجب الجمهور
أمرك يا ست الكل
و عايزاه يعجب النقاد
يا سلام من العين دى قبل العين دى
. و لا بلاش العين دى انا نسيت انها مش شغاله و عايزاه ياخد جوايز
يا سلام احلى جايزة لأحلى شمعه منورة
بص يا مولانا انت ان شاء الله مش هاتتعب قوى يعنى انا عملت كل اللى اقدر عليه فى الفيلم ده بس انت عارف برضه محتاجه بركة الأسياد و نفسهم معايا
عارف يا نجمة انك بتعملى كل اللى ربنا بيقدرك عليه
و الله يا مولانا رقص و رقصت حتى الغنا اللى ماليش فيه غنيت مش عارفه يعنى الفيلم ناقص له ايه كمان علشان ينجح خلاص هاتجنن انا حاسه ان سوسو شخلعها عامله لى عمل بيسقط الأفلام كلها
الهى تسقط فى شهرها التامن البعيده لو على الأعمال ما تقلقيش يا شمعتنا مقدور عليها بعون الله بس انتى ابقى سيبى لنا حاجة من قطرك قبل ما تمشى
اسيب لك ايه يا معلم
خدى يا ست الكل المنديل ده امضى لنا عليه
اه طب معاك قلم يا مولانا
مش بقلم يا ست الناس الطعيه بشفايفك الكريمة دى
من عينيا يا مولانا
تسلم يا عسل و ما تقلقيش على الفيلم ان شاء الله هايكسر الدنيا
اظهر و بان عليك الأمان
ايه ده يا معلم
ايه يا واد مالك
ايه الصاروخ ده
دى زيزى المفترية
واضح طبعا
عرفت العمليه طبعا عايزة ايه
عرفت يا مولانا و حياتك لاجيب لها اوسكار السنه دى
اوسكار ايه يا منيل هى دى تتحمل الحاجات دى برضه
يلعن ابو الجهل
بتقول ايه يا حنكش
باقول يا مولانا ان الاوسكار دى جايزة مش مرض
اه طب و ماله اللى تقدر عليه اعمله
هاعمل و هافرجك يا مولانا بس هو الفيلم اسمه ايه
اسمه (( المدام محتاجه ظبط زوايا يا بيه ))
لا حول و لا قوة الا بالله العلى العظيم طب خلاص ربنا يقدرنى
اول حاجة نروح نشوف الأفلام اللى نازلة قصادها نولع فى امها
اول فيلم نازل الموسم ده ( أحمد السقا )
قوينا يا رب
احمد السقا مضروب فى نافوخه احنا بس نبرجله شوية و كله هايبقى تمام
اهو ماشى بعربيته على الكوبرى و الاشارة موقفه الطريق
ايوه بص جنبك كده على الكوبرى بص و الله ما تخافش
ايه ده فى ايه يا نهار اسود ايه البت اللى هاتنط من الكوبرى دى
انتى يا بت انتى يا مجنونه ما تنطيش يخرب بيتك
و طبعا نطت و توتو عضلات عمل فيها سبع رجاله اتضربوا فى الخلاط و اتصبوا فى قميص و بنطلون واحد و نط وراها
و النتيجه الباشا فى الجبس و الفيلم مش هايكمل قبل 6 شهور
الأول
الفيلم التانى ( محمد سعد )
الفيلم من قبل ما ينزل و هو عليه مشاكل نروح احنا بقى نشعللها
شوية وسوسة لسعد
يعنى ايه مش عايزينك تتدخل فى السيناريو ده فيلمك انت لو ما كانش يطلع على مزاجك امال هايطلع على مزاج مين
مش كده برضه
اه طبعا و بعدين انت ما بتطلبش كتير يعنى من حقك تطلع المرة دى بالشكل اللى يعجبك فيها ايه يعنى لما تعمل اللمبى تانى و حلوة قوى فكرة انك هاتطلعه جاله مرض فى لسانه هايخليه يتكلم زى عيل عنده 3 سنين و يتهته بقى و يريل و الله فكرة بمليون جنية ده انت لو ما اتمسكتش بفكرتك مش بعيد تتسرق و غيرك يعملها
شوية وسوسة للمنتج
ده بنى ادم اهبل و هايوقع لك الشركة ده بقالة قد ايه ما بيحققش ايرادات
شوية للمخرج
على الله توافق على طلباته بكرة يقولوا عليك مالكش شخصية و تافه
و النتيجه الحمد لله محمد سعد بطح المخرج و عمل عاهه مستديمة للمنتج و الفيلم اتأجل لبعد خروجه من السجن
الثانى
الفيلم التالت ( نجم الجيل تامر حسنى )
بص يا نجم دى مجموعه جايبها لك مخصوص من المانيا و الله يا نجم لو استعملتها هاتدعى لى
يا راجل مش للدرجة بس تفتكر ده هاينفع لحواجبى
طبعا يا نجم دى بكرة هاتلضم فى الرموش و التركيبة العجيبة دى بقى مخصوصه ليك
و دى ايه بقى
حاجة كده من اللى وصى عليها الحكيم لقمان و لا تقولى جيم بقى و لا حديد و لا كلام فارغ تانى هى كوبايه واحده منها هاتلاقى العضله بتفجر كم القميص
خلاص هاجرب
و النتيجة طبعا النجم راقد يا عينى و قاعدين حواليه 3 كائنات فضائية و مش دريان بأى حاجة ربنا يشفيه بقى و يرجعه لعقلة بالسلامه
الثالث
كده انا دمرت اقوى 3 افلام كانوا نازلين الصيف ده و الحمد لله هنيدى مش هاينزل و احمد حلمى فيلمه اتأجل
يعنى بشوية البهارات اللى ماليين الفيلم على حبة الدعاية الحمضانه اللى عاملينها له هايجيب اعلى ايرادات
الفيلم نزل و طبعا شركة الانتاج عملت دعايه مش بطاله علشان الفيلم يشتغل و فعلا الفيلم ابتدا يحقق ايرادات
عفارم عليك يا حنكش
تلميذك يا استاذ
بس دلوقتى النجمة عايزة تظبط النقاد هاتعمل ايه
و لا يهمك يا معلم هاتصرف طبعا
طبعا النقاد اللى قدرت تشتريهم اشترتهم و اللى ما قدرتش ربنا يقوينى انا بقى عليهم
اهم ناقد طبعا اخونا اللى ما بيعجبهوش العجب و لا الصيام فى رجب
دعوه شيك علشان يروح يحضر الفيلم
و بعد 10 دقايق بالظبط من الفيلم كان زهق و قايم علشان يمشى
فيلم متخلف و تافه زى اللى عملوه
قاعده جنبه بنوته قمة فى الجمال بتعيط
فى حاجة يا مادموزيل
لأ يا استاذ ميرسى بس اصل الفيلم عاطفى و مؤثر قوى
مين ده اللى عاطفى الفيلم ده
ايوه يا استاذ ده فظيع قوى ازاى حضرتك ما حسيتش بيه ده مش ممكن يجنن
نعم
يا استاذ خد عينى و شوف بيها الفيلم هاتلاقيه ما حصلش و لا هايحصل طب تصدق بقى ان دى خامس مرة ادخله و كل مرة ما باعرفش امسك نفسى من العياط و خصوصا و هما بيظبطوا لها الزوايا مش ممكن مشهد فظيع
و الأستاذ قاعد بيسمع و عيونها اللى مليانه دموع ساحراه و حولاه فى نفس الوقت
و النتيجه مانشيت
( ماستر سين الموسم تظبيط زوايا النجمه الواعده زيزى المفتريه )
الجوايز بقى يا مولانا
و النبى ما تقلقى يا كوز العسل بكرة هاتاخدى الفوسكار
الأوسكار مرة واحده يا مولانا انا كل اللى نفسى فيه اى كاس احطه على التليفزيون فى الصاله الكبيرة هاموت يا مولانا على اى جايزة نفسى اتصور بقى و انا بيكرمونى و التليفزيون يعبرنى و برامج رمضان تتخانق عليا
و حياتك كله هايحصل بعون الله
يا ريت يا مولانا ده انت ساعتها تبقى لك الحلاوة
حلاوتنا هى رضاكى يا ست الكل
حنكش
جاهز يا كبير ما تقلقش
نظبط بقى لجنة اختيار الافلام اللى هاتدخل فى مسابقة المهرجان
ما اقدرش انكر ان ما كانش فيه افلام كتير قدامهم علشان كده مهمتى المرة دى ما كانتش صعبه قوى
خصوصا بعد شوية اعمال من اللى بتغيب العقل و بتخلى الرجلين الاتنين شمال
وافقوا على الفيلم و كمان ادوا له جوايز بمساعدة النجمه اللى ما بخلتش عليهم بحاجة
بقت هى بتظبط من ناحية و انا من ناحية
و اهى دلوقتى و الحمد لله ما بتفضاش من البرامج دى اتعمل فيها لحد دلوقتى 14 مقلب و طلعت فى 23 توك شو ده غير ما عزب شو قلدها 3 مرات
يعنى الحمد لله العمليه تمت بنجاح
-----------------------------------------
العمليه الثالثه
النهارده يوم غير اى يوم يا حنكش
خير يا مولانا
الضيف اللى جاى لنا النهارده ضيف مش عادى
اشمعنى يعنى
الضيف اللى جاى لنا دماغه فيها افكار توقف الميه فى نهر النيل نفسه
للدرجة دى
امال يا واد ده انا نفسى و منى عينى يوافق ييجيى يشتغل معانا هنا بس هو بقى مش فاضى الله يكون فى عونه
طب مادام هو جامد كده بيلجأ لك ليه يا مولانا
هو جامد فى أفكارة الشيطانية اه لكن التنفيذ بقى بيحتاج مواصفات تانية مش موجوده فيه
مواصفات عفاريتى مش كده
اسم الله عليك
هو مين الضيف ده يا سيدنا
دلوقتى تشوفه بس شغل انت الفسبا بتاعتك و اخفى عى طول
قصدك ال invisible
انا اعرف المهم انك تخفى و خلاص
هو برضه بيتخض يا مولانا
يتخض ده بيتخض ده انا يا ابنى خايف عليك انت منه
يا ساتر يا رب
الباشا وصل يا مولانا
خليه يدخل هو الباشا برضه بيستأذن
معلش يا سيدى الأصول برضه بتقول كده
الأصول على الكل لكن على سيادتك ما ينفعش طبعا
ماشى شكرا
أؤمر يا سيد الناس طلبات السعاده ايه
حكايه بسيطه كده عايزك تحلها
و ماله تتحل بعون الله و بعدين بنفس سيادتك معانا طبعا
ما تخافش الموضوع انا مظبطه بس مستنى الدفعه العفاريتى بتاعتك
قول يا سيادة النائب هى الانتخابات قربت و لا ايه
لأ لسه شوية على الانتخابات الموضوع المره دى مختلف
خير
حسن كاوتش
مين حسن كاوتش ده يا باشا
ده واد بيلعب كورة عايزة ييجيى الاهلى
و ده بيلعب فين
بيلعب فى نادى درجه تانية عندنا فى طنطا بس عيل ابن جزمه مصمم ما يلعبش غيرفى الاهلى
طب و ماله يا كابتن هو مش حريف
يا سيدى هو لا حريف و لا حاجة بس فى مصالح بيننا و بين ابوه و لما عرضت عليه فلوس قالى انه مش عايز فلوس بس عايز الواد يروح الاهلى
طب وماله يا كابتن ما الاهلى فى ايدك فيها ايه يعنى ما تكلمهم و هما مش هايأخروا لك طلب
ما اختلفناش بس لو ثبت الادارة و المدرب هاثبت ازاى النقاد و الجماهير اصل كلام فى سرك الواد رجليه الاتنين شمال بيمشى فى اتجاه واحد بس
اه صعبه دى
مافيش حاجة تصعب عليك يا عبس
ان شاء الله يعنى حضرتك اللى عايزه انه يلعب فى الاهلى
اه و ما تقلقش انا برضه مش هاسيبك لوحدك يعنى فى حلقه الجمعه الجايه هاعمل تقرير عنه و ربنا يسهل و اقعد مع عدلى القيعى اقنعه
على بركة الله و احنا من ناحية و حضرتك من ناحية و ربنا يقدم اللى فيه الخير
ماشى و اى معلومات تعوزها كلمنى على طول
اظهر و بان عليك الامان
ايه ده يا مولانا ده احمد شوبير ده
ايوه احمد شوبير طبعا المهم دلوقتى هانعمل ايه
ما تقلقش يا مولانا كله تحت السيطرة
هو هايظهر فى حلقة بكرة من البرنامج مش كده
فى بيت عدلى القيعى شوية وسوسه
الواد ده نيلة قوى ايه التهريج اللى شوبير بيعمله ده
نيلة ايه ده بدل ما تضمه للأهلى
اضم مين ده عبيط و رجليه الاتنين شمال
و ماله بس ما هو زى الفل اهوه ركز شوية يا عدلى الواد رجله حلوة الشمال شمال و اليمين كمان شمال يعنى هايبقى تحفة على الاطراف
اطراف ايه ده التقرير بيقول بيلعب دفاع
و ماله حلو على الاقل هايلخم المهاجمين هايقعدوا يتفرجوا على رجله العجيبة دى
مش عارف
يا سيدى ده واد زى الفل حقك تلحقه قبل ما حسام حسن ياخد خبر بيه
يا مولانا
ايوه يا حنكش
قول للكابتن يعمل تليفون لعدلى انا مثبت الراجل و كله تمام
حاضر الو يا ابو الكباتن
ايوه يا عبس خير
كلم عدلى القيعى متثبت دلوقتى و عنده استعداد يضم كاوتش
متشكرين يا عبس
انت تؤمر يا كابتن اى خدمه
و فعلا انضم كاوتش للنادى الأهلى
مستحيل اللاعب ده يلعب تانى
ليه بس يا كابتن حسام
ليه ايه انت مش شايف المهزلة اللى عملها الماتش اللى فات
يا بدرى عديها بقى بكرة يبقى كويس اديله فرصته يا اخى الواد لسه جديد و مش متكيف مع جو المباريات و بعدين الفلوس اللى اتدفعت فيه لسه ما بردتش
كابتن عدلى ما تجننيش ده واد احول فى مدافع احول
حرام عليك ده الواد نظره 6 على 6
انا اقصد رجله هى اللى حولى
و الله انت بتبالغ
طب ماشى تعالى اتفرج معايا على التمرين كده و انت تشوف
مكالمه بين كاوتش و شوبير
الحقنى يا كابتن شوبير
فى ايه يا كاوتش
كابتن حسام البدرى هايعمل لى اختبار دلوقتى
و لا يهمك اثبت يا واد
تليفون صغير لسيدنا
عبس
ايوه يا كبير
ثبت لى البدرى مش عايز يلاعب الواد و المصلحه بتاعة ابوه لسه ما قضيتش تقضى بس و خليهم يولعوا فى امه بعد كده
حاضر يا كابتن. طيران على البدرى يا حنكش
حمامه يا مولانا
شوية وسوسه لحسام البدرى
ماله بس الواد
ماله ايه انت اتعميت ده عبيط
و ماله اهو ربنا يبارك لك لما تلاعب واحد بركه زى ده و بعدين انت عايز منه ايه مش وائل جمعه موجود يبقى خلاص ما تقلقش و لو حتى وائل ما سدش لوحده البركه فى الحكام بقى و فى شوبير اللى فى ضهرنا و بعدين ما الاعلام كله فى جيبنا يبقى هانخاف من ايه
على رأيك و يمكن الواد يطلع كويس و انا مش واخد بالى منه نديله فرصه تانية . كاوتش انت معانا الماتش الجاى ان شاء الله
اخر طلب يا عبس
أؤمر يا كابتن
الواد يروح المنتخب و ما تقلقش هو الماتش الاول بس وبعد كده هاتكون المصلحه خلصت و يا رب بعدها تضربوه بالنار حتى
و ماله يا كابتن يروح
بس خد بالك ده بيلعب مكان هانى سعيد و انت عارف الواد حريف و حسن شحاته ما بيستغناش عنه
و ماله يا كابتن ما تقلقش محسوبك هايحلها بعون الله
طب انا كان عندى فكرة
قول يا كابتن منكم نستفيد برضه
حادثة بسيطه و رباط صليبى و بكده نبقى ضربنا عصفورين بحجر من ناحية كاوتش يروح المنتخب و من ناحية تانية نعجز الزمالك
يا اخى حرام عليك الافترا وحش
مين ده يا عباس
ده الواد حنكش المساعد بتاعى انت ايه اللى طلعك يا زفت انت
يا مولانا مش قادر حرام كده و الله بص يا كابتن مش سيادتك عايزة يروح المنتخب
اه
طب خلاص سيبها عليا انا دى انا هاتصرف ان شاء الله
ماشى يا سيدى ما قولتليش يا عبس اخبار الصرصار ايه
زى الفل و لا العفريت الازرق نفسه يعرف مكانه
طب تمام اقوم الحق وقتى انا بقى فى حكايه كده هاتريحنى من مرتضى منصور و سمير زاهر مرة واحده و للأبد
اى خدمه طيب
لأ شكرا شايلك للتقيله
ايه حكاية الصرصار دى يا مولانا
ده الصرصار اللى متعلق على شنبه العمل اللى معمول لنادى الزمالك و مش هاتصدق مين صاحب فكرة الصرصار دى
اوعى تقولى هو
طبعا هو ده عليه دماغ مين يتوقع ان العمل اللى مبهدل نادى الزمالك متعلق على شنب صرصار و الصرصار ده موجود فى قلب بلاعة النادى ذات نفسها
ده ايه الراجل ده ما تكلمه لى يا مولانا ياخدنى معاه ينوبه فيا ثواب
بعدين يا حنكش اجرى انت دلوقتى شوف موضوع المنتخب ده
حاضر
فى المعسكر حسن شحاته بيوجه اللاعيبه
شوية وسوسه لحسن شحاته
هو هانى ماله بيجرى ببطء كده ليه
يا هانى ركز بقى شوية حرام عليك كده
شوية وسوسه لهانى سعيد
هو بيزعق لك كده ليه
فى ايه يا كابتن ما انا مركز اهو عايز منى ايه تانى اركب فى رجلى عجل يعنى
يا نهار اسود هيبتك يا شحته هاتضيع وسط العيال
ما تيجى تاخدنى قلمين احسن طب ما انت شايف المنتخب طول ما انا فيه
هاعمل ايه بس يا رب دلوقتى هاجيب منين حد يلعب مكانه ده الماتش بكرة
كاوتش بتاع الاهلى واد زى الفل و الناس كلها بتشكر فيه
بس انا ما شوفتوش قبل كده
يا عم و ماله مادام حسام البدرى بيلعبه اساسى يبقى زى الفل
خلاص على بركة الله هاقوم اكلمه و اضمه
فى الماتش كان الملعب زايط و كاوتش نزل ارض الملعب والجماهير كانت هاتتجنن لما شافته
بس محسوبكم قام بالواجب و رش عليهم اللى ثبتهم و خلاهم شايفين كاوتش مارادونا و بيهتفوا باسمه كمان
و على ما خلص الشوط الاول كان كاوتش جايب فى نفسه جولين و متسبب فى 5 ضربات جزاء غير الاربع انفرادات اللى جم اجوال
المكالمه الاولى
ها مثبت الجمهور يا عبس
ايوه يا كابتن مثبتينهم بالعافيه بس الواد خرب الدنيا خالص
و لا يهمك ابوه هايمضى خلاص اهوه
المكالمه التانية
دوس يا عبس عايز الواد ده يتفرم النهارده
اوامرك يا سيد الناس . حنكش
ايوه يا مولانا
فك الطلاسم خللى الناس ترجع لعقلها تانى
بس الواد كده هايتطحن يا سيدنا
احسن
خلاص قوينا على الشر يا رب
( #%$&**&*&*&#*@@&*&#*&#)
هى دى الطلاسم حد عنده مانع
و طبعا النتيجة ان كاوتش لحد النهارده راقد فى غيبوبه ماحدش عارف هايفوق منها و لا لأ
ربنا يسامحنى و ينتقم من اللى فى بالى
ليست هناك تعليقات:
إرسال تعليق