يوميات واحده عطلانه

انا طبعا قولت لكم انى سيبت الشغل خلاص و ربنا تاب عليا و الحمد لله


و لو ما كنتش قولت ادينى باقول اهوه


و المرة دى جد مش مألته و الله العظيم

و بقالى شهر و نص تقريبا عاطله عن العمل

و بما انى واحده بتموت فى الكلام و الحديت

تقدروا تقولوا رغايه

فقعدتى فى البيت بقت كارثة بيئيه و مشكلة مستعصية بالنسبة لأمى و اخويا


ليه بقى


انا قاعده فى البيت بعد الاستقاله


اخويا قاعد بيكمل الكورسات بتاعته


مامتى ربة منزل من الطراز الأول



يعنى البيت بقى فيه 3 افراد قاعدين ليل نهار وشهم فى وش بعض


التليفزيون الله يحرقه بقى ممل


زمان كان الفيلم من دول نشوفه كل سنه مرة فكان بيوحشنا

دلوقتى تقلب على روتانا تلاقيه يجيى فاصل تحود على ميلودى تلاقيه لسه هايبتدى

تزهق تشوف الحياه سينما ( شاشة العرض الأول ) تلاقيها بتنوه انه هايجيى بعد ما فيلم العيال هربت يخلص


طب اعمل ايه


الأفلام ما بقتش بتوحشنى خلاص


و كده كده انا مش عايزة اتفرج و لا اقرا


انا عايزة اتكلم و افضفض عن نفسى



و حتى الكمبيوتر باقعد عليه لما ظروفى بتسمح و برضه بقيت بازهق بسرعه



اصحابى كلهم بيشتغلوا و مش فاضيين لى


( اللهم لا حسد و انتوا عارفينى طبعا )



عرض فودافون حكاوى اتقلب حاله و بقى من الساعه 12 بالليل و بيبقوا كلهم اتخمدوا


تقولش وراهم الديوان يا خى



و القله القليله العواطليه منهم لله موبينيل و مش باعرف ارغى معاهم



مامتى بتدعى على اليوم الاسود اللى سيبت فيه الشغل و قعدت لها فى البيت


رغم انى صوتى واطى و زى النسمه


بارغى اه بس بالهمس علشان ما تصدعش


لكن برضه بتشتكى و مش عاجبها



اجى ادخل لأخويا حبيبى


يقولى بررررررررررره


من قبل حتى ما يسمعنى و من قبل ما اشغل الاسطوانه





بس عايزة ارغى يا ناس

طب اعمل ايه


افضل كابته الرغبه فى الكلام جوايا فيجرى لى حاجة يعنى



المهم قولت ما بدهاش انتوا هنا اخواتى و حبايبى و بتستحملوا جنانى


و اكيد هاتستحملوا رغيى


و خصوصا انى هارغى لوحدى و انتوا حرين بقى


اللى عايز يقرا يقرا


و ليه منى الف شكر و تحيه



و اللى مش عايز هو حر


بس هايفوته نص عمره


لأنه مش هايعرف يلاقى مصدر تانى للدرر اللى بتنقط من بقى



عموما انا الموضوع ده مش مدون عندى انا هاطلق لكى بوردى العنان و هابتدى على بركة الله ارتجل و اوصف لكم المواقف اللى واجهتنى من بداية قعادى من الشغل


و ربنا يقدرنى على الكتابه بقى




و يعينكم على احتمالى



------------------------------------------------------

الموقف الأول


اول شعور بتحس بيه فى اول اسبوع من بعد سيبان الشغل


ربنا ما يحكم على حد فيكم طبعا


بس هو اول شعور ان فيه هم انزاح من على قلبك



زى ما تكون بقالك 6 ساعات قاعد فى اجتماع مطول مع ناس مالهاش لزمه بس ما ينفعش تسيبه و تخرج

و انت يا عينى عليك من اول لحظه فى الاجتماع نفسك تدخل التواليت

تخيل بقى فرحتك بعد انتهاء الاجتماع

بتبقى عايز تزغرط من الفرحة و تاخد التواليت بالحضن


اكيد طبعا مش هانقعد الليله كلها نتكلم على التلاويتات


المهم يعنى انه بيبقى شعور فظيع بالراحه


طب ده بالنسبة لأول اسبوع


مر عليا فى هدوء و عملت فيه كل اللى كان نفسى اعمله


نمت براحتى


كنت بانام تقريبا 14 ساعه فى اليوم


و كل يوم كنت بانزل ازور واحده من صحباتى اللى ما شفتهمش من زمن بسبب الشغل


و التليفزيون كان واحشنى


بس فى الاسبوع ده كنت زورت خلاص كل اللى عايزة ازورهم


نمت بما فيه الكفايه لدرجة ان السرير ابتدى يزيق من كتر نومى عليه


قريت كل الكتب اللى عندى ما انا فاضيه بقى


طب اعمل ايه


اكسر الملل ده ازاى


بس انتوا عارفين ايه اللى كان مزود الملل عليا

بالنسبة لواحده زيى طبيعة شغلها كانت كلها كلام فى كلام


كلام مع العيال و كلام مع زمايلى و كلام مع اولياء الامور


و بعد ما كنت باروح لو كان بيتبقى فيا حيل كنت باكمل على مامتى


فابتديت اكتئب لانى مش لاقيه حد افرغ فيه سمى


و اللى زود الاكتئاب او بمعنى اصح السبب الرئيسى هو انى كان بقالى اسبوع ما باهزقش حد


اصل انا عقبال عندكم كنت كل يوم باهزق لى اربع خمس شحوطه على غيار الريق


طب دلوقتى اهزق مين


لو دخلت لأخويا و جريت شكله هايرمينى من البلكونه و بعد ما ولاد الحلال فى الشارع يقومونى و اجى اطلع الشقه تانى هايطردنى و مش هايرضى يدخلنى


و مش معقول هاجر شكل امى


ده حتى بالوالدين احسانا



طب اجر شكل مين


و لأول مرة اندم اننا ما عندناش بواب للعمارة


كان زمانى باعته مراته تجيب لى حاجة و اتلكك لها و ازعق و اهلل


و مفيش مانع من انى اقل ادبى على بسيط


و هى كرامتها تقوم عليها طبعا ما هى ايه اللى يخليها تسكت لواحده زيى


فتزعق لى و نمسك فى شعور بعض بقى



طب مفيش بواب


قولت انشر الغسيل فينقط على الناس اللى تحتينا فيطلعوا يتخانقوا معانا


اكتشفت ان الغساله اوتوماتيك و الغسيل بيطلع معصور


طب اعمل ايه اروح اغسل اى حاجة على ايدى و انشرها من غير عصر



لقيت باسكت الغسيل فاضى


امى نشيطه قوى و بتغسل الهدوم اول باول الله يسامحها بقى




اروح اسقى الزرع و انقط عليهم



بس احنا ما عندناش زرع


طب اعمل ايه مش هاعرف اجر شكل الجيران اللى تحتينا يعنى


روحت مطلعه بلوزة نضيفه من الدولاب و بليتها و جريت بيها و هى بتنقط و قولت انشرها و قعدت ادعى انهم يكونوا ناشرين



بس اكتشفت ايه بقى



ان احنا اول بلكونه و مفيش تحتنا حد



يادى الخيبة انتحر يعنى يا رب


المهم و انا قاعده بافكر اعمل ايه اعمل ايه


الاقى لكم ايه


الجرس بيرن


روحت افتح و انا باقول يا رب خناقه


و شوف تساهيل ربنا بقى


علشان تعرفوا ان الواحد لو بيدعى بنية سليمه ربك بييسر له اموره


الاقى عيل صغير على الباب و يقول لى ايه


طنط الكورة وقعت فى بلكونتكم ممكن تديها لنا


خناقه جايه لى من على باب الله و من غير ما اعمل اى مجهود


كورة ايه يا حبيبى


الكورة بتاعتنا وقعت غصب عنى و انا باشوطها


و تشوطها على ليه يا ابنى


و الله ما كنت اقصد يا طنط


يعنى ما كنتش تقصد طب و البنى ادمين اللى فى البيت يرتاحوا ازاى و ابو تريكة ساكن معاهم فى شارع واحد


انا اسف و الله


يعنى ايه اسف استفدت ايه انا باسفك ده


طب اعمل لك ايه دلوقتى


انت كمان بترد عليا ما تيجى تضربنى يا والا


لقيت عيل تانى طالع وراه يستعجله و يشوف ايه اللى حصل


لأ يا طنط يضربك ازاى احنا اسفين ممكن تدينا الكورة بقى


و انت مالك يالا و كورة ايه اللى هاتاخدوها


الكورة بتاعتنا


اللى عايز حاجة يطلع ياخدها


ازاى يعنى


يعنى اتشعبط و نط فى البلكونه و خدها


ليه بس يا طنط حرام عليكى


هو كده و اذا كان عاجبكم


طب و لو نطينا مش هاتزعلى


لأ طبعا


و روحت هابده الباب وراهم و طلعت البلكونه اتفرج


بابص لقيت الواد بيقولى هاتشعلق و انط اخدها



روحت باصه له بقرف و قولت له


و الله لو عملت كده لاصوت و اقول حرامى و اخللى الشارع كله يتفرج عليك



طب اعمل ايه يا طنط


ما هو طول ما انت زى العجل كده و بتقولى يا طنط يبقى مالكش كور عندى



لقيت الواد التانى بيغمزه و بيقوله يلا يا واد ننده ماما دى باين عليها مجنونه


طبعا انا سمعت ننده ماما قولت بس فرصتى


هى دى الخناقه اللى بجد


ينده امه اضربها


تجيب جوزها يتخانق مع اخويا


الخناقه توسع و نبعت لقرايبنا و نبات شوية فى القسم و شوية فى القصر العينى ان شاء الله


لكن اقعد اهزق نفسى مع شوية عيال كبيرهم يحدفوا البلكونه بالطوب ما ينفعش طبعا



المهم مفيش 5 دقايق و لقيت الجرس بيرن



و ماما كانت صحيت من النوم


و قبل ما افتح لقيت ماما فتحت الباب لمامته و طنط حكيت لها على اللى عملته راحت ماما داخلة البلكونه تجرى و مدياها الكورة

لسه هاعترض لقيتها بتقولى اكتمى خالص لحد ما الست تمشى


اتارى الست دى مين بقى


طنط ام مروة جارتنا و الواد ده يبقى ابن اخوها و جاى ضيف عندهم و الست طبعا علشان عارفه انى قاعده من الشغل اقنعت مامة الولد ما تنزلش تضربنى


و الست قدرت الظروف و قالت لها انا عارفه يا اختى ان قاعدة البيت بتتعب الاعصاب ربنا يكون فى عونها



و الخناقه طلعت على فاشوش للأسف







------------------------------------------------------



الموقف التانى


هى التانى بالـ ( ت ) و لا الـ ( ث )


قطيعه مش مهم هو انا هاشغل نفسى بايه و لا بايه

و لا اكونش يعنى هاخد جايزة نوبل على يومياتى اسم الله



ندخل فى المهم بقى


خير اللهم اجعله خير الاقى مامتى حبيبتى بتصحينى من اجدعها نومه و لسه كان الحلم بادىء و انا نادرا لما باحلم بقى

اعمل ايه مش بابقى فاضيه يا ناس

طول ما انا نايمه باتقلب ( علشان ما تطلعش حته نيه )

المهم الاقى صوت ماما جايب اخر الشارع و قومى بقى و فوقى من الغيبوبة اللى غرقانه فيها بقالك اكتر من 12 ساعه دى

خير البيت وقع خلاص

بيت ايه اللى وقع وقعت على دماغك طيارة

ليه كده طيب ايه الصباح العجيب ده

ما هو صباحك مش قايمه تفولى على البيت و تقولى وقع بدل ما تقولى صباح الخير يا ماما

خلاص يا حبيبتى حقك على راسى صباح الفل بتصحينى ليه بقى

عايزين نمسح الشقه

عايزين ايه طب و انا مالى بقى بمسح الشقه

يعنى ايه انتى مالك

طب بالعقل كده هى ام محمد راحت فين

ام محمد فى البلد بتجوز بنتها و هاتقعد شهر هناك ايه هانسيب الشقه كده شهر

لأ طبعا نسيبها ازاى شوفى اى حد تانى يمسحها

و اشوف حد تانى ليه امال انتى شغلتك ايه فى الدنيا

شغلتى ايه هو انا علشان سيبت الشغل خلاص هاتعملينى كامريرا فى الشقه

هو انتى لما تنضفى فى بيت ابوكى تبقى كامريرا بكرة نشوف لما تتجوزى المحروس بتاعك هايجيب لك الخدامين يخدموكى و انتى مرزوعه على السرير و لا ايه

فى ايه يا ماما مالك قلبتى عليا ليه

علشان دلعك فيها ايه لما تعملى الشقه لحد ما الست ترجع من السفر

طب هاتساعدينى

اكيد طبعا هارمى عليكى الميه لأ قصدى هارمى لك مية و انتى تمسحى

كمان

امال عايزة ايه منى اكتر من كده ده انا و انا فى سنك كنت شايلة بيتى و بيت ابويا كمان و كنت مخلفاكى انتى و اخوكى ( مصمصة شفايف الغرض منها الاشاره الى انى لسه سينجل )
( بس على مين و لا بتفرق معايا طبعا )

خلاص يا ماما هاعملها بس هو انا هاعملها كده لله

قصدك ايه

قصدى ببلاش يعنى شوفى ام محمد كانت بتاخد كام كل مرة و مش هانختلف

هو انتى ليكى عين تطلبى فلوس انا مش لسه شاحنه لك موبايلك غير الفلوس اللى خدتيها و انتى رايحه فرح صاحبتك علشان الهدية غير .......

بس خلاص حقك عليا الله يخرب بيت قعدة البيت اللى بتذل الواحد ده انتى ناقص تذلينى بلقمتى

ده على اساس ان الـ 240 جنية العمى بتوعك كانوا فاتحين لنا البيت

طب ما تقولى لنفسك يا ماما ما انا كنت باشتغل و كنتى بتدينى فلوس برضه ايه اللى جد علينا بقى

اللى جد انى كنت باديكى فلوس و انتى بتشتغلى علشان اخلص من قعدتك فى البيت لكن دلوقتى عايزة تفضلى قاعده بوزك فى بوزى و تاخدى فلوس كمان ايه هايبقى موت و خراب ديار

ماما

نعم

هو انتى واثقه انى بنتك

لقيت اخويا جاى لى على باب الاوضه يقولى هى اعترفت لك خلاص

قولت له هانستظرف بقى و لقيناكى قدام باب جامع

لقيت ماما بتقول لى لأ طبعا هو انتى وش جوامع احنا لميناكى من الشوارع و من صفافيح الزباله


و قعدت هى و اخويا يضحكوا عليا





------------------------------------------------------


الموقف الثالث

كل شوية عاطلة

عاطله

قاعده فى البيت

مالكيش شغلة و لا مشغلة

زى ما اكون زاحمه لهم البيت و لا باسحب الاكسجين اللى فى الجو

المهم انى بعد ما حسيت ان بطاريتى اللى سحبوا اخر نفس منها فى المدرسة ابتدت تشحن و الانيرجى رجعت لى من جديد قررت ادور على شغل تانى


اول شغل جالى من غير ما اسعى له و رفضته طبعا كان فى مدرسة و كانوا مزنوقين فى مدرسة كمبيوتر بصورة مستعجله



تانى شغل و برضه جه كده من غير ما ادور كان برضه مدرسة


هو انا الشغلانه دى ورايا ورايا مش هاعرف اخلص منها يعنى


برضه رفضت

و قولت لطنط جارتنا اللى جابت لى الشغل ميرسى انا مش هاشتغل مدرسة تانى


مامتى راحت بصت لى بسخرية و قالت لى اوعى ترجعى للشغلانه دى تانى انتى اجرى بسرعه افتحى لك عياده يا دكتور

طب ليه التريقه

هو انا ما ينفعش ربنا يفتحها عليا و اشوف شغل تانى غير التدريس اللى ربى لى الخفيف

طب تصدقوا و تأمنوا بالله انا قبل ما اشتغل الشغلانه دى كان عقلى بينضرب بيه المثل

دلوقتى بقى الحمد لله ماشية هى اه بتعرج

لكن الف و حمد و الف شكر ليك يا رب

لسه فيه شوية عقل ساترينى قدام الناس

لا انا ماشية بالمقلوب فى الشارع و لا ماسكه عصاية مقشة بانظم بيها المرور على ناصية شارعنا و لا ماشية بازقل العيال بالطوب و لا باجرى ورا عربيات الرش

المهم بقى


قررت ادور على شغل طبعا

طب هاشتغل ايه

لو عملت بنصيحة ماما و فتحت عيادة مش بعيد اتقفش

اصل البوليس بقى مفتح قوى اليومين دول

فقعدت اتأمل الاحوال من حواليا لقيت ان الحياة مش مبشرة بالتفاؤل

و لقيت ماما جايه مخنوقه من بره علشان سواق التوك توك لهف منها 4 جنية علشان وصلها من السوق للبيت


4 جنية مرة واحده يا ماما


اه و فى مشوار ما ياخدش 10 دقايق مشى

الفكرة نورت فى نافوخى

طب و ليه لأ

و لسه هافتح بقى و اتكلم لقيت اخويا بيقولى بطلى عبط ما ينفعش تسوقى تكاتك لو عملتى كده هاتبرى منك




قولت بلاش تكاتك ممكن المرور يقفشنا و يكلبشوه و انا معاه


طب اعمل ايه


لقيت ماما قاعده بتقول ما هو لو كان السوق قريب ما كنتش اتحوجت للتوك توك و كنت جيبت كل حاجة من اى خضرى قريب


ان ان ان ان


و ماله


هما الخضرية وحشين يعنى

و اهو هابقى انا و قفصين الخضار و الميزان و ابقى سلطانة زمانى


لقيت اخويا بيبص لى بغيظ

بتفكرى فى ايه تانى


ايه بقى فيها ايه الشغلانه دى كمان


فيها اننا هانيجى نستلمك من القسم بعد ساعه واحده ان شاء الله

قولت له ما تخافش لو على البلدية هافرش هنا تحت البيت

قالى بلدية ايه انا خايف على الزباين ده لو فيه واحده فكرت تفاصل معاكى الله اعلم هاتعملى فيها ايه

تفاصل مع مين تفاصل معايا انا ليه هى سايبة



المهم انى قررت اتراجع عن الفكرة دى كمان

كل ما افكر فى مشروع يقفوا فى طريقى


طب اعمل ايه اعمل ايه


اروح اجيب مرجحتين و افتح ملاهى على ناصية الشارع

بس برضه لقيتها فكرة مش تمام


المهم قولت طب ما استفيد من اربع سنين المعهد و اشوف حاجة ليها علاقة بالبكالوريوس اللى متحنط فى الدولاب ده

قعدت ادور على النت

لقيت كل الناس عايزة سكرتيرات

طب و الله فكرة

و اهى ممكن تضرب معايا و اعجب المدير و يتجوزنى على مراته

لقيت مكتب عايز سكورتيرة تجيد الانجليزية

yes انا اجيد الانجليزية


حتى بالامارة I'm fine thank you

و تجيد الكمبيوتر

الحمد لله اربع سنين المحهد ما ضاعتش هدر


فبعت السى فى بتاعى

و لقيتهم بيتصلوا


روحت يا حضرات و يا لهول ما رأيت

السكرتيرات بسم الله ما شاء الله لابسين من غير هدوم

و هما يبصوا لى و انا ابحلق لهم

و هانبقى نتصل بيكى ان شاء الله ( و ابقى قابلينا طبعا )


المهم من شركة لمكتب

اللى عايز واحده تشيل المكتب فى كل حاجة حتى النظافه كمان ( مش انا طبعا)

و اللى عايزنى من الصبح لبليل على 300 جنية

طب اعمل ايه اهج و اسيب البلد يعنى

فالمهم قررت اخيرا ما ادورش على شغل تانى

و ابتديت افكر فى اتجاه تانى

تنظيم عصابى على كبير قووووووووووى و الله الموفق