( ما انا عاطله بقى و ما واريش حاجه
)المهم قلبت على mbc max لقيتهم جايبين فيلم liar liar بتاع جيم كارى
الفيلم ده انا شوفته كتير قبل كده
بس بحبه جداااااااااااااااا
المهم استعديت للفيلم
قومت طسيت وشى بشوية ميه من التلاجه ( أصل مية الحنفيه مولعه
) لأنى كنت مطبقه من قبلها بيومو جبت شوية لب على سودانى ( و ليذهب الريجيم الى الجحيم
)المهم قعدت اتفرج على الفيلم
الفيلم للى ما شافهوش قبل كده فكرته بتدور حوالين محامى محترف كذب بيكذب فى كل الاوقات بسبب و بدون سبب
الموضوع ده كان عامل مشاكل نفسية جامدة لابنه الوحيد
يوم عيد ميلاد الولد اتمنى أمنية عيد الميلاد و هى ان والده يبطل كذب لمدة يوم واحد
و طبعا لكم ان تتخيلوا المشكلة اللى وقع فيها البطل
مش قادر يكذب خالص
و لا حتى قادر يجامل
و كان هايروح فى داهية بسبب الموضوع ده
بس اكتر مشهد عجبنى لما ابنه استغل الامنية دى و سأله عن الاسئلة اللى نفسه يعرف اجابتها بجد
زى هى المصارعه حقيقية و لا لأ
و لو قلبت وشى هايفضل فعلا على الشكل ده
مامتى كانت على طول تضحك عليا و انا صغيرة و تقولى لو قلبتى جفنك اللى فوق و قعدتى تخوفى اخوكى
هايقف على كده و مش هاتعرفى ترجعيه تانى
و طبعا كنت باصدقها و باخاف اقلبه
ده احنا كنا هبل اوى و احنا صغيرين
المهم بما انى قاعده فاضية و ما واريش اى حاجه قعدت اتخيل لو الموضوع ده حصل معايا هايبقى موقفى ايه
يعنى لو قعدت 24 ساعة مش قادرة اكذب هايبقى الحال ايه
انا مش كذابه و الحمد لله
بس المفروض ان حتى المجامله مش هاقدر عليها
يعنى مثلا لو طنط صاحبت السوبر ماركت اللى تحتنا سألتنى هى ندى بتضايقك فى حاجة لسه
ندى للى ما يعرفهاش خبرة فى انها تتطوح السبت كل ما انزله علشان اشترى حاجه غير انها بتقولى يا طنط و هى شحطه و بتقعد تغنى و صوتها شبه صوت يوسف داوود
طبعا مش هاقولها زى كل مرة ندى دى نسمه و ملاك يا ريتك جبتى منها 4
لأ بقى
هاقولها بنتك دى مفترية و يا ريتك كنتى بركتى عليها لما ولدتيها و يقطع العيال على اللى عايز يجيب عيال زى بنتك دى و روحى يا شيخه منك لله انتى و بنتك فى ساعه واحده
و لا لو كانت نوبة الصراحه دى جاتلى و انا لسه باشتغل
يا نهار ابيض ده انا كنت اترفدت وقتى كده و انا رافعه ايديا الاتنين
تخيلوا معايا طالعه من اجتماع 3 ساعات مع صاحب المدرسة و ما قولناش فيه كلمه واحده مفيده
و ده بيقول اجتماع المره دى كان مهم جداااااااا
طبعا ما كونتش هاقوله اه طبعا يا مستر
لأ بقى
ده اجتماع فاشل و انت راجل مفترى و الهى و انت جاهى ينتقم منك على الوقت اللى ضيعته فى كلام تافه مالهوش لزمة
و لا لو عيل سألنى يا ميس هو البرنامج اللى بندرسه ده مهم
طبعا ما كونتش هاقوله أه طبعا مهم و بكرة ينفعكم ان شاء الله
لأ بقى
ده برنامج اهبل و مالهوش اى 60 لزمة و كلام فاضى بيملوا بيه مخكم المهوى و تعليم فاشل و مناهج عقيمة
ده غير كم المشاكل اللى كانت هاتحصل بينى و بين مامتى و اخويا
يعنى زى تعبتك يا حبيبتى بعد ما تعزم لى العائلة الكريمة كلها فى يوم واحد و اشيل انا المطبخ من الالف الى الياء
اكيد ما كنتش هاقولها تعبك راحه يا حبيبتى يا ريتك تعزميهم كل يوم و الله كانوا ماليين علينا البيت اخواتك و عيالهم حبايب قلبى
لا بقى
و لا بلاش دى مامتى و عيب اقول اللى كنت هاعمله كده قدام الناس
عيب يا دوشة و بالوالدين احسانا
اخويا بقى
اكيد الاسعاف كانت هاتيجيى تشيل حد مننا و التانى كان هايقضى باقى عمره خلف اسوار السجون
ده من ناحية
من ناحية تانية تخيلت انى اقدر اتمنى الامنية دى للناس و تجيلى الفرصة أسألهم على الاسئلة اللى محيرانى
يعنى مثلا
كنت هاسال الاخوة اللى حاطين امتحانات الثانوية العامية
بذمتك يا شيخ انت و هو ضمايركم مرتاحه و انتوا جايبين اسئلة تشل كده
الأخ احمد زكى بدر
بذمتك مش بتبقى فرحان و مزقطط و انت شايف العيال طالعه بتنوح من الامتحانات كل يوم يا سايكو يا معقد
الاخ عمرو دياب
امتى هاتعرف امتى انك كبرت امتى على التنطيط على المسرح و على العضله اللى منفوخه عند حسن كاوتش
الاخ محمد سعد
امتى هاتعقل امتى و تبطل تعمل اللمبى
ده مش ناقص غير انه يرشح نفسه فى الانتخابات رمز اللمبى
الاخ تامر حسنى
هاتخلى مامتك تركب لك زراير لقمصانك مكان اللى بتقع امتى
الغالى ابن الغاليين
هاتنتحر امتى و تخلصنا منك بقى اصله واضح انه لزق فى الكرسى خلاص
المسئولين اللى بيتعالجوا على نفقة الدوله هما و اهلهم
بذمتكم مش خسارة فيكم العلاج و هو اللى سرقتوه من البلد شوية و لا انتوا البعدا محتاجين مثلا و احنا مش واخدين بالنا
ناس كتير اووووووى نفسى اتمنى لهم الامنيه دى
بس اكتر حد بصراحه نفسى اتمناها له و لو حتى 10 دقايق مش يوم كامل
هو الواد انس ابن خالى
نفسى اعرف ابيبكيكبيبيكبيبكوو اللى بتقولها لى و انت قرفان دى و بتعقبها بتشويح
كان هايعمينى اخرمرة 
يا ترى الكلام ده شتيمة زى ما انا حاسه
و لا بتهزر معايا زى ما باباك بيقولى
ليست هناك تعليقات:
إرسال تعليق